މީރާއަށް ޓެކްސް ނުދައްކާ 33 ފަރާތެއްގެ ނަން ހާމަކޮށްފި

ދައްކަންޖެހޭ ޓެކްސް ފައިސާ ދެއްކުމަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ދިން މުއްދަތުގައި އެކަން ކޮށްފައިނުވާ 33 ފަރާތެއްގެ މަޢުލޫމާތު އެ އޮތޯރިޓީން ހާމަކޮށްފިއެވެ.

މީރާއިން ވިދާޅުވި ގޮތުގައި މި ލިސްޓުގައި ހިމެނެނީ، ނުދައްކާ ޓެކުހުގެ ޖުމުލަ އަދަދު 1،000،000 ދިވެހި ރުފިޔާއަށްވުރެ އިތުރުވެފައިވާ ފަރާތްތަކެވެ.

މީރާއިން ހާމަކުރި ގޮތުގައި، މި ފިޔަވަޅު އަޅާފައިވަނީ "ޓެކްސް ބަޔާން ހުށަނާޅާ ފަރާތްތަކުގެ ނަން ހާމަކުރުމުގައި ޢަމަލުކުރާނެ ގޮތުގެ އުސޫލު" އާ އެއްގޮތްވާ ގޮތުގެ މަތިންނެވެ. މީގެއިތުރުން، އެ ފަރާތްތަކުގެ ވަނަވަރު ހާމަކުރުމުގެ ކުރިން ފޯނު ކޯލްތަކާއި މެސެޖު މެދުވެރިކޮށް ވެސް އަންގަންޖެހޭ އެންގުންތައް އަންގާފައިވާ ކަމަށް އެ އޮތޯރިޓީން ފާހަގަކުރިއެވެ. މިގޮތުން ޤާނޫނީ ގޮތުން ލިބޭނެ އަދަބުތަކާއި އެޅޭނެ ފިޔަވަޅުތަކުގެ ތަފްސީލު ވަނީ އެ ފަރާތްތަކާ ހިއްސާކޮށްފައެވެ.

The list of taxpayers with outstanding assessed tax liabilities exceeding MVR 1,000,000, is now available on MIRA's website: https://t.co/gxGx6VIEXV pic.twitter.com/oVBBLoaQ1X

— Maldives Inland Revenue Authority (@MIRAmaldives) September 21, 2026

ދައުލަތަށް ލިބެންޖެހޭ ޓެކުހުގެ ފައިސާ ހޯދުމުގެ މަސައްކަތުގައި، އެ އޮތޯރިޓީގެ އެންފޯސްމަންޓް ސިޔާސަތުގެ ދަށުން އަޅަންކަނޑައެޅިފައިވާ އެންމެހައި ފިޔަވަޅުތައް ވަކި ފަރާތަކަށް ބެލުމެއްނެތި ތަންފީޒުކުރަމުން ގެންދާނެ ކަމަށް މީރާއިން ބަޔާންކުރެއެވެ. އެހެންކަމުން، މިހާތަނަށް ޓެކްސް ބަޔާން ހުށަނާޅައިވާ ފަރާތްތަކުން ވީ އެންމެ އަވަހަކަށް އެ ބަޔާންތައް ހުށަހެޅުމަށާއި، އަދި ދައްކަންޖެހި ނުދައްކައި ހުރި ފައިސާ އަވަހަށް ދައްކައި ޚަލާޞްކުރުމަށް އެ އޮތޯރިޓީން ވަނީ އަންގާފައެވެ.

ނިމިދިޔަ މަހުގެ މާލީ ހިސާބުތައް ދައްކާގޮތުން، ދައުލަތަށް ލިބެންޖެހޭ ފައިސާ ހޯދުމުގެ ތެރެއިން އެ މަހުގެ ތެރޭގައި އެކަނިވެސް 497 މިލިއަން ރުފިޔާ ވަނީ ހޯދިފައެވެ. މިއީ އެ މަހު މީރާއަށް ލިބުނު މުޅި ޖުމްލަ އާމްދަނީގެ 3.01 އިންސައްތައެވެ.