"އެންވަޔަރަންމަންޓަލް ޕްރޮޓެކްޝަން އެޖެންސީ" ގެ ނަން "އެންވަޔަރަންމަންޓަލް ރެގިއުލޭޓަރީ އޮތޯރިޓީ" އަށް ބަދަލުކޮށްފި

މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓުގެ ދަށުން ހިންގަމުން ގެންދާ "އެންވަޔަރަންމަންޓަލް ޕްރޮޓެކްޝަން އެޖެންސީ" ގެ ނަން، "އެންވަޔަރަންމަންޓަލް ރެގިއުލޭޓަރީ އޮތޯރިޓީ" އަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ބަދަލުކުރައްވައިފިއެވެ.

ދިވެހިރާއްޖޭގެ ޤާނޫނުއަސާސީގެ 116 ވަނަ މާއްދާގެ (ހ) އިން ރައީސުލްޖުމްހޫރިއްޔާ އަށް ލިބިވަޑައިގަންނަވާ ބާރުގެ ދަށުން، މި ބަދަލު ގެންނަވާފައިވާކަން އިޢުލާން ކުރައްވާފައިވަނީ، ދެންނެވުން ނަންބަރު 14/2025 ގައެވެ.

ރައީސުލްޖުމްހޫރިއްޔާ، "އެންވަޔަރަންމަންޓަލް ޕްރޮޓެކްޝަން އެޖެންސީ" ގެ ނަން، "އެންވަޔަރަންމަންޓަލް ރެގިއުލޭޓަރީ އޮތޯރިޓީ" އަށް ބަދަލުކުރައްވައިފި https://t.co/xYwkPV2xgp pic.twitter.com/Pxn9n5dKoM

— The President's Office (@presidencymv) August 12, 2025

މި ބަދަލާ ގުޅިގެން، ގަވަރނިންގ ބޯޑެއްގެ ލަފާގެ ދަށުން ހިންގޭ އިދާރާއެއްގެ ގޮތުގައި އެ އިދާރާ އޮތް އޮތުން ނިމުމަކަށް ގެނެވި، އެއީ ސީދާ މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓުގެ ދަށުން ހިންގޭ އިދާރާއެއްގެ ގޮތުގައި ވަނީ ކަނޑައަޅުއްވާފައެވެ.

ރައީސްއޮފީހުން ހާމަކޮށްފައިވާ ގޮތުގައި، އެއިދާރާގެ ނަން ބަދަލުކުރުމުގެ މަޤުޞަދަކީ، އެއިދާރާއިން ކުރަމުންގެންދާ މަސައްކަތްތަކާ ވީހާވެސް ގުޅުންހުރި ނަމެއް ދިނުމާއި، އެ އިދާރާގެ މަސައްކަތްތައް މިހާރަށްވުރެ ހަރުދަނާކޮށް، ހަލުވިކުރުމެވެ. ނަމަވެސް، އެއިދާރާގެ ވެބްސައިޓަށް އަދި މިބަދަލު ގެނެސްފައެއް ނެތެވެ.