ނަފްސާނީ ޞިއްޙަތުގެ ހެލްޕްލައިނަށް މައްސަލައެއް ދިމާވެއްޖެ

ނަފްސާނީ ސިއްޙަތުގެ ހެލްޕްލައިނަށް ދިމާވި ޓެކްނިކަލް މައްސަލައަކާ ގުޅިގެން، ވަގުތީގޮތުން އެހެން ނަންބަރެއް މެދުވެރިކޮށް ޚިދުމަތް ކުރިއަށް ގެންދާނެ ކަމަށް ނެޝަނަލް މެންޓަލް ހެލްތު ޑިޕާޓްމަންޓުން މިއަދު ހާމަކޮށްފިއެވެ.

ނެޝަނަލް މެންޓަލް ހެލްތު ޑިޕާޓްމަންޓުން މިކަން އަންގާފައިވަނީ، ހެލްޕްލައިންގެ މައި ނަންބަރު 1677 އަށް ދިމާވެފައިވާ މައްސަލައާ ގުޅިގެންނެވެ. މި މައްސަލައާ ގުޅިގެން ނަފްސާނީ އެހީތެރިކަން ބޭނުންވާ ފަރާތްތަކަށް 7265402 ނަންބަރާ ގުޅުމަށް އެ ޑިޕާޓްމަންޓުން އަންގާފައިވެއެވެ.

އަދި ހެލްޕްލައިނަށް ދިމާވެފައިވާ މައްސަލަ ހައްލުކުރުމަށް މަސައްކަތްތަކެއް ކުރަމުންދާ ކަމަށާއި، މައްސަލަ ހައްލުވެ އަލުން ޚިދުމަތް އިއާދަ ކުރެވޭ ހިސާބުން އެކަން އާންމުކޮށް އަންގާނެ ކަމަށްވެސް އެ ޑިޕާޓްމަންޓުން ބުނެފައިވެއެވެ.

Due to a technical issue, the National Mental Health Helpline is temporarily unavailable. We are actively working to resolve the issue and will notify the public once the service is restored.

In the meantime, please contact us at 7265402 for immediate support and assistance. pic.twitter.com/GOiLxFRvPi

— National Mental Health Department (@nmhdmv) July 19, 2025

ފާއިތުވި 21 ފެބްރުއަރީ 2024 ގައި ތަޢާރަފްކުރެވުނު މި ހެލްޕްލައިންގެ މައިގަނޑު މަޤްޞަދަކީ ނަފްސާނީ ގޮތުން އުނދަގޫވާ އެކިއެކި ހާލަތްތަކުގައި އަދި ނަފްސާނީ ބަލި ހުންނަ އެކި އުމުރުފުރައިގެ މީހުންނަށް، 24 ގަޑިއިރު ނަފްސާނީ ފުރަތަމަ އެހީތެރިކަން ފޯރުކޮށްދިނުމެވެ.

ޞިއްޙަތާބެހޭ ވުޒާރާއިން ފާހަގަކުރި ގޮތުގައި، މި ހެލްޕްލައިނުން ނަފްސާނީ ޞިއްޙަތުގެ ފުރަތަމަ އެހީގެ އިތުރުން، މައްސަލަ ހައްލުކުރުމަށް އެހީތެރިވުމާއި މަޢުލޫމާތު ފޯރުކޮށްދިނުމާއި، ހެދިފައިވާ އުޞޫލުގެ ތެރެއިން ގުޅުންހުރި ޚިދުމަތްތަކަށް ރިފަރަލް ހެދުމުގެ ޚިދުމަތްވެސް ފޯރުކޮށްދެއެވެ.