ފިނިކުރާ ނިޒާމުތައް ހަކަތައަށް އެފިޝަންޓް ކުރަންޖެހޭ ކަމަށް ސްޓޭޓް މިނިސްޓަރު ފާރިސް ވިދާޅުވެއްޖެ

ހައިޑްރޯފްލޯރޯކާބަންސް (އެޗް.އެފް.ސީ) ބޭނުންކުރާ މިންވަރު މަދުކުރުމަށް ކުރެވޭ މަސައްކަތްތަކާއެކު، ފިނިކުރާ ނިޒާމުތަކުގައި ހަކަތަ ބޭނުންކުރެވޭ މިންވަރު ރަނގަޅުކުރުމުގެ މަސައްކަތް ވެސް އެކުއެކީގައި ކުރިއަށްދާންޖެހޭ ކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާގެ ސްޓޭޓް މިނިސްޓަރު އަލީ ފާރިސް ވިދާޅުވެއްޖެއެވެ. 

ސްޓޭޓް މިނިސްޓަރު މިފަދައިން ވިދާޅުވީ ދާދިފަހުން ބޭއްވުނު "ފްރެންޑްސް އޮފް ދަ ކިގާލީ އެމެންޑްމަންޓް މިނިސްޓީރިއަލް ބްރެކްފަސްޓް" ބައްދަލުވުމުގައި ވާހަކަފުޅު ދައްކަވަމުންނެވެ.

މި ބައްދަލުވުމުގައި ވާހަކަފުޅު ދައްކަވަމުން އަލީ ފާރިސް ވިދާޅުވީ، މޫސުމަށް އަންނަ ބަދަލުތަކުން ލިބޭ ގެއްލުންތައް ކުޑަކުރުމަށް އެންމެ ފުރިހަމަ ފައިދާއެއް ހޯދޭނީ އެޗް.އެފް.ސީ ފަދަ ގެދަނބުޅި ގޭސްތައް ބޭނުންކުރުން މަދުކުރުމުގެ އިތުރުން، ފިނިކުރުމަށް ބޭނުންކުރާ ވަސީލަތްތަކަކީ މަދު ހަކަތައަކުން ބޮޑު ނަތީޖާއެއް ނެރެދޭ ތަކެތި ކަމުގައި ހަދައިގެން ކަމަށެވެ.

Speaking at the Friends of the Kigali Amendment Ministerial Breakfast, State Minister Ali Faris stressed that efforts to phase down HFCs must go hand in hand with improvements in cooling energy efficiency to maximize climate benefits while ensuring cooling remains accessible. https://t.co/pTsqBnJ8iL

— Min. of Climate Change, Environment and Energy, MV (@MoEnvmv) November 7, 2026

މީގެއިތުރުން، މި ބަދަލުތައް ގެންނައިރު އެންމެންނަށް ވެސް އަތްފޯރާ އަގެއްގައި ފިނިކުރާ ނިޒާމުތައް ލިބެންހުރުމުގެ މުހިންމުކަން ވެސް ސްޓޭޓް މިނިސްޓަރުގެ ވާހަކަފުޅުގައި ފާހަގަކުރެއްވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ތިމާވެށި ރައްކާތެރިކުރުމަށާއި، ދުނިޔޭގެ ފިނިހޫނުމިން މައްޗަށް ދިޔުން ހުއްޓުވުމަށް ބައިނަލްއަޤްވާމީ ފެންވަރުގައި ކުރެވޭ މިފަދަ މަސައްކަތްތަކުގައި ދިވެހިރާއްޖެއިން އިސްނަގައިގެން އަބަދުވެސް ވަކާލާތުކުރަމުން ގެންދާނެ ކަމުގެ ޔަޤީންކަން މި ބައްދަލުވުމުގައި ވަނީ ދެއްވާފައެވެ.