މިއަހަރުގެ ކަނޑުގެ މަސައްކަތްތެރިންގެ ދުވަސް ފާހަގަކުރެވުނީ، އުޅަނދުފަހަރުގައި ފުރައްސާރައިން އެއްކިބާވެފައިވާ މާޙައުލަކަށް ގޮވާލަމުން

އިންޓަނޭޝަނަލް މެރިޓައިމް އޯގަނައިޒޭޝަން (އައި.އެމް.އޯ) އިން 2025 ވަނަ އަހަރުގެ ކަނޑުގެ މަސައްކަތްތެރިންގެ ދުވަސް ބައިނަލްއަޤްވާމީ ފެންވަރުގައި ފާހަގަކުރުމުގެ ރަސްމިއްޔާތުތައް ވަނީ ބާއްވާފައެވެ. މި މުނާސަބަތުގައި، ދުނިޔޭގެ އިޤްތިޞާދު ދެމެހެއްޓުމުގައި ކަނޑުގެ މަސައްކަތްތެރިންގެ އަގުހުރި ދައުރު ފާހަގަކުރެވުނެވެ.

ކޮންމެ އަހަރެއްގެ ޖޫން މަހުގެ 25 ވަނަ ދުވަހު ފާހަގަކުރާ މި ދުވަހުގެ މިއަހަރުގެ ޝިޢާރަކީ "މައި ހެރެސްމަންޓް-ފްރީ ޝިޕް" އެވެ. މި ޝިޢާރުގެ މަޤްޞަދަކީ ކަނޑުމަތީގައި ފުރައްސާރަކުރުމާއި ހަނގާކުރުން ނައްތާލުމުގެ މުހިންމުކަން އަލިއަޅުވާލުމާއި، ހުރިހާ ކަނޑުގެ މަސައްކަތްތެރިންނަށް ރައްކާތެރި އަދި އިޙްތިރާމް ލިބޭ މަސައްކަތުގެ މާޙައުލެއް ޤާއިމުކުރުމެވެ.  ރާއްޖޭގައި ވެސް މިދުވަސް ވަނީ މޯލްޑިވްސް ސްޓޭޓް ޝިޕިންގް ( އެމްއެސްއެސް) ގެ ފަރާތުން ފާހަގަކޮށްފައެވެ.

2010 ވަނަ އަހަރު އިޞްލާޙުކުރެވުނު އެސް.ޓީ.ސީ.ޑަބްލިއު މުޢާހަދާގެ ދަށުން ކަނޑައެޅުނު މި ދުވަހަކީ، ބައިނަލްއަޤްވާމީ ކަނޑުދަތުރުފަތުރުގެ ކަލަންޑަރުގައި ފާހަގަކޮށްލެވޭ ދުވަހަކަށް ވެފައިވެއެވެ. މި ދުވަހުގެ މަޤްޞަދަކީ ދުނިޔޭގެ ވިޔަފާރީގެ 90 އިންސައްތަ ކަނޑުމަގުން އުފުލާ ފިރިހެނުންނާއި އަންހެނުންގެ ޤުރުބާނީތަކާއި އަގުހުރި ޙިއްޞާ ފާހަގަކުރުމެވެ.

އައި.އެމް.އޯ ގެ 2025 ވަނަ އަހަރުގެ ކެމްޕޭނަކީ ވަރަށް މުހިންމު ކެމްޕޭނެކެވެ. އެއީ ކަނޑުދަތުރުފަތުރުގެ މަސައްކަތުގެ މާޙައުލުގައި ފުރައްސާރަކުރުމާއި ތަފާތުކުރުން އަދިވެސް ދެމިއޮތްކަން ހާމަކުރާ ރިޕޯޓުތަކާއި ދިރާސާތައް އިތުރުވަމުން އަންނާތީއެވެ. އައި.އެމް.އޯ އިން ފާހަގަކުރާ ގޮތުގައި "މައި ހެރެސްމަންޓް-ފްރީ ޝިޕް" މި ޝިޢާރަކީ ހަމައެކަނި ހޭލުންތެރިކަން އިތުރުކުރުމަށް ކަނޑައެޅުނު ޝިޢާރެއް ނޫނެވެ. އޭގެ އިތުރުން މުޅި ޞިނާޢަތުގައި ޙަޤީޤީ ބަދަލުތަކެއް ގެނައުމަށް ކަނޑައެޅުނު ޝިއާރެކެވެ.

