ޚަބަރު
ޗައިނާގައި މާސްޓަރސްއަށް ކިޔެވުމަށް 200 ފުލް ސްކޮލާޝިޕަށް ހުޅުވާލައިފި
ދިވެހި ދަރިވަރުންތަކެއް ދަސްވެނި ވަނީ. ފޮޓޯ: އެމް.އެން.ޔޫ.
ޗައިނާގައި މާސްޓަރސް ޑިގްރީއަށް ކިޔެވުމުގެ ފުރުޞަތު ފަހިކޮށްދިނުމުގެ ގޮތުން އެ ޤައުމުގެ ސަރުކާރުން ދޭ "ޔޫތު އޮފް އެކްސެލެންސް ސްކީމް އޮފް ޗައިނާ ޕްރޮގްރާމް"ގެ ދަށުން 200 ފުލް ސްކޮލާޝިޕަށް ކުރިމަތިލުމުގެ ފުރުޞަތު ހުޅުވާލައިފިއެވެ.
ހަޔަރ އެޑިއުކޭޝަން މިނިސްޓްރީން ކުރެއްވި އިއުލާނެއްގައި ވަނީ، އެއް އަހަރު ދުވަހުގެ ސްކޮލާޝިޕްގައި ބައިވެރިވާން ޝައުގުވެރިވާ ފަރާތްތަކުން އަންނަ އަހަރުގެ މާޗް މަހުގެ 29ގެ ކުރިން އޮންލައިންކޮށް ފޯމު ހުށަހަޅަން އެދިފައެވެ.
ޗައިނާގެ ސްކޮލަރޝިޕް ކައުންސިލް (ސީ.އެސް.ސީ) ކުރިއަށްގެންދާ މި ޕްރޮގްރާމަކީ އެކި ދާއިރާތަކަށް ބޭނުންވާ ފަންނީ މީހުން ތަމްރީނުކުރުމަށް އަމާޒުކޮށްގެން ހިންގާ ޕްރޮގްރާމެކެވެ. މުޅިން ހިލޭ ކިޔެވުމުގެ ފުރުޞަތު ލިބޭ މި ސްކޮލާޝިޕްތަކުގައި ހުރިހާ މާއްދާއެއް ވެސް ކިޔަވައިދިނުމަށް ހަމަޖެހިފައިވަނީ އިނގިރޭސި ބަހުންނެވެ.
ޗައިނާގެ 92 ޔުނިވާސިޓީއަކުން ކޯސްތަކުގައި ބައިވެރިވުމުގެ ފުރުސަތު ހުޅުވާލާފައިވާއިރު، އެ ކޯސްތަކަށް ކުރިމަތިލުމުގެ ޝަރުތުތަކުގެ ތެރޭގައި ޑިގްރީ ނިންމާފައިވުމާއެކު އުމުރުން 45 އަހަރު ނުވާ މީހެއްކަމުގައިވުން ހިމެނެއެވެ.
މި ކޯސްތަކަށް ހޮވޭ ފަރާތްތަކުން، ކޯހަށް ފުރުމުގެ ކުރިން ކޯސް ހިންގާ އިންސްޓިޓިއުޓަކީ މޯލްޑިވްސް ކޮލިފިކޭޝަންސް އޮތޯރިޓީ (އެމް.ކިޔު.އޭ) އިން ޤަބޫލުކުރާ އިންސްޓިޓިއުޓެއްކަމާއި، ހޮވިފައިވާ ކޯހަކީ އެމް.ކިޔު.އޭ އިން ޤަބޫލުކުރާ ކޯހެއްކަން ކަށަވަރު ކުރަންވާނެ ކަމަށް ހަޔަރ އެޑިއުކޭޝަން މިނިސްޓަރީން ވަނީ ވިދާޅުވެފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޗައިނާއާއެކު އޮންނަ ގުޅުން އިތުރަށް ބަދަހިކުރަމުން އަންނައިރު، ތަޢުލީމީ ދާއިރާއިން ދިވެހި ޒުވާނުންނަށް ބައިނަލްއަޤްވާމީ ފެންވަރުގެ ފުރުޞަތުތައް ފަހިކޮށްދިނުމަށް ސަރުކާރުން އިސްކަންދެއެވެ. މި ފަދަ ސްކޮލާޝިޕްތަކަކީ ދެ ޤައުމުގެ ދެމެދުގައި އޮންނަ ގާތް ގުޅުމުގެ ދަށުން، ދިވެހި ދަރިވަރުންނަށް މަތީ ތަޢުލީމާއި ތަމްރީނު ހޯދައިދިނުމަށް ލިބޭ މުހިންމު ފުރުޞަތުތަކެކެވެ.