ދުވާފަރުގައި ހިންގި އޮޕަރޭޝަނެއްގައި 50 އަށް ވުރެ ގިނަ ބިދޭސީން އިމިގްރޭޝަނަށް

ޤަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމުގެ ގޮތުން އުފައްދާފައިވާ ޓާސްކު ފޯހުން ރ. ދުވާފަރުގައި އިއްޔެ ރެއިޑް އޮޕަރޭޝަނެއް ހިންގައިފިއެވެ. އަދި މި އޮޕަރޭޝަނުގައި މޯލްޑިވްސް އިމިގްރޭޝަނުގެ ބެލުމުގެ ދަށަށް 50 އަށް ވުރެ ގިނަ ބިދޭސީން ވަނީ ގެންގޮސްފައެވެ.

އިމިގްރޭޝަނުން ހާމަކޮށްފައިވާ ގޮތުގައި މި އޮޕަރޭޝަން ހިންގާފައިވަނީ އެ ރަށު ކައުންސިލްގެ އެއްބާރުލުމާއެކުއެވެ. އަދި އިއްޔެ ހެނދުނު 8:00 ގައި ފެށި މި އޮޕަރޭޝަން، ހަވީރު 05:45 އަށް ދިގުލައި ދިޔަކަމަށް ވެސް އެ އިދާރާއިން ވަނީ ހާމަކޮށްފައެވެ.

މި އޮޕަރޭޝަނުގައި އެ ރަށުގައި އުޅުނު 100 އަށް ވުރެ ގިނަ ބިދޭސީން ވަނީ ބަލާފާސްކޮށްފައެވެ. އަދި އޭގެ ތެރެއިން 51 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފައި ވެއެވެ. 

ގަވާއިދާ ހިލާފަށް ރާއްޖޭގައި އުޅޭ ބިދޭސީން ހޯދުމަށް، ރ. ދުވާފަރުގައި އިއްޔެ ޓާސްކް ފޯސްއިން ވަނީ ހާއްސަ ރެއިޑް އޮޕަރޭޝަނެއް ކުރިއަށް ގެންގޮސްފައި. ދުވާފަރު ކައުންސިލްގެ އެއްބާރުލުމާއެކު ހެނދުނު 8:00 އިން ހަވީރު 5:45 އަށް ކުރިއަށް ގެންދެވުނު މި ރެއިޑު އޮޕަރޭޝަންގައި 100 އަށްވުރެ… pic.twitter.com/Epli5qMxrM

— Maldives Immigration (@ImmigrationMV) April 24, 2025

ޓާސްކު ފޯސްއިން ސިލްސިލާކޮށް ހިންގަމުންދާ މި އޮޕަރޭޝަންތަކުގައި ޤަވާއިދާ ޚިލާފަށް ރާއްޖޭގައި އުޅެމުންދާ ގިނަ އަދަދެއްގެ ބިދޭސީން ވަނީ ހޯދާފައެވެ. އަދި އިމިގްރޭޝަނުގެ ބެލުމުގެ ދަށުން، އެމީހުން އަނބުރާ ޤައުމަށް ފޮނުވާލުމުގެ މަސައްކަތް ވެސް ދަނީ ކުރިޔަށެވެ.

މާލެއިން ބޭރުގައި އެންމެ ފަހުން މިފަދަ އޮޕަރޭޝަނެއް ހިންގާފައި ވަނީ ކ. ގުރައިދޫގައެވެ. މިދިޔަ އަހަރުގެ އޮކްޓޫބަރު މަހު ހިންގި އެ އޮޕަރޭޝަނުގައި 39 ބިދޭސީއަކު ވަނީ އިމިގްރޭޝަނުގެ ބެލުމުގެ ދަށަށް ގެންގޮށްފައެވެ.