މިއަހަރުގެ ފާހަގަކުރުންތަކުގެ ފާހަގަކޮށްލެވޭ ކަމަކީ އައު އިންޓަރެކްޓިވް ވޯލްޑް މެޕް އެއް ތަޢާރަފުކުރުމެވެ. މި މެޕް ފަރުމާކުރެވިފައިވަނީ މިދިދައިގެ ދަށުން މަސައްކަތްކުރާ ޤައުމުތަކުގައި ލިބެންހުރި ރިޕޯޓުކުރުމުގެ ނިޒާމުތަކާއި އެހީތެރިކަމުގެ ޚިދުމަތްތައް ދެނެގަތުމަށް ކަނޑުގެ މަސައްކަތްތެރިންނަށް މަގުފަހިކޮށްދިނުމަށެވެ. އައި.އެމް.އޯ އިން ވަނީ ޝިޕިންގ ކުންފުނިތަކާއި، ސަރުކާރުތަކާއި، ޔޫނިއަންތަކާއި، އަދި އުޅަނދުފަހަރުގެ ފަޅުވެރިންނަށް ކެމްޕޭނުގެ މެސެޖް ފެތުރުމުގައި އަމަލީގޮތުން ބައިވެރިވުމަށް ގޮވާލާފައެވެ. ޚާއްޞަކޮށް #MyHarassmentFreeShip ހޭޝްޓެގް ބޭނުންކޮށްގެންނެވެ.

މި މުނާސަބަތުގައި ވާހަކަދައްކަވަމުން، އައި.އެމް.އޯ ގެ ސެކްރެޓަރީ ޖެނެރަލް އަރސެނިއޯ ޑޮމިންގެޒް އުޅަނދުފަހަރުގައި ޤަދަރާއި އެކަކު އަނެކަކަށް އިޙްތިރާމްކުރުމުގެ ސަޤާފަތެއް އުފެއްދުމުގެ މުހިންމުކަން ފާހަގަކުރެއްވިއެވެ.

 "ކަނޑުމަތީގައި ފުރައްސާރަކުރުމަށް ޖާގައެއް ނެތް، ކޮންމެ އުޅަނދަކީވެސް ރައްކާތެރި އަދި އެކުލެވޭ ތަނަކަށް ވާންޖެހޭ. އެތަނުގައި ހުރިހާ ނަސްލެއްގެ ކަނޑުގެ މަސައްކަތްތެރިންނަށް ބިރުވެރިކަމެއް ނެތި މަސައްކަތްކުރެވޭ، އަދި އެމީހުން ޙިމާޔަތްކުރާ ނިޒާމުތަކަށް އިތުބާރުކުރެވޭ ތަނަކަށް ވާންޖެހޭ" އައި.އެމް.އޯ ގެ ސެކްރެޓަރީ ޖެނެރަލް އަރސެނިއޯ ޑޮމިންގެޒް
އައި.އެމް.އޯ އިން އިތުރަށް އިޢުލާނުކުރި ގޮތުގައި 2026 ވަނަ އަހަރުން ފެށިގެން، ފުރައްސާރަ ހުއްޓުވުމާ ގުޅޭ އައު ތަމްރީނުތައް ސްޓޭންޑަޑްސް އޮފް ޓްރެއިނިންގ، ސެޓިފިކޭޝަން އެންޑް ވޮޗްކީޕިންގ ފޮރ ސީފެއަރަރސް (އެސް.ޓީ.ސީ.ޑަބްލިއު) އާ އެއްކޮށްލެވޭނެއެވެ. މިއާއެކު މިފަދަ އިރުޝާދުތައް ދުނިޔޭގެ ޝިޕިންގ ޞިނާޢަތުގައި މަޖުބޫރު ކަމަކަށް ވެގެންދާނެއެވެ.

