ޑައިވިންގގެ ކުއްލި ހާދިސާތަކުގައި ބޭނުންކުރުމަށް އެމްއެންޑީއެފަށް ޔުނިޓެއް ހަދިޔާކޮށްފި

ޑައިވިންގ ހާދިސާތަކާއި އެ ނޫންވެސް ސިއްޙީ ކުއްލި ނުރައްކަލުގެ ހާލަތްތަކުގައި ބޭނުންކުރުމަށްޓަކައި، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އަށް "ޕޯޓަބަލް ހައިޕަރބެރިކްސް ޓްރާންސްޕޯޓް ޔުނިޓެއް" ހަދިޔާކޮށްފިއެވެ.

މި ޔުނިޓު އެމްއެންޑީއެފަށް ހަދިޔާކޮށްފައިވަނީ "ހައިޕަބެރިކްސް ޔޫރަޕް" ގެ ފަރާތުންނެވެ. އެ ކުންފުނިން ވެދިން ދީލަތި އެހީތެރިކަން ފާހަގަކޮށް، އެމްއެންޑީއެފްގެ ފަރާތުން ވަނީ އެ ކުންފުންޏަށް ޚާއްޞަ ޝުކުރެއް އަދާކުރައްވާފައެވެ.

MNDF extends sincere gratitude to Hyperbarics Europe for the generous assistance in providing a portable hyperbaric transport unit to MNDF. @CDFofMNDF formally received the unit today at the Integrated Headquarters. pic.twitter.com/7K0nBRo6ZF

— Maldives National Defence Force (@MNDF_Official) August 23, 2026

މިކަމަށްޓަކައި އެމްއެންޑީއެފް އިންޓަގްރޭޓެޑް ހެޑްކުއާޓާޒުގައި ބޭއްވި ޚާއްޞަ ރަސްމިއްޔާތެއްގައި، ދިވެހި އަސްކަރިއްޔާގެ ފަރާތުން މި ޔުނިޓާ ރަސްމީކޮށް ހަވާލުވެވަޑައިގަތީ ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީއެވެ.

ޕޯޓަބަލް ހައިޕަބެރިކް ޓްރާންސްޕޯޓް ޔުނިޓަކީ ޑައިވިންގ ކުއްލި ހާދިސާތަކާއި އެ ނޫންވެސް ސިއްޙީ ކުއްލި ނުރައްކަލުގެ ހާލަތްތަކުގައި އަނިޔާވާ މީހުންނާއި ބަލިމީހުން އެއްތަނުން އަނެއްތަނަށް ގެންދިއުމުގައި، ޕްރެޝަރ ޗެމްބަރެއްގެ ގޮތުގައި ފުރާނަ ސަލާމަތްކުރުމަށް ބޭނުންކުރެވޭ ވަރަށް މުހިންމު އަދި ޒަމާނީ ވަސީލަތެކެވެ.

މިއީ ރާއްޖެ ފަދަ ކަނޑުގެ ސަރަޙައްދު ބޮޑު، އަދި ޑައިވިންގގެ ގިނަ ހަރަކާތްތަކެއް ހިނގާ ޤައުމެއްގައި ސިފައިން ހިންގާ ސަލާމަތީ، އިމަޖެންސީ އަދި މީހުން ސަލާމަތްކުރުމުގެ އޮޕަރޭޝަންތަކަށް ލިބިގެންދިޔަ ވަރަށް ބޮޑު ކުރިއެރުމެކެވެ.