މި ދަތުރުފުޅަކީ ދެ ޤައުމުގެ ގުޅުމުގެ މުސްތަޤުބަލަށް ސާފު މަގެއް ކަނޑައަޅައިދޭ، މުހިންމު ދަތުރުފުޅެއް: ރައީސް މުޢިއްޒު

ދިވެހިރާއްޖެ އާއި އިންޑިޔާގެ ގުޅުމުގެ މުސްތަޤުބަލަށް ސާފު މަގެއް ކަނޑައަޅައިދޭ، މުހިންމު ދަތުރުފުޅެއްގެ ގޮތުގައި، އިންޑިޔާގެ ބޮޑުވަޒީރު އެކްސެލެންސީ ޝްރީ ނަރެންދްރަ މޯދީ، ދިވެހިރާއްޖެއަށް ކުރެއްވި ސަރުކާރުގެ ދަތުރުފުޅު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސިފަކުރައްވައިފިއެވެ. ރައީސް މުޢިއްޒު މި ދަތުރުފުޅަށް އިންޑިޔާގެ ބޮޑުވަޒީރަށް ވަނީ އިޚްލާޞްތެރިކަމާއެކު ޝުކުރު ދަންނަވާފައެވެ.ރައީސް މިފަދައިން ވިދާޅުވެފައިވަނީ މިއަދު ސޯޝަލް މީޑިއާގައި ކުރައްވި ޕޯސްޓެއްގައެވެ. 

އެމަނިކްފާންގެ ޕޯސްޓުގައި އިތުރަށް ވިދާޅުވެފައިވަނީ ބޮޑުވަޒީރު މޯދީ ދިވެހިރާއްޖެއަށް ކުރެއްވި މި ދަތުރުފުޅުގައި ދެ ޤައުމުގެ އިސްވެރިން ވަނީ ވަރަށް ފައިދާހުރި މަޝްވަރާތަކެއް ކުރައްވާފަކަމަށެވެ. އަދި  މި މަޝްވަރާތަކަށްފަހު، މުހިންމު ދާއިރާތަކުން 4 އެމް.އޯ.ޔޫ  އާއި 3 އެއްބަސްވުމެއްގައި ސޮއިކުރެވިފައިވާކަން ފާހަގަކުރެއްވިއެވެ. މީގެ އިތުރުން، ދިވެހިރާއްޖެއާއި އިންޑިޔާއާ ދެމެދު ފްރީ ޓްރޭޑް އެގްރީމެންޓެއް  ޤާއިމުކުރުމާ ބެހޭ މަޝްވަރާތައް ފެށުމަށް އިޢުލާނުކުރެވިކަންވަނީ ފާހަގަކުރައްވާފައެވެ.

I extend heartfelt thanks to Prime Minister His Excellency Shri @narendramodi for his state visit to the Maldives.

We held fruitful discussions, witnessed the exchange of 4 MoUs & 3 agreements in vital areas, and announced the launch of FTA negotiations.

Together, we celebrated…

— Dr Mohamed Muizzu (@MMuizzu) July 26, 2025

މި ދަތުރުފުޅުގެ ތެރެއިން، ދިވެހިރާއްޖޭގެ މިނިވަންކަމަށް 60 އަހަރު ފުރުމުގެ އަހަރީ ދުވަސް، ބޮޑުވަޒީރު މޯދީއާއެކު ފާހަގަކުރެވުނުކަމާއި މީގެ އިތުރުން، ދެ ޤައުމުގެ ރަސްމީ ގުޅުން ޤާއިމުކުރިތާ 60 އަހަރު ފުރުމުގެ މުނާސަބަތުގައި، ހަނދާނީ ސްޓޭމްޕެއްވެސް ނެރެވިފައިވާކަން ވަނީ ވިދާޅުވެފައެވެ. މި ދަތުރުފުޅުގައި، އިންޑިޔާގެ އެހީގެ ދަށުން ދިވެހިރާއްޖޭގައި ކުރިއަށްގެންދާ މުހިންމު ތަރައްޤީގެ މަޝްރޫޢުތަކެއްވެސް އިފްތިތާޙުކުރެވިފައިވާކަންވަނީ ބަޔާންކުރައްވާފައެވެ.

ރައީސް މުޢިއްޒު ވިދާޅުވެފައިވަނީ، އިންޑިޔާގެ ބޮޑުވަޒީރު މޯދީ ދިވެހިރާއްޖެއަށް ކުރެއްވި މި ދަތުރުފުޅަކީ، ދިވެހިރާއްޖެ އާއި އިންޑިޔާގެ ގުޅުމުގެ މުސްތަޤުބަލަށް ސާފު މަގެއް ކަނޑައަޅައިދޭ، މުހިންމު ދަތުރުފުޅެއް ކަމަށެވެ.