ފަތުރުވެރިކަމުގެ ދާއިރާގެ ޚިދުމަތްތެރިއެއް ކަމުގައިވާ ސަންލޭންޑް ނަޒީރު އަވަހާރަވެއްޖެ

ރާއްޖޭގެ ފަތުރުވެރިކަމުގެ ދާއިރާއަށް މުހިންމު ޚިދުމަތްތަކެއް ކުރެއްވި މުޙައްމަދު ނަޒީރު (ސަންލޭންޑް ނަޒީރު) އަވަހާރަވެއްޖެއެވެ. 

ސަންލޭންޑު ނަޒީރު އަވަހާރަވީ، އާލާސްކަންފުޅަށް ފަރުވާހޯއްދަވަމުން ގެންދަވަނިކޮށް އިނގިރޭސިވިލާތުގައެވެ. ނަޒީރަކީ އިނގިރޭސިވިލާތަށް ރާއްޖެއިން ކަނޑައަޅާފައި ހުންނަ ޓްރޭޑް އެމްބެސެޑަރު ވެސް މެއެވެ. 

ނަޒީރު އަވަހާރަވުމާ ގުޅިގެން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ އެ މަނިކުފާނުގެ އާއިލާއަށް ތަޢުޒިޔާ ފޮނުއްވާފައެވެ. 

إِنَّا ِللهِ وَإِنَّآإِلَيْهِ رَاجِعُون

އިނގިރޭސި ވިލާތުގައި ހުންނަ ދިވެހި ހައިކޮމިޝަންގެ ޓްރޭޑް ރެޕްރެޒެންޓެޓިވް، އަދި ފަތުރުވެރިކަމާއި ވިޔަފާރީގެ ދާއިރާގައި ބޮޑެތި ޚިދުމަތްތަކެއް ޤައުމަށް ކުރައްވާފައިވާ، މުޙައްމަދު ނަޒީރު (ސަންލޭންޑް ނަޒީރު) އަވަހާރަވުމުގެ ހިތާމައިގާ… pic.twitter.com/0wNZwtRxD5

— Dr Mohamed Muizzu (@MMuizzu) May 11, 2025

ސަންލޭންޑް ހޮޓެލްސްގެ "ކޮކޯ ކަލެކްޝަން ރިޒޯޓް ބްރޭންޑްސް"ގެ ޑިރެކްޓަރ ނަޒީރަކީ މާކެޓިންގެ ދާއިރާއިންވެސް ތަޖުރިބާކާރު ބޭފުޅެކެވެ. އޭނާ ވަނީ ރާއްޖޭގެ ފަރުރުވެރިކަމުގެ ދާއިރާ ކުރިއެރުވުމަށް ވެސް މުހިންމު ގިނަ މަސައްކަތްތަކެއް ކުރައްވާފައެވެ. 1976 ގައި ރާއްޖެއަށް ބެކްޕެކް އަޅައިގެން ޑައިވިންއަށް ފަތުރުވެރިން އަންނަމުންދިއަ ޒަމާނުގައި، އޭނާގެ ޢާއިލީ ޓްރެވަލް އެޖެންސީއެއް "ސަންލޭންޑް" ނަމުގައި ހުޅުވައިގެން ރާއްޖެ މާކެޓްކުރަން ވަނީ ފަށާފައެވެ.

ނަޒީރަކީ ކުރީގެ އިސްލާމިކް މިނިސްޓަރު މަރުހޫމް ޑރ. އަބްދުލް މަޖީދު އަބްދުލްބާރީގެ އެއްބަނޑުއެއްބަފާ ބޭބެއެވެ.