މިމަހު 17ގައި މުލީ އެއަރޕޯޓަށް މޯލްޑިވިއަންގެ ދަތުރުތައް ފަށަނީ

މިމަހު 17 ގައި މުލީ އެއަރޕޯޓަށް މޯލްޑިވިއަންގެ ދަތުރުތައް ފަށާނެ ކަމަށް މޯލްޑިވިއަން އިން ބުނެފިއެވެ. 

ޤައުމީ އެއަރލައިން މޯލްޑިވިއަނުން ހާމަކޮށްފައިވާ ގޮތުގައި، މި އައު ރޫޓުގެ ދަތުރުތައް ފެށުމަށް ހަމަޖެހިފައިވަނީ މި ހިނގާ މެއި މަހުގެ 17 ވަނަ ދުވަހުގައި ކަމަށެވެ. އަދި މާލެއާއި މުއްޔާ ދެމެދު ކުރެވޭ މި ދަތުރަކީ 35 މިނެޓުގެ ދަތުރެއް ކަމަށް ވެސް އެއަރލައިނުން ބުނެފައިވެއެވެ.

މޯލްޑިވިއަނުން ބުނީ، މުލި އެއަރޕޯޓަށް ހަފްތާއަކު ދަތުރެއް ކުރުމަށް ހަމަޖެހިފައިވާކަމަށާއި، މި ދަތުރުތައް ކުރާނީ ކޮންމެ ހަފްތާއެއްގެ ވެސް ހޮނިހިރު ދުވަހު ކަމަށެވެ.

މޯލްޑިވިއަނުން މުއްޔަށް ދަތުރުކުރުމަށް ކޮޅަކަށް ނަގަނީ 1377 ރުފިޔާއެވެ.

Touching down in Meemu Muli for the very first time! 🛬 Maldivian proudly launches its newest domestic route, connecting you to the heart of Meemu Atoll in just 35 minutes. Book now and be part of this historic journey. 💫 #maldivianaero pic.twitter.com/fZnWexZPsQ

— MaldivianAero (@MaldivianAero) May 9, 2025

އެ އެއާޕޯޓްގައި ޓެސްޓް ފްލައިޓް ޖައްސާފައިވަނީ މި މަހުގެ 25 ވަނަ ދުވަހެވެ. 

މުލީ އެއާޕޯޓް ހެދުމުގެ މަސައްކަތް ކޮށްފައިވަނީ އެމްޓީސީސީންނެވެ. އެމްޓީސީސީއާ އެއާޕޯޓުގެ މަސައްކަތް ހަވާލު ކުރީ، 2021 ވަނަ އަހަރުގެ ފެބްރުއަރީ މަހުގެ 28 ވަނަ ދުވަހުއެވެ. އެގޮތުން ބިން ހިއްކައިގެން 1200 މީޓަރުގެ ރަންވޭއަކާއެކު އެއާޕޯޓް ތަރައްގީކުރުމުގެ މަސައްކަތް ހަވާލު ކުރީ 212 މިލިއަން ރުފިޔާއަށެވެ.

2021 ވަނަ އަހަރު އެ ކުންފުންޏާ މަސައްކަތް ހަވާލު ކުރި ނަމަވެސް، މަސައްކަތް ލަސްވެގެން ގޮސްފައިވަނީ ފައިސާގެ ދަތިކަމާ ގުޅިގެން ކަމަށް މީގެ ކުރިން އެމްޓީސީސީން ވަނީ ބުނެފައެވެ.

ރާއްޖޭގެ އެކި ސަރަހައްދުގައި 12 އަށް ވުރެ ގިނަ އެއާޕޯޓް ގާއިމްކޮށްފައިވާއިރު، އިތުރު އެއާޕޯޓްތައް ވެސް ގާއިމްކުރުމުގެ މަސައްކަތް މިހާރު ވެސް ދަނީ ކުރަމުންނެވެ.