Ads by Ministry of Arts, Culture and Heritage

ޚަބަރު

ވަރިވި ނަމަވެސް ސޯޝަލް ހައުސިންގެ ހައްގު ނުގެއްލޭގޮތް ހަދަން އާއިލާއާ ބެހޭ ގާނޫނަށް އިސްލާހެއް

ވަރިވި ނަމަވެސް ސޯޝަލް ހައުސިންގެ ހައްގު ނުގެއްލޭގޮތް ހަދަން އާއިލާއާ ބެހޭ ގާނޫނަށް އިސްލާހެއް

ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ). ފޮޓޯ: މަޖިލިސް

ޙަސްނާ އަޙްމަދް

ޙަސްނާ އަޙްމަދް

17 ނޮވެމްބަރު 2026، 12:04

17 ނޮވެމްބަރު 2026، 12:04

ދެމަފިރިން ވަރިވި ނަމަވެސް، ސަރުކާރުގެ އިޖުތިމާއީ ބޯހިޔާވަހިކަމުގެ ސިޔާސަތުގެ ދަށުން ލިބޭ ފްލެޓް ނުވަތަ ބޯހިޔާވަހިކަމުގެ ފުރުސަތު ނުގެއްލޭނެ ގޮތް ހަމަޖެއްސުމަށްޓަކައި، އާއިލާއާ ބެހޭ ގާނޫނަށް އިސްލާހު ގެނައުމުގެ ބިލެއް ރައްޔިތުންގެ މަޖިލީހަށް ހުށަހަޅައިފިއެވެ.

 މި އިސްލާހު މަޖިލީހަށް ހުށަހެޅުއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެވެ. 

މެންބަރު މުހައްމަދު އިބްރާހީމް މި އިސްލާހު ހުށަހެޅުއްވި މައިގަނޑު ސަބަބެއްގެ ގޮތުގައި ބަޔާންކުރައްވާފައިވަނީ، ސަރުކާރުގެ ސޯޝަލް ހައުސިން މަޝްރޫއުތަކުގެ ދަށުން ދޫކުރާ ފްލެޓްތަކަށް ކުރިމަތިލުމުގައި ކައިވެނިކޮށްގެން އުޅޭ މީހުންނަށް ޕޮއިންޓް ލިބޭ އުސޫލެއް އޮންނާތީއެވެ. ނަމަވެސް، އެފަދަ ހާލަތްތަކުގައި އެއްބަސްވުން ހަދައި ފްލެޓް ރަޖިސްޓްރީ ކުރެވެނީ ދެމަފިރިންގެ ތެރެއިން އެކެއްގެ ނަމުގައި ކަމަށްވާތީ، ދެމަފިރިން ވަރިވާ ހާލަތްތަކުގައި ނަމުގައި ނެތް އަނެއް ފަރާތަށް ބޯހިޔާވަހިކަމުގެ ހައްގު ގެއްލި، މަގުމަތިވާ ގޮތް ދިމާވާ ކަމަށް ބިލުގައި ބަޔާންކޮށްފައިވެއެވެ. މީގެ އިތުރުން ވަކިވުމަށްފަހު ދަރިން ބަލާ ފަރާތަށް ބޯހިޔާވަހިކަމެއް ނެތުމުގެ ސަބަބުން ކުރިމަތިވާ ދަތިތަކަށް އިންސާފުވެރި ހައްލެއް ހޯދައިދިނުމަކީ ވެސް މި އިސްލާހުގެ މަގުސަދެކެވެ.

އާއިލާއާ ބެހޭ ގާނޫނުގެ 32 ވަނަ މާއްދާގެ ދަށުން ދެމަފިރިންގެ މުދާ ބެހުމުގެ އުސޫލުތައް ބަޔާންކޮށްފައި އޮތް ނަމަވެސް، ސަރުކާރުން ފޯރުކޮށްދޭ ބޯހިޔާވަހިކަމުގެ ހައްގުތަކާ ގުޅޭގޮތުން ގާނޫނުގައި ސާފު އުސޫލުތަކެއް ނެތުމުގެ ސަބަބުން ކޯޓުތަކުން މައްސަލަތައް ނިންމުމުގައި ދަތިތަކާ ކުރިމަތިވާ ކަމަށް ބިލުގައި ފާހަގަކޮށްފައިވެއެވެ. އެހެންކަމުން މި ބިލުން ހުށަހަޅާފައިވަނީ ގާނޫނަށް 38-1 ވަނަ މާއްދާގެ ގޮތުގައި އައު މާއްދާއެއް އިތުރުކުރުމަށެވެ.

މި އިސްލާހުގައި ހިމެނޭ މައިގަނޑު ކަންކަން:

  • ދައުލަތުގެ ސޯޝަލް ހައުސިން އުސޫލުން ލިބިފައިވާ ފްލެޓެއް ނުވަތަ އެއްބަސްވުމެއް ދެމަފިރިންގެ ތެރެއިން އެކެއްގެ ނަމުގައި އޮތް ނަމަވެސް، އެއީ ކައިވެނީގެ ތެރޭގައި ދެމަފިރިންނަށް ލިބުނު ތަނެއްގެ ގޮތުގައި ބަލައި، ވަރިވުމަށްފަހު ވެސް ދެފަރާތަށް އެތަނުގެ މައްޗަށް ހަމަހަމަ ހައްގު ލިބިގެންވާ ކަމަށް ކަނޑައެޅުން.
  • ދެމަފިރިން ވަކިވުމަށްފަހު އެއްބަސްވުމަކަށް ނާދެވިއްޖެ ހާލަތެއްގައި، ދަރިން ބެލުމާ ހަވާލުވާ ފަރާތަށް އެ ބޯހިޔާވަހިކަމުގައި ދިރިއުޅެވޭނެ އިންތިޒާމު ހަމަޖައްސައިދިނުމަށް އެކަށީގެންވާ އަމުރެއް ނެރުމުގެ ބާރު ކޯޓަށް ދިނުން.
  • އެކެއްގެ ނަމުގައި އޮތް ނަމަވެސް، އަނެއް ފަރާތުގެ ހައްގު ގެއްލޭގޮތަށް އެ ތަން ދޫކޮށްލުން، ވިއްކާލުން ނުވަތަ އެހެން ފަރާތަކަށް ނަން ބަދަލުކުރުން ފަދަ އެއްވެސް މުއާމަލާތެއް ނުކުރެވޭނެ ގޮތް ހެދުން.

މީގެ އިތުރުން، ބޯހިޔާވަހިކަމާ ގުޅިގެން ދައްކަންޖެހޭ ފައިސާ ނުވަތަ ލޯނު ދެއްކުމުގައި ދެފަރާތުގެ މާލީ ހާލަތަށް ރިއާޔަތްކޮށް ޒިންމާތައް ބަހައިލުމުގެ އުސޫލެއް ކޯޓުން ކަނޑައެޅުމުގެ ބާރު ވެސް މި އިސްލާހުގެ ދަށުން ލިބިދޭނެ ކަމަށް ބިލުގައި ބަޔާންކޮށްފައިވެއެވެ.

Ads by Ministry of Arts, Culture and Heritage

Ads by Ministry of Arts, Culture and Heritage

މި ލިޔުން ކިޔާލުމުން

ކިޔުންތެރިންގެ ހިޔާލު
450