ކުޑަރަށް ރިސޯޓުގެ ވޯޓަރ ވިލާއެއްގައި ރޯވި އަލިފާން ކޮންޓްރޯލްކޮށްފި

އދ. ކުޑަރަށް ރިސޯޓުގެ ވޯޓަރ ވިލާއެއްގައި ރޯވި އަލިފާނުގެ ހާދިސާ ކޮންޓްރޯލްކޮށްފައިވާ ކަމަށް ޤައުމީ ދިފާޢީ ބާރު (އެމްއެންޑީއެފް) އިން  ވިދާޅުވެއްޖެއެވެ.

މި ހާދިސާގެ މަޢުލޫމާތު އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބިފައިވަނީ މިއަދު ހެނދުނު 10:52 ހާއިރުއެވެ. މަޢުލޫމާތު ލިބުމާއެކު އެމްއެންޑީއެފްގެ ފަޔަރ އެންޑް ރެސްކިޔު ޓީމު ވަނީ އެރަށަށް ގޮސް އަލިފާން ނިއްވާލުމުގެ މަސައްކަތް ފަށާފައެވެ.

#އަދާހަމަ: ކުޑަރަށް ރިސޯޓުގައި ހިނގި އަލިފާނުގެ ހާދިސާވަނީ ކޮންޓްރޯލްކުރެވިފަ. ރިސޯޓުގައި، އަލިފާން ރޯވި ސަރަހައްދުގައި ވިލަމެންދޫ ރިސޯޓާއި ސަންޓާރާ ރިސޯޓުގެ ފަޔަރ ޓީމުތަކުން ހަރަކާތްތެރިވަމުންދޭ. އަދި އެމްއެންޑީއެފް މާމިގިލީ ފަޔަރ ސްޓޭޝަންގެ ޓީމެއް ވެސް ވަނީ އެ ރިސޯޓަށް ގޮސްފަ. pic.twitter.com/vhMnTEXZb4

— Maldives National Defence Force (@MNDF_Official) August 11, 2025

އަލިފާން ރޯވި ސަރަހައްދުގައި ވިލަމެންދޫ ރިސޯޓާއި ސެންޓާރާ ރިސޯޓުގެ ފަޔަރ ޓީމުތަކުންވެސް ވަނީ ހަރަކާތްތެރިވެފައެވެ. އަދި، އަލިފާން ނިވާލުމަށް މާމިގިލީ ފަޔަރ ސްޓޭޝަންގެ ޓީމެއްވެސް ވަނީ ކުޑަރަށް ރިސޯޓަށް ގޮސް އެހީތެރިކަން ފޯރުކޮށްދީފައެވެ.

މިހާދިސާ ހިނގާފައިވަނީ، އދ. ކުޑަރަށް ރިސޯޓުގެ ވޯޓަރ ވިލާއެއްގައި ކަމަށް ޤައުމީ ދިފާޢީ ބާރުން ވަނީ ވިދާޅުވެފައެވެ. އަލިފާން ކޮންޓްރޯލްކުރެވުނުއިރު އެއްވެސް މީހަކަށް އަނިޔާއެއް ލިބުނުކަމުގެ މަޢުލޫމާތު ލިބިފައެއް ނުވެއެވެ.