މާލޭގެ މަގުތަކުން ނަގާ ކުނި އުކާލުމަށް އަހަރަކު 60 މިލިޔަން ރުފިޔާ ޚަރަދުވޭ

 މާލޭ ސިޓީގެ މަގުތަކަށް އުކާފައި ހުންނަ ކުނިތައް ނަގައި، އެ ކުނިތައް އުކާލުމަށް އަހަރަކު 60 މިލިޔަން ރުފިޔާ ޚަރަދުވާކަމަށް މާލެ ސިޓީ ކައުންސިލްގެ ތަފާސް ހިސާބުތަކުން ދައްކައިފިއެވެ.

މާލެ ސިޓީ ކައުންސިލުން ވިދާޅުވީ، މާލޭގެ މަގުތަކަށް އަޅާފައި ހުންނަ ކުނިތަކަކީ މާލެ ސިޓީގައި ދިރިއުޅުއްވާ ފަރާތްތަކުން އެއްވެސް ވިސްނުމެއް ފިކުރެއް ނުކޮށް ކޮށްފައިވާ ކަމެއް ކަމަށެވެ.

މާލެ ސިޓީގެ މޭޔަރ އާދަމް ޢާޒިމް ވިދާޅުވީ، މާލޭގައި ދިރިއުޅުއްވާ ފަރާތްތަކަށް ރީތި އަދި ސާފު މާލެއެއް ހޯދައި ދިނުމަށް ސިޓީ ކައުންސިލުން ކުރައްވަމުން އަންނަ މަސައްކަތްތަކަށް ރައްޔިތުން އެއްބާރުލުން ދެއްވުމަކީ މުހިންމުކަމެއް ކަމަށެވެ. ހަމަ އެހެންމެ، މާލެ ސިޓީގެ މަގުތަކުން މިހާރު ވެސް ދުވާލަކަށް 30 ޓަނުގެ ކުނި ނަގާކަން ފާހަގަކުރައްވާ މޭޔަރ ޢާޒިމް ވަނީ، މަގުތަކަށް އެއްވެސް ފަރާތަކުން ކުނި ނޭޅުމަށް އިލްތިމާސް ކުރައްވާފައެވެ.

މީގެ އިތުރުން މޭޔަރ ވިދާޅުވީ، މާލޭގެ މަގުތަކުގައި ހުންނަ ގަސްބުޑުތަކަށާއި އެކި ބޭނުންތަކުގައި މަގު ފާރުތަކުގައި ހަރުކޮށްފައި ހުންނަ ފޮށިތަކުގެ މަތީގައި ކުނި ބަހައްޓާފައި ހުންނަކަން މިހާރު ވެސް ވަރަށް ބޮޑަށް ފާހަގަ ކުރެވޭ ކަމަށެވެ. އެހެންކަމުން، އެ ކަންކަން އެ ގޮތަށް ނުކުރެއްވުމަށް މާލޭގައި ދިރިއުޅޭ ހުރިހާ ރައްޔިތުންގެ ކިބައިން ވަރަށް އާދޭހާއެކު އެދޭ ކަމަށް މޭޔަރ ޢާޒިމް ވަނީ ވިދާޅުވެފައެވެ. އަދި މަގުތަކަށް ކުނި އެޅުމުގެ ބަދަލުގައި ކުނި އަޅަން ހުންނަ ޑަސްބިންތަކަށް ކުނިއެޅުމަކީ އާދައަކަށް ހެއްދެވުމަށް މޭޔަރ އެދިވަޑައިގެންނެވިއެވެ.

މޭޔަރ އިތުރަށް ވިދާޅުވީ، މަގުތަކަށް ކުނި އެޅުން ހުއްޓާލައިފިނަމަ މިކަމަށް ބޭނުންކުރަންޖެހޭ 60 މިލިޔަން ރުފިޔާއިން މާލެ ސިޓީގެ ޕާކުތަކާއި، މައިޒާންތަކާއި، މިސްކިތްތަކުގެ އާބާތުރަ ފިލުވުމުގެ މަސައްކަތް ކުރުމަށް މަގުފަހިވެގެންދާނެ ކަމަށެވެ. އަދި މިކަމަކީ މާލޭގައި ދިރިއުޅުއްވާ ރައްޔިތުންނަށް ހިތްހަމަޖެހުން ލިބިގެންދާނެ ކަމެއްކަން މޭޔަރ ވަނީ ފާހަގަކުރައްވާފައެވެ.