ދިއްގަރުގައި 75 ހައުސިން ޔުނިޓު އިމާރާތްކުރުމުގެ މަސައްކަތް ބާރަށް ކުރިއަށްދަނީ

މ. ދިއްގަރުގައި 75 ހައުސިން ޔުނިޓު އިމާރާތްކުރުމަށް ކުރަމުންދާ މަސައްކަތް ހަލުވުކަމާއެކު ކުރިއަށްދާކަން، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓިސީސީ) އިން ހާމަކޮށްފިއެވެ.

މިކަން ހާމަކުރައްވާ އެކްސްގައި ކުރެއްވި ޕޯސްޓެއްގައި އެކުންފުނިން ބުނީ، މިހާރު މަޝްރޫއުގެ ދަށުން ކުރިއަށްދަނީ ދެވަނަ ޔުނިޓުގެ ފައުންޑޭޝަން އެޅުމަށް ބޭނުންވާ ކޮންކްރީޓު މަސައްކަތްތައް ކަމަށެވެ. 

ގެދޮރުވެރިކަމާއި ބެހޭ ވުޒާރާއިން މި މަޝްރޫއު އެމްޓީސީސީއާއި ހަވާލުކޮށްފައިވަނީ 18 އެޕްރީލް 2024 ގައެވެ. އަދި މި މަޝްރޫއުގެ އަމަލީ މަސައްކަތް މި އަހަރު ފަށާފައިވާއިރު، ދިއްގަރުގައި އިމާރާތް ކުރުމަށް ހަމަޖެހިފައިވަނީ، 1000  އަކަފޫޓުގެ ހައުސިން ޔުނިޓުތަކެކެވެ.

3 ކޮޓަރި، 3 ފާޚާނާ، ސިޓިންގް ރޫމް، ބަދިގެ، ކާގެ، ލޯންޑްރީ އަދި ސްޓޯރޫމް ހިމެނޭ ގޮތަށް 1000 އަކަފޫޓު ބޮޑުމިނުގެ 75 ހައުސިންގ ޔުނިޓު މި މަޝްރޫއުގެ ދަށުން އެ ރަށުގައި ގާއިމުކުރެވޭނެއެވެ.

Project Update: Design And Build Of 75 Housing Units At M.Dhiggaru

Foundation concrete works for the second unit is currently ongoing at the project site.

Follow more updates at: https://t.co/SfVAzkW2pp#MTCCProjects #TeamMTCC #RayyithungeKunfuni #GaumuBinaakurumugaaMTCC pic.twitter.com/8WP8ujBhRs

— MTCC Plc (@MTCCPlc) July 28, 2026

މިދިޔަ އަހަރުގެ  ސެޕްޓެމްބަރު މަހު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ދިއްގަރަށް ކުރެއްވި ދަތުރުފުޅުގައި، މި މަޝްރޫއު އިތުރަށް ފުޅާކޮށް، ތަރައްޤީގެ ރޮނގުން އިތުރު ކުރިއެރުންތައް ހޯއްދަވައިދެއްވާނެ ކަމަށް ވިދާޅުވެފައިވެއެވެ. އަދި ދިއްގަރުގައި އެހެނިހެން މަޝްރުއުތައް ވެސް ކުރިއަށްގެންދިއުމަށް ހަމަޖެހިފައިވާކަން ރައީސް ފާހަގަކުރެއްވިއެވެ.

މި މަޝްރޫއު އެމްޓީސީސީއިން ބާރު ސްޕީޑުގައި ކުރިއަށްގެންދާއިރު، އެމްޓީސީސީއިން އަންނަނީ ރާއްޖޭގެ ތަރައްގީއަށް އެތައް މަސައްކަތްތަކެއް ކުރަމުންނެވެ.