އެމްޓީސީސީގެ ޗެއަރޕާރސަން ކަމުގެ މަޤާމަށް ސަޢާދާ އިބްރާހިމް އައްޔަންކޮށްފި

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ)ގެ ޗެއަރޕާރސަން ކަމުގެ މަޤާމަށާއި، ޑިރެކްޓަރުންގެ ބޯޑުގެ މެންބަރުކަމުގެ މަޤާމަށް، ސަޢާދާ އިބްރާހިމް