ޚަބަރު
މެދުއިރުމަތީގައި ދިރިއުޅޭ ދިވެހިން އެ ޤައުމުތަކުގެ ސަރުކާރުން ދޭ އިރުޝާދުތަކަށް ޢަމަލުކުރައްވާ: ޚާރިޖީ ވަޒީރު
ޚާރިޖީ ވަޒީރު ޢަބްދުﷲ ޚަލީލް. ފޮޓޯ: ވުޒާެރާ
މެދުއިރުމަތީގެ ސަރަޙައްދުގައި ހަމަނުޖެހުންތައް އިތުރުވަމުންދާ ދަނޑިވަޅެއްގައި، އެ ސަރަޙައްދުގައި ދިރިއުޅޭ އަދި ދަތުރުފަތުރުކުރާ ދިވެހިން އެ ޤައުމުތަކުގެ ސަރުކާރުތަކުން ދޭ އިރުޝާދުތަކަށް ފުރިހަމައަށް ޢަމަލުކުރުމަށް ޚާރިޖީ ވަޒީރު ޢަބްދުﷲ ޚަލީލް އިލްތިމާސްކުރައްވައިފިއެވެ.
މެދުއިރުމަތީގެ ސަރަޙައްދުގެ ހާލަތު ގޯސްވަމުންދާ ވަގުތެއްގައި، އެކްސް މެދުވެރިކޮށް ޚާރިޖީ ވަޒީރު ވިދާޅުވީ، މެދުއިރުމަތީގެ މަސްރަހު ހޫނުވެފައިވާ މިދަނޑިވަޅުގައި، އެ ސަރަޙައްދުގެ ޤައުމުތަކުގައި ދިރިއުޅޭ ދިވެހިންގެ ހާލަތު މިނިސްޓްރީން އަދި މިޝަންތަކުން ވަރަށްގާތުން ބަލަމުންދާ ކަމަށެވެ.
ޚާރިޖީ ވަޒީރު މިފަދައިން އިލްތިމާސް ކުރައްވައިފައިވަނީ އީރާނާއި އިޒްރާއިލާއި ދެމެދު ހިނގަމުންދިޔަ ހަނގުރާމައިގެ ތެރެއަށް އެމެރިކާއިން ވަދެ އީރާނަށް އެމެރިކާއިން ދިން ހަމަލާތަކާއި ގުޅިގެން އެމެރިކާއަށް އޭގެ ޖަވާބު ދިނުމަށް އީރާނުން ޤަޠަރުގައި ހުންނަ އެމެރިކާގެ ޢަސްކަރީ މަރުކަޒަކަށް ހަމަލާދިނުމާއި ގުޅިގެނެވެ.
މެދުއިރުމަތީގެ މަސްރަހު ހޫނުވެފައިވާ މިދަނޑިވަޅުގައި، އެ ސަރަޙައްދުގެ ޤައުމުތަކުގައި ދިރިއުޅޭ ދިވެހިންގެ ހާލަތު މިނިސްޓްރީން އަދި މިޝަންތަކުން މިދަނީ ވަރަށްގާތުން ބަލަމުން. މިވަގުތު މި ސަރަޙައްދުގެ ބައެއް ޤައުމުތަކުގެ ވައިގެ ސަރަހައްދު ބަންދުކޮށްފައިވުމާއެކު، މިޤައުމުތަކުގައި…
— Abdulla Khaleel (@abkhaleel) June 24, 2025
ޤަޠަރުގައި ހުރި އެމެރިކާގެ ޢަސްކަރީ މަރުކަޒަށް ދިން ހަމަލާއަށްފަހު މިހާރު ޢިރާޤުގައި ހުރި އެމެރިކާގެ ޢަސްކަރީ މަރުކަޒަކަށް އީރާނުން ހަމަލާ ދިންކަމަށްވެސް ޚަބަރުތައް ބުނަމުންދެއެވެ.
މި ހަމަލާތަކާ ގުޅިގެން ސަރަޙައްދުގެ ބައެއް ޤައުމުތަކުގެ ވައިގެ ސަރަޙައްދުތައް ވަނީ ބަންދުކޮށްފައެވެ.
މިކަމާއި ގުޅިގެން ޚާރިޖީ ވަޒީރު އިތުރަށް ވިދާޅުވީ، މި ސަރަޙައްދުގައި ދިރިއުޅުއްވާ އަދި މިވަގުތު ޒިޔާރަތްކުރައްވަމުން ގެންދަވާ ދިވެހި ރައްޔިތުން މިކަމަށް ޚާއްސަ ސަމާލުކަމެއް ދެއްވުމަށާއި، އެ ޤައުމުތަކުގެ ސަރުކާރުން ދެއްވާ އިރުޝާދުތަކާ އެއްގޮތަށް ޢަމަލުކުރެއްވުމަށެވެ.
މެދުއިރުމަތީގެ ސަރަޙައްދުގައި ދިމާވެފައިވާ ހަމަނުޖެހުންތަކާ ގުޅިގެން އެ ސަރަޙައްދުގައި ދިރިއުޅޭ ދިވެހިންގެ ރައްކާތެރިކަން ކަށަވަރުކުރުމަށް ސަރުކާރުން އަޅަންޖެހޭ ފިޔަވަޅުތައް އަޅަމުންދާކަން ޚާރިޖީ ވަޒީރު ވަނީ އިތުރަށް ފާހަގަކުރައްވައިފައެވެ.