ބައިނަލްއަޤްވާމީ ކެމްޕޭނުގެ ބައެއްގެ ގޮތުން، ދުނިޔޭގެ އެކި ކަންކޮޅުތަކުގައި ހުރި ބަނދަރުތަކާއި، ޝިޕިންގ ކުންފުނިތަކާއި، ކަނޑުދަތުރުފަތުރުގެ އެކަޑަމީތަކުން ހޭލުންތެރިކަން އިތުރުކުރުމުގެ ސެޝަންތައް ބާއްވައި، ވީޑިއޯ މެސެޖުތައް ޙިއްޞާކޮށް، އަދި ކަނޑުދަތުރުފަތުރުގެ ވާހަކަތައް ފެތުރުމަށް މަސައްކަތްކޮށްފައިވެއެވެ. މިއީ މި ދުވަހުގެ މެސެޖްއަށް ބާރުއަޅައި ދިނުމަށްޓަކައެވެ. އައި.އެމް.އޯ އިން ވަނީ ޞިނާޢަތުގައި ހިމެނޭ އެންމެންނަށް އުޅަނދުފަހަރުގައި އިޙްތިރާމުގެ ސަޤާފަތެއް ދެމެހެއްޓުމަށް ވަކިވަކި ފަރުދުންގެ ހައިސިއްޔަތުންނާއި ޖަމާއަތެއްގެ ގޮތުން ފިޔަވަޅުތައް އެޅުމަށް ހިތްވަރުދީފައެވެ.

އައި.އެމް.އޯ އިން ޞިނާޢަތުގެ އެންމެހައި ފަރާތްތަކަށް ގޮވާލަނީ މި މުހިންމު މަސައްކަތް ކުރިއަށް ގެންދިއުމަށެވެ. އަދި ކޮންމެ ދުވަހަކީވެސް ކޮންމެ ކަނޑުގެ މަސައްކަތްތެރިއަކަށް އަގުވަޒަންކުރެވޭ، އަޑުއަހާ އަދި ރައްކާތެރިކަން އިޙްސާސްކުރެވޭ މާޙައުލަކާ ގާތްވަމުންދާ ދުވަހަކަށް ހެދުމަށެވެ.

މި އަހަރުގެ ކެމްޕޭނުގެ އަމާޒަކީ ހަމައެކަނި ހޭލުންތެރިކަން އިތުރުކުރުމަށްވުރެ ފުޅާ އަމާޒެކެވެ. އޭގެ ބަދަލުގައި، މިއީ ކަނޑުދަތުރުފަތުރުގެ ޞިނާޢަތުގައި ދެމެހެއްޓެނިވި ބަދަލުތަކެއް ގެނައުމަށް ކުރެވޭ މަސައްކަތެކެވެ. މީގެ ތެރޭގައި ފުރައްސާރަކުރުމާ ދެކޮޅަށް ހަރުދަނާ ސިޔާސަތުތައް ތަންފީޒުކުރުމާއި، ރިޕޯޓުކުރުމުގެ ނިޒާމުތައް ހަރުދަނާކުރުމާއި، އަދި ކަނޑުގެ މަސައްކަތްތެރިންނަށް އެކަށީގެންވާ އެހީތެރިކަމާއި ތަމްރީނު ފޯރުކޮށްދިނުން ހިމެނެއެވެ.

އައި.އެމް.އޯ އިން އިތުރަށް ބާރުއަޅަނީ ޝިޕިންގ ކުންފުނިތަކުން އެ ކުންފުނިތަކުގެ އުޅަނދުފަހަރުގައި ފުރައްސާރަކުރުމާ ދެކޮޅަށް "ޒީރޯ ޓޮލަރަންސް" ސިޔާސަތެއް ގެންގުޅުމަށެވެ. މީގެ އިތުރުން، ކަނޑުގެ މަސައްކަތްތެރިންނަށް އެމީހުންގެ ޙައްޤުތަކާއި ލިބެންހުރި އެހީތެރިކަމާ ބެހޭ މަޢުލޫމާތު ފޯރުކޮށްދިނުމަށް ބާރުއަޅައެވެ.