ކަރަންޓު ކެނޑުމުން މެދުކެނޑުނު ފަވާރާގެ ޚިދުމަތް އަލުން ދޭން ފަށައިފި

މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ތަންފީޒުކުރި މޯލްޑިވްސް އިންސްޓަންޓް ޕޭމަންޓް ސިސްޓަމް (އައިޕީއެސް) ފަވާރާގެ ޚިދުމަތްތައް މެދުކެނޑުމަށްފަހު އަލުން ދޭން ފަށައިފިއެވެ. މި ޚިދުމަތްތައް މެދުކެނޑުނީ މާލެ އާއި ހުޅުމާލެއިން ކަރަންޓު ކެނޑުމުގެ ސަބަބުން ދިމާވި މައްސަލައަކާ ގުޅިގެންނެވެ.

Favara services are now back online. Our sincere apologies for the disruption and any inconveniences this may have caused.

— Favara - MIPS (@Favara_MIPS) August 9, 2025

ފަވާރާގެ ޚިދުމަތްތައް މެދުކެނޑުމަކީ މާލެއާއި ހުޅުމާލެއިން ކަރަންޓު ކެނޑިގެން ދިމާވި މައްސަލައަކާ ގުޅިގެން ކަމަށް އެމްއެމްއޭއިން ވަނީ ހާމަކޮށްފައެވެ. މިކަމުގެ ސަބަބުން އާންމު ރައްޔިތުންނަށާއި ވިޔަފާރިތަކަށް ދިމާވި އުނދަގޫތަކަށް އެމްއެމްއޭއިން ވަނީ ވަރަށް އިޚްލާސްތެރިކަމާއެކު މާފަށް އެދިފައެވެ. އަދި ޚިދުމަތްތައް އަލުން ފެށުމުން އެކަން އަންގާނެކަމަށްވެސް މެދުކެނޑުން ހިނގި ވަގުތު އެ އޮތޯރިޓީން ވަނީ ބުނެފައެވެ.

ފަވާރައަކީ ރާއްޖޭގައި ޕޭމަންޓް ޚިދުމަތްތައް ފޯރުކޮށްދިނުމުގައި މުހިންމު ދައުރެއް އަދާކުރާ ޕްލެޓްފޯމެކެވެ. މި ޕްލެޓްފޯމް މެދުވެރިކޮށް ގިނަ އަދަދެއްގެ ވިޔަފާރިތަކާއި ފަރުދުން ދުވާލަކު އެތައް މުއާމަލާތެއް ކުރަމުން ގެންދެއެވެ.

We are experiencing a service downtime for all Favara services due to the current power outage in Male’ and Hulhumale. We sincerely apologize for any inconvenience this may cause. We will update you once services are restored.

— Favara - MIPS (@Favara_MIPS) August 9, 2025

ފަވާރާ ޓްރާންސްފާއިން މަދު ސިކުންތުކޮޅެއްގެ ތެރޭގައި އެއް ބޭންކުން އަނެއް ބޭންކަށް ފައިސާ ޖަމާކުރެވޭއިރު، ފަވާރާ ރިކުއެސްޓް މެދުވެރިކޮށް އަމިއްލަ ފަރާތްތަކާއި ވިޔަފާރިތަކަށްވެސް ބިލް ފޮނުވައިގެން ފައިސާގެ މުއާމަލާތްތައް ހިންގޭނެއެވެ. މިހާރު ޚިދުމަތްތައް އަލުން ފަށާފައިވާތީ، މުއާމަލާތްތައް އަލުން ކުރެވޭނެ ކަމަށް އެމްއެމްއޭއިން ބުނެފައިވެއެވެ.