ޒުވާނުންގެ ޤައުމީ ލަފާދޭ ކޮމެޓީގެ ރައީސްގެ މަޤާމުން ދާވޫދު ވަކިކުރައްވައިފި

ދިވެހި ޒުވާނުންގެ ލަފާދޭ ކޮމެޓީގެ ރައީސްގެ މަޤާމުގައި ހުންނެވި ދާވޫދު އަޙުމަދު އެ މަޤާމުން މިއަދު ވަކިކުރައްވައިފިއެވެ. 

ދަވޫދު މި މަޤާމުން ވަކިކުރެއްވީ އެ ކޮމެޓީން އިސްތިއުފާ ދެއްވުމަށް ދާވޫދު ހުށަހެޅުމުންކަމަށް، ރައީސުލްޖުމްހޫރިއްޔާގެ އޮފީހުގެ ތަރުޖަމާނު، ޙީނާ ވަލީދު ވަނީ ހާމަކުރައްވާފައެވެ. 

"ދިވެހި ޒުވާނުންގެ ޤައުމީ ލަފާދޭ ކޮމިޓީ"ގެ ރައީސް ކަމުގެ މަގާމުގައި ހުންނެވި ދާއޫދު އަޙްމަދު، އެ ކޮމިޓީއިން އިސްތިޢުފާ ދެއްވުމަށް ހުށަހެޅުއްވުމާއި ގުޅިގެން، ރައީސުލްޖުމްހޫރިއްޔާ އެ ކޮމިޓީއިން މިއަދު އޭނާ ވަކިކުރައްވައިފި.

— Heena Waleed (@MvSpokesperson) April 24, 2025

ދާވޫދު މި މަޤާމަށް އައްޔަނު ކުރެވުނީ މިދިޔަ އަހަރުގެ އޯގަސްޓު މަހުގެ 12 ވަނަ ދުވަހެވެ. 

ހަމައެއާއެކު، ދާވޫދު އަޙުމަދު ފުރުއްވަމުން ގެންދެވި، ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓެރީ ފޮރ ޑިޖިޓަލް ސްޓްރެޓެޖީގެ މަގާމުން އޭނާ ވަނީ މުސާރަ ނުލިބޭ ގޮތަށް މިއަދުން ފެށިގެން ސަސްޕެންޑްކޮށްފައެވެ.

މީގެ އިތުރުން، ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓެރީ ފޮރ ސްޓްރެޓެޖިކް ކޮމިޔުނިކޭޝަން މަގާމުގައި ހުންނެވި އިޒްދިޔާން މުޙައްމަދު މައުމޫން ވެސް ވަނީ މިއަދު މަޤާމުން ވަކިކުރައްވާފައެވެ.

ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓެރީ ފޮރ ސްޓްރެޓެޖިކް ކޮމިޔުނިކޭޝަން މަގާމުގައި ހުންނެވި އިޒްދިޔާން މުޙައްމަދު މައުމޫން، އެ މަގާމުން މިއަދު ވަކިކުރައްވައިފި.

— Heena Waleed (@MvSpokesperson) April 24, 2025

މި ދެ ބޭފުޅުން ވެސް އެ ބޭފުޅުންގެ މަޤާމުތަކުން ވަކިކޮށްފައި މިވަނީ، މިދިޔަ ހުކުރު ދުވަހުގެރޭ މާލޭގެ ގެއެއްގެ ފުރާޅުމައްޗަށް އަންހެނަކު ވެއްޓިފައި އޮތް މައްސަލައާ ގުޅިގެންކަމަށް "ފަރުދުން" އަށް ވަނީ މަޢުލޫމާތު ލިބިފައެވެ.