ކުނބުރުދޫގައި އަޅާ 25 ހައުސިންގ ޔުނިޓްގެ އެއްބަސްވުމުގައި ސޮއިކޮށްފި

އދ. ކުނބުރުދޫގައި ސަރުކާރުން ކުރިއަށްގެންދިއުމަށް ނިންމާފައިވާ 25 ހައުސިންގ ޔުނިޓް ތަރައްޤީކުރުމުގެ މަޝްރޫޢުގެ އެއްބަސްވުމުގައި ސޮއިކޮށްފިއެވެ.

 މި މަޝްރޫޢަކީ އެ ރަށަށް ދިމާވެފައިވާ ބޯހިޔާވަހިކަމުގެ މައްސަލައަށް ޙައްލެއް ހޯދައިދިނުމަށް ސަރުކާރުން ކުރިއަށްގެންދާ މުހިންމު މަޝްރޫޢެކެވެ.

މި މަޝްރޫޢުގެ އެއްބަސްވުމުގައި މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ސްޓޭޓް މިނިސްޓަރު އިސްމާޢީލް ޙަމީދު އެވެ. އަދި މި މަޝްރޫޢުގެ ކޮންޓްރެކްޓަރު، ހައުސިންގ ޑިވެލޮޕްމެންޓް ކޯޕަރޭޝަން (އެޗް.ޑީ.ސީ) ގެ ފަރާތުން ސޮއިކުރެއްވީ އެ ކޯޕަރޭޝަންގެ މެނޭޖިންގ ޑިރެކްޓަރު، (ރިޓަޔާޑް) ބްރިގޭޑިއާ ޖެނެރަލް ޢަލީ ޒުހައިރު އެވެ.

މަޝްރޫޢުގެ ތަފްޞީލު
މި މަޝްރޫޢުގެ ދަށުން ކުނބުރުދޫގައި ޢިމާރާތް ކުރުމަށް ހަމަޖެހިފައިވަނީ 3 ކޮޓަރީގެ 25 ހައުސިންގ ޔުނިޓެވެ. މި މަޝްރޫޢުގެ މަސައްކަތް ނިންމުމަށް އެޗް.ޑީ.ސީއަށް ދީފައިވަނީ 480 ދުވަހުގެ މުއްދަތެކެވެ. މިއީ ރަށުގެ އާބާދީއަށް ބޭނުންވާ ބޯހިޔާވަހިކަން ފޯރުކޮށްދިނުމަށް އެކަށީގެންވާ ފެންވަރަކަށް ފަރުމާކުރެވިގެން ކުރިއަށްގެންދާ މަޝްރޫޢެކެވެ.

މި މަޝްރޫޢުގެ އެއްބަސްވުމުގައި ސޮއިކޮށްފައިވަނީ 29 މާރިޗު 2024 ގައެވެ. މި މަޝްރޫޢު ނިމުމުން ކުނބުރުދޫގެ ގިނަ ޢާއިލާތަކަކަށް ރައްކާތެރި އަދި ތަނަވަސް ބޯހިޔާވަހިކަމެއް ލިބިގެންދާނެ ކަމަށް ސަރުކާރުން އުންމީދު ކުރެއެވެ.