އިޒްރާއިލުން އިރާނަށް ދިން ހަމަލާ ރައީސް ޑރ މުޢިއްޒު ކުށްވެރިކުރައްވައިފި

އިޒްރާއިލުން އިސްލާމީ ޖުމްހޫރިއްޔާ އިރާނަށް ދިން ހަމަލާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ހަރުކަށި އިބާރާތުން ކުށްވެރިކުރައްވައިފިއެވެ.

އެކަމާ ގުޅޭ ގޮތުން ރައީސް އެކްސްގައި ކުރެއްވެވި ޕޯސްޓެއްގައި ވިދާޅުވެފައިވަނީި، މިފަދަ ޢަމަލުތަކަކީ ބައިނަލްއަޤްވާމީ ޤާނޫނުތަކާ ޚިލާފު ޢަމަލުތަކެއް ކަމަށާއި، މި ޢަމަލުތަކުގެ ސަބަބުން ސަރަޙައްދީ ސުލްޙަ އަމާންކަމަށް ނުރައްކާވެގެންދާނެ ކަމަށެވެ.

Strongly condemns the Israeli aggression against the Islamic Republic of Iran.

Such acts constitute a serious violation of international law and jeopardise regional peace and stability.

Urgent action must be taken to stop the escalation of tensions.

— Dr Mohamed Muizzu (@MMuizzu) June 13, 2025

"މި ސަރަޙައްދުގައި ހިނގަމުންދާ ހަނގުރާމަވެރި ޢަމަލުތައް ވަގުތުން ހުއްޓާލަން ޖެހޭ. އަދި ސަރަޙައްދުގެ ހަމަޖެހުމާއި ސުލްޙަ ޤާއިމްކުރުމަށް އަވަސް ފިޔަވަޅުތަކެއް އަޅަން އެބަޖެހޭ،" ރައީސް މުޢިއްޒު ވިދާޅުވިއެވެ.

މި ހަމަލާއާ ގުޅިގެން ސަރަޙައްދުގައި އިތުރަށް ހަނގުރާމަވެރި ޢަމަލުތައް ހިންގުމުގެ ބަދަލުގައި، ހުރިހާ ފަރާތްތަކުން ވެސް ވާހަކަ ދައްކައިގެން މައްސަލަ ހައްލުކުރުމަށް މަސައްކަތްކުރުމަށް ރައީސް މުޢިއްޒު ގޮވާލައްވާފައިވެއެވެ.

އިޒްރާއިލުން އިރާނަށް ދިން މި ހަމަލާއަކީ މެދުއިރުމަތީގެ ސަރަޙައްދުގައި ހިނގަމުންދާ ހަނގުރާމަވެރި ޢަމަލުތައް އިތުރަށް ގޯސްވެގެން ދިއުމަށް މަގުފަހިވެދާނެ ކަމެއް ކަމަށް ބައިނަލްއަޤްވާމީ މުޖުތަމަޢުން ވެސް ވަނީ ކަންބޮޑުވުން ފާޅުކޮށްފައެވެ.