ގއ. ގެމަނަފުށީ ފުޓުބޯޅަ ދަނޑު ތަރައްޤީކުރުމުގެ އެއްބަސްވުމުގައި ސޮއިކޮށްފި

ގއ. ގެމަނަފުށީ ފުޓުބޯޅަ ދަނޑު ތަރައްޤީކުރުމުގެ މަޝްރޫޢުގެ އެއްބަސްވުމުގައި އެސް.އޭ.އެން.އެން އިންޓަނޭޝަނަލް ޕްރައިވެޓް ލިމިޓެޑާއެކު ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވުޒާރާއިން ސޮއިކޮށްފިއެވެ.

މި އެއްބަސްވުމުގައި ކުޅިވަރާ ބެހޭ ވުޒާރާގެ ފަރާތުން ސޮއިކުރެއްވީ، ޑެޕިއުޓީ މިނިސްޓަރު މުޙައްމަދު ކިނާނެވެ. އަދި އެސް.އޭ.އެން.އެން އިންޓަނޭޝަނަލްގެ ފަރާތުން ސޮއިކުރެއްވީ، އެ ކުންފުނީގެ ޑިރެކްޓަރު ސަބާހު މުޙައްމަދެވެ.

ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވުޒާރާއިން ހާމަކުރި ގޮތުގައި، މި މަޝްރޫޢަކީ ރަށްރަށުގެ ކުޅިވަރުގެ ވަސީލަތްތައް ތަރައްޤީކުރުމަށް ސަރުކާރުން ކުރިއަށްގެންދާ މަސައްކަތްތަކުގެ ތެރެއިން ކުރިއަށްގެންދެވޭ މުހިންމު މަޝްރޫޢެކެވެ.

ގއ. ގެމަނަފުށި ފުޓުބޯޅަދަނޑު ތަރައްޤީކުރުމުގެ އެއްބަސްވުމުގައި އެސް.އޭ.އެން.އެން އިންޓަނޭޝަނަލް ޕްރައިވެޓް ލިމިޓެޑްއާއި އެކު މިއަދު ވަނިީ ސޮއިކުރެވިފައި. މި އެއްބަސްވުމުގައި ކުޅިވަރާ ހަށިހެޔޮކަމާ ބެހޭ ވުޒާރާގެ ފަރާތުން ސޮއިކުރެއްވީ ޑެޕިއުޓީ މިނިސްޓަރ މުޙައްމަދު ކިނާން. އަދި އެސް.އޭ.އެން.އެންގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރ ސަބާހު މުޙައްމަދު

— Ministry of Youth Empowerment, Sports and Fitness (@MoYSF_mv) November 10, 2026

ޒުވާނުންނަށާއި ކުޅިވަރަށް ލޯބިކުރާ ފަރާތްތަކަށް ފެންވަރު ރަނގަޅު ވަސީލަތްތަކާއެކު ފުޓްބޯޅަ ދަނޑެއް ފޯރުކޮށްދީ، ރަށު ފެންވަރުގައްޔާއި އަތޮޅު ފެންވަރުގައި ކުޅިވަރު ކުރިއެރުވުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ރާއްޖޭގެ އެކި ސަރަޙައްދުތަކުގައި ފުޓްސަލް ދަނޑުތައް އެޅުމާއި، މިހާރު ޤާއިމުކޮށްފައިވާ ދަނޑުތަކުގެ ޓާފް މަރާމާތުކުރުމާއި އައު ކުރުމުގެ މަސައްކަތްތައް އެކި ކުންފުނިތަކާ ޙަވާލުކޮށްގެން ދަނީ ހިންގަމުންނެވެ.

މީގެއިތުރުން، ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް ރާއްޖޭގެ އެކި ކަންކޮޅުތަކުގައި މީގެކުރިން ހުއްޓިފައި ހުރި ކުޅިވަރު މަޝްރޫޢުތައް އަލުން ފަށައި، ހަލުވި ދުވެއްޔެއްގައި ނިންމުމަށް ސަރުކާރުން ޚާއްޞަ އިސްކަމެއް ދީގެން އަންނަނީ މަސައްކަތް ކުރަމުންނެވެ.