ދިމާވި ޓެކްނިކަލް މައްސަލައަކާގުޅިގެން ފުނަދޫ އެއަރޕޯޓަށް ދަތުރުތައް މެދުކަނޑާލައިފި

ފުނަދޫ އެއަރޕޯޓުގެ ފަޔަރ ލޮރީއަށް ދިމާވި މައްސަލައަކާ ގުޅިގެން ޤައުމީ އެއަރލައިން މޯލްޑިވިއަންގެ ދަތުރުތައް އެ އެއަރޕޯޓަށް މެދުކަނޑާލައިފިއެވެ.

މިކަމާ ގުޅޭގޮތުން މޯލްޑިވިއަނުން ނެރުނު ބަޔާނެއްގައި ބުނެފައިވަނީ، "ދިމާވި ޓެކްނިކަލް މައްސަލައެއްގެ ސަބަބުން މިއަދަށް ހަމަޖެހިފައިވާ ޝެޑިއުލް ދަތުރުތައް ކުރިއަށް ގެންދެވެން ނެތް" ކަމަށެވެ. އަދި މިއަދަށް ޓިކެޓް ނަގާފައިވާ ފަރާތްތަކަށް އިތުރު ގޮތްތަކެއް ހޯދައިދިނުމަށް މަސައްކަތްކުރަމުންދާ ކަމަށްވެސް އެ ބަޔާނުގައި ފާހަގަކޮށްފައިވެއެވެ.

ޤައުމީ އެއަރލައިނުން އާންމުކޮށް ފުނަދޫ އެއަރޕޯޓަށް ދަތުރުތައް ކުރަމުން އަންނަނީ ހަފްތާއަކު ތިން ދުވަހުއެވެ. މިކަމާ ގުޅިގެން ދިމާވެދާނެ ދަތިތަކަށް މަޢާފަށް އެދި، އިތުރު އެހީތެރިކަމެއް ބޭނުންވާ ފަރާތްތަކުން 1671 އަށް ގުޅުމަށް މޯލްޑިވިއަނުން އަންގާފައިވެއެވެ.

މި މައްސަލަ ހައްލުކުރުމަށް މަސައްކަތްކުރަމުންދާކަމަށާއި، ވީ އެންމެ އަވަހަކަށް ދަތުރުތައް އަލުން ފެށޭނެކަމަށް މޯލްޑިވިއަނުން އުންމީދުކުރާކަމަށް ވަނީ ބުނެފައެވެ. ނަމަވެސް ދަތުރުތައް އަލުން ފެށޭނެ ވަކި ތާރީޚެއް އަދި ހާމަކޮށްފައެއް ނުވެއެވެ.

އެއަރޕޯޓެއްގައި ފަޔަރ ލޮރީއަށް މައްސަލަ ޖެހުމަކީ އެއަރޕޯޓް އޮޕަރޭޝަންތަކުގެ ސަލާމަތާއި ރައްކާތެރިކަމަށް ނުހަނު ބޮޑު ނުރައްކަލެކެވެ. ބައިނަލްއަޤްވާމީ މަދަނީ ވައިގެ ދަތުރުފަތުރުގެ ޖަމްޢިއްޔާ (އައިކާއޯ) ގެ މިންގަނޑުތަކުގެ ދަށުން، ހުރިހާ އެއަރޕޯޓެއްގައިވެސް މަދުވެގެން އެއް ފަޔަރ ލޮރީ އޮތުމަކީ ލާޒިމު ކަމެކެވެ.

ފަޔަރ ލޮރީއަކީ އެއަރޕޯޓެއްގައި ކުއްލި ހާލަތެއް ދިމާވެއްޖެނަމަ، އެންމެ ފުރަތަމަ އިޖާބަދޭ އުޅަނދެވެ. މަތިންދާބޯޓަކަށް އެއްވެސް ހާދިސާއެއް ދިމާވެއްޖެނަމަ، އެ ހާދިސާއަކަށް އެންމެ ފުރަތަމަ އިޖާބަދޭނީ ފަޔަރ ލޮރީންނެވެ. އެހެންކަމުން، ފަޔަރ ލޮރީއެއް ނެތި ނުވަތަ މައްސަލަ ޖެހިފައިވާ ފަޔަރ ލޮރީއަކާއެކު އެއަރޕޯޓް އޮޕަރޭޓްކުރުމަކީ ވަރަށް ބޮޑު ނުރައްކަލެކެވެ.