އަންނަ އާދީއްތަ ދުވަހުން ފެށިގެން ކަނޑުމަތީގައި ޢަސްކަރީ ތަމްރީނުތަކެއް ކުރިއަށްގެންދާނެ: ޢަސްކަރިއްޔާ

އަންނަ އާދީއްތަ ދުވަހުން ފެށިގެން ކަނޑުމަތީގައި ޢަސްކަރީ ތަމްރީނު ތަކެއް ކުރިއަށްދާނެ ކަމަށް ދިވެހި ޤައުމީ ދީފާޢީ ބާރުން ބުނެފިއެވެ.

މި ތަމްރީންތައް ކުރިއަށް ގެންދިޔުމަށް ހަމަޖެހިފައިވަނީ އަންނަ އާދިއްތަ ދުވަހުން ފެށިގެން ބުރާސްފަތިދުވަހާ ހަމައަށް ކޮންމެ ދުވަހަކު 6:00 އިން 17:30 އަށެވެ. ދިވެހި ޤައުމީ ދިފާއީ ބާރުން ބުނީ މި ތަމްރީންތައް ކުރިއަށް ގެންދިޔުމަށް ހަމަޖެހިފައިވަނީ ހުޅުމާލޭގެ އިރުން 7 ނޯޓިކަލް މޭލު ބޭރުން ކަނޑުމަތީގައި ކަމަށެވެ.

މި ތަމްރީނުތަކުގައި ބޭނުންކުރާ ބަޑީގެ ވަޒަން ދަތުރުކުރާނީ ހުޅުމާލޭގެ އިރުން 7 ނޯޓިކަލް މޭލު ބޭރުން 5000 މީޓަރ ދުރުމިނަށް ކަމަށާއި ވަޒަން ދަތުރުކުރާނެ އުސްމިނަކީ 300 މީޓަރުކަމަށްވެސް ބުނެފައިވެއެވެ.

އެއިދާރާއިން ވަނީ ކަނޑުމަތީގައި ހިންގާ މި ތަމްރީނުތައް ކުރިއަށް ގެންދާތީ ކަނޑުދަތުުރު ކުރައްވާ އުޅަނދުތަކުން ސަމާލުވުމަށް އިލްތިމާސް ކުރައްވައިފައެވެ.