ގިނަ ދާއިރާތަކަކުން ގުޅިގެން މަސައްކަތް ކުރުމަށް ޔޫއޭއީގެ ރައީސްއާއެކު ރައީސް މުޢިއްޒު މަޝްވަރާކުރައްވައިފި

ޔުނައިޓެޑް އެރަބް އެމިރޭޓްސް (ޔޫއޭއީ) އާއި ދިވެހިރާއްޖެއާ ދެމެދު އޮތް ގުޅުން އިތުރަށް ބަދަހިކޮށް، އެކި ދާއިރާތަކުން ގުޅިގެން މަސައްކަތް ކުރުމާ ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޔޫއޭއީގެ ރައީސް ޝައިޚް މުޙައްމަދު ބިން ޒައިދު އަލް ނަޙްޔާންއާ ފޯނުން ގުޅުއްވައި މަޝްވަރާ ކުރައްވައިފިއެވެ.

ބުރާސްފަތި ދުވަހު ކުރިއަށްދިޔަ މި ފޯނު ކޯލުގައި، ދެ ގައުމުގެ ދެމެދުގައި އޮތް ރަހުމަތްތެރިކަމުގެ ގުޅުމުގެ މައްޗަށް އަލިއަޅުއްވާލައްވައި، އިގްތިސާދީ އަދި ތަރައްގީގެ ދާއިރާއިން އެއްބާރުލުން އިތުރުކުރުމާ ބެހޭގޮތުން ދެ ބޭފުޅުން ތަފްސީލީ ގޮތެއްގައި ވާހަކަފުޅު ދެއްކެވިއެވެ. މީގެ އިތުރުން، ދެ ގައުމުގެ ރައްޔިތުންގެ ލާބަޔާއި މަންފާއަށްޓަކައި، ތަރައްގީއަށް އަމާޒުކޮށްގެން ހިންގާ މަޝްރޫއުތަކާއި ހިއްސާވާ ކަންކަން އިތުރަށް ފުޅާކުރުމުގެ މުހިންމުކަން ދެ ލީޑަރުން ފާހަގަކުރެއްވިއެވެ.

މި ބައްދަލުވުމުގައި ދެ ގައުމުން އިސްކަންދޭ މުހިންމު ކަންކަމާއި، ސަރަހައްދީ ސަލާމަތާއި ހަމަޖެހުން ގާއިމުކުރުމަށް ކުރެވެމުންދާ މަސައްކަތްތަކާ ގުޅޭގޮތުންވެސް ދެ ބޭފުޅުން ޚިޔާލު ބަދަލުކުރެއްވިއެވެ.

wamnewsen UAE President His Highness Sheikh Mohamed bin Zayed Al Nahyan today received a phone call from President of the Republic of Maldives His Excellency Dr Mohamed Muizzu, during which they discussed bilateral relations and ways to strengthen cooperation, particularly in the… pic.twitter.com/7XYvHPPYZd

— UAE Embassy, Malé (@UAEEmbassyMale) August 13, 2026

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަންނަނީ އިސްލާމީ ގައުމުތަކާއި ބައިނަލްއަގުވާމީ ދުނިޔޭގެ އެކި ގައުމުތަކާއެކު އޮންނަ ގުޅުން ބަދަހިކޮށް، ރާއްޖޭގެ ތަރައްގީއަށް ބޭނުންވާ އެހީތެރިކަން ހޯދުމަށް ގިނަ މަސައްކަތްތަކެއް ކުރައްވަމުންނެވެ. އެގޮތުން ޔޫއޭއީއަކީ ރާއްޖޭގެ ތަރައްގީގެ މުހިންމު ބައިވެރިއެއްކަން ފާހަގަކުރެވެއެވެ.