1448 ވަނަ އަހަރުގެ ޙައްޖުގެ ޚިދުމަތްތަކާއި ގުޅޭ އެއްބަސްވުމުގައި ސޮއިކޮށްފި

1448 ވަނަ އަހަރުގެ ޙައްޖު މޫސުމުގައި ދިވެހި ޙައްޖާޖީންނަށް ޚިދުމަތްތައް ފޯރުކޮށްދިނުމާއި ގުޅޭ ރަސްމީ އެއްބަސްވުމުގައި ދިވެހިރާއްޖޭގެ އިސްލާމީ ކަންތައްތަކާ ބެހޭ ވުޒާރާއާއި ސަޢޫދީ ޢަރަބިއްޔާގެ މިނިސްޓްރީ އޮފް ޙައްޖު އެންޑް ޢުމްރާއާ ދެމެދު ސޮއިކޮށްފިއެވެ.

މި އެއްބަސްވުމުގައި ސޮއިކޮށްފައި ވަނީ މިހާރު ކުރިއަށްދާ ޙައްޖު ކޮންފަރެންސް 2026 ގެ ހަވާސާގައެވެ. ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ އިސްލާމީ ކަންތައްތަކާ ބެހޭ ވުޒާރާގެ ޑެޕިއުޓީ މިނިސްޓަރ އަލްފާޟިލް ޢުޞާމް މުޙައްމަދު ސަޢީދެވެ. އަދި ސަޢޫދީ ސަރުކާރުގެ ފަރާތުން ސޮއިކުރެއްވީ އެ ޤައުމުގެ ޑެޕިއުޓީ މިނިސްޓަރ އޮފް ޙައްޖު އެންޑް ޢުމްރާ ޑރ. ޢަބްދުލްފައްތާޙް މަޝާޠެވެ.

މި އެއްބަސްވުމުގެ ސަބަބުން 1448 ވަނަ އަހަރުގެ ޙައްޖު މޫސުމުގައި ދިވެހި ޙައްޖުވެރިންނަށް ބޭނުންވާ އެކިއެކި އިންތިޒާމުތަކާއި ޚިދުމަތްތައް ފުރިހަމައަށް ހަމަޖެއްސުމަށް މަގުފަހިވެގެންދާނެ ކަމަށް އިސްލާމީކަންތައްތަކާއި ބެހޭ ވުޒާރާއިން ވިދާޅުވެއެވެ.

މި ކޮންފަރެންސްގެ ތެރެއިން ޑެޕިއުޓީ މިނިސްޓަރ ޢުޞާމް މުޙައްމަދު ސަޢީދު ވަނީ ސަޢޫދީ ޢަރަބިއްޔާގެ މިނިސްޓަރ އޮފް ޙައްޖު އެންޑް ޢުމްރާ ޑރ. ތައުފީޤު ބިން ފައުޒާން އަލްރަބީޢާ އާ ވެސް ބައްދަލުކުރައްވާފައެވެ.

The Hajj Agreement for the 1448 AH season was signed between the Ministry of Islamic Affairs and Awqaf of the Maldives and the Ministry of Hajj and Umrah of Saudi Arabia. The agreement was signed by Mr. Usam Mohamed Saeed, Deputy Minister of Islamic Affairs, and H.E. Dr. Abdul Fattah Mashat, Deputy Minister of Hajj and Umrah of Saudi Arabia.

— Ministry of Islamic Affairs & Endowments (@MVIaffairs) November 14, 2026

ދިވެހި ޙައްޖާޖީންގެ އިންތިޒާމްތައް ހަރުދަނާކުރުމަށް ދިވެހި ސަރުކާރުން އަބަދުވެސް ގިނަ މަސައްކަތްތަކެއް ކުރައްވައެވެ. އެގޮތުން، ދިވެހިރާއްޖެއިން އަންނަ އަހަރަށް ތައްޔާރުވަމުން އަންނައިރު ޙައްޖު ކިޔޫގައި 3 އަހަރުވެފައިވާ ޢުމުރުން 70 އަހަރުން މަތީގެ އެންމެނަށް 1448 ވަނަ އަހަރު ޙައްޖުވުމަށް ފުރުސަތުދިނުމަށް ވަނީ ނިންމާފައެވެ.