ރައީސުލްޖުމްހޫރިއްޔާގެ އޮފީހުގެ ހުރުމަތް ކެނޑުމަކީ ޑިމޮކްރަސީއެއް ނޫން: ޝަކީލް

ރައީސުލްޖުމްހޫރިއްޔާގެ އޮފީހުގެ ހުރުމަތް ކެނޑުމަކީ ޑިމޮކްރަސީއެއް ނޫން ކަމަށާއި، އެފަދަ އަމަލުތައް ހިންގާ ފަރާތްތަކަށް ހައްގު އަދަބު ދެވެންޖެހޭނެ ކަމަށް މޯލްޑިވްސް ޙައްޖު ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލް ވިދާޅުވެއްޖެއެވެ.

ޝަކީލް މިހެން ވިދާޅުވީ މިއަދު ރައީސުލްޖުމްހޫރިއްޔާގެ އޮފީހުގައި ކުރިއަށް ދިޔަ ނޫސްވެރިންގެ ބައްދަލުވުމެއްގެ ތެރެއިން 'އަދަދު' ނޫހުގެ ނޫސްވެރިޔަކު އަމަލުކުރި ގޮތާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައެވެ. ޝަކީލް ވިދާޅުވީ ނޫސްވެރިކަމުގެ ފާހުގެ ނިވަލުގައި ތިބެ، ދައުލަތުގެ އެންމެ މަތީ އެއް އިދާރާގެ ތެރެއަށް ވަދެ ސިޔާސީ އެކްޓިވިސްޓުން އުޅޭ ގޮތަށް އުޅުމަކީ ބަލައިގަނެވޭނެ ކަމެއް ނޫން ކަމަށެވެ.

ޝަކީލް އިތުރަށް ވިދާޅުވީ، ޝަރުއީ ކޯޓުތަކުގެ އަމުރަށް ގޮންޖަހައި، ރައީސުލްޖުމްހޫރިއްޔާގެ އަބުރުފުޅަށް އަރައިގަތުމަކީ ދިވެހިރާއްޖޭގެ ގާނޫނުއަސާސީންނާއި އިސްލާމީ ޝަރީއާއިންވެސް އެއްވެސް ބަޔަކަށް ލިބިދީފައިވާ ހައްގެއް ނޫން ކަމަށެވެ. "މިއަދު ޝަރުއީ ކޯޓުތަކުގެ އަމުރަށް ގޮން ޖަހައި ރައީސުލްޖުމްހޫރިއްޔާގެ އަބުރުފުޅަށް އަރައިގަނެ ރައީސުލްޖުމްހޫރިއްޔާގެ އޮފީހުގެ ހުރުމަތް ކެނޑުމަކީ ޑީމޮކްރެސީއެއް ނޫން،" ޝަކީލް ވިދާޅުވިއެވެ.

ތިމާމެންނަކީ ނޫސްވެރިންކަމަށް ބުނެ ނޫސްވެރިކަމުގެ ފާހުގެ ނިވަލުގައި ދައުލަތުގެ އެންމެ މަތީ އެއް އިދާރާގެ ތެރެއަށްވަންނަން ފުރުސަތު ހޯދައިގެން ސިޔާސީ އެކްޓިވިސްޓުން އުޅޭ ގޮތަށް އުޅޭ ބަޔަކު މިއަދު ޝަރުއީ ކޯޓުތަކުގެ އަމުރަށް ގޮން ޖަހައި ރައީސުލްޖުމްހޫރިއްޔާގެ އަބުރުފުޅަށް އަރައިގަނެ…

— Mohamed Shakeel 🇲🇻 (@schakyyl) May 11, 2026

ގައުމުގެ ވީދިފައިވާ އިޖުތިމާއީ ފޭރާން އިއާދަކުރުމަށްޓަކައި މިފަދަ އަމަލުތައް ހިންގާ ފަރާތްތަކާ ދެކޮޅަށް ދައުވާ ކުރެވެންޖެހޭނެ ކަމަށްވެސް އޭނާ ފާހަގަކުރެއްވިއެވެ. ޝަކީލް ވަނީ މިފަދަ މީހުންނަށް ގާނޫނީ ގޮތުން ދޭންޖެހޭ ހައްގު އަދަބު ދިނުމަށް ގޮވާލައްވާފައެވެ.