މަދަނީ ޖަމުޢިއްޔާތަކުގެ ޤައުމީ ފޯރަމްގައި ބައިވެރިވުމުގެ ފުރުސަތު ހުޅުވާލައިފި

މަދަނީ ޖަމުޢިއްޔާތަކުގެ ޤައުމީ ފޯރަމްގައި ބައިވެރިވުމުގެ ފުރުސަތު މާލޭ، ހުޅުމާލެ އަދި ވިލިމާލޭގައި ހަރަކާތްތެރިވާ ޖަމުޢިއްޔާތަކަށް ހުޅުވާލައިފިއެވެ. މި ފޯރަމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ މެނިފެސްޓޯގައި ހިމެނޭ މުހިންމު ވަޢުދެކެވެ.

ޒުވާނުން ބާރުވެރިކުރުވުމާއި މަޢުލޫމާތާއި ފަންނާބެހޭ ވުޒާރާއިން އިންތިޒާމުކޮށްގެން ކުރިއަށްގެންދާ މި ފޯރަމް އޮންނާނީ އޮގަސްޓު މަހުގެ 28 އަދި 29 ގައި މާލޭގައެވެ. މިއީ މަދަނީ ޖަމުޢިއްޔާތަކުގެ ގައުމީ ފޯރަމެއް ބާއްވާ ދެވަނަ ފަހަރެވެ.
މި ފޯރަމް ބޭއްވުމުގެ މައިގަނޑު މަޤްޞަދަކީ، މަދަނީ ޖަމުޢިއްޔާތައް ހިންގުމުގައި ހުރި ދަތިތަކާއި، ގޮންޖެހުންތައް ދެނެގަނެ، ތަފާތު މައްސަލަތަކުން އަރައިގަތުމުގައި ޖަމުޢިއްޔާތަކުގެ ދައުރާ ގުޅޭގޮތުން ހޭލުންތެރިކަން އިތުރުކުރުމެވެ.

މަދަނީ ޖަމްޢިއްޔާތަކުގެ ޤައުމީ ފޯރަމްގައި ބައިވެރިވުމަށް މާލޭގެ ޖަމްޢިއްޔާތަކަށް ހުޅުވާލުން.

ރަޖިސްޓްރީ ވުމަށް: https://t.co/SrVWgBErk4 pic.twitter.com/EVfmwGDcWI

— Ministry of Youth Empowerment, Information and Art (@YouthGovMv) July 22, 2025

މީގެ އިތުރުން، ޖަމުޢިއްޔާތައް ގުޅިގެން މަސައްކަތްކުރުމަށް ބާރުއެޅުމާއި، ތަފާތު ތަޖުރިބާތައް ހިއްސާކޮށް، ދިމާވާ ދަތިތަކާ ގުޅޭގޮތުން މަޝްވަރާކޮށް، އެ މައްސަލަތަކަށް ހައްލު ހޯދޭނެ ގޮތްތަކާމެދު މަޝްވަރާކުރުމަކީވެސް މި ފޯރަމްގެ ބޭނުމެކެވެ.

ފޯރަމްގައި ބައިވެރިވުމަށް އެދި ހުށަހެޅުމުގެ ސުންގަޑިއަކީ މިމަހުގެ 31 ވާ ބުރާސްފަތި ދުވަހުގެ މެންދުރު 14:00 އެވެ. ވުޒާރާއިން ވިދާޅުވީ، މިއަހަރުގެ މި ފޯރަމްގައި 100-150 އާ ދެމެދުގެ އަދަދަކަށް ޖަމުޢިއްޔާތަކުން ބައިވެރިވުން އެދެވޭ ކަމަށެވެ. އެގޮތުން، މާލޭގެ ޖަމުޢިއްޔާތަކުގެ އިތުރުން، ކޮންމެ އަތޮޅަކުން 2 ޖަމުޢިއްޔާއަށް ފޯރަމްގައި ބައިވެރިވުމުގެ ފުރުސަތު ދިނުމަށް ވަނީ ހަމަޖެހިފައެވެ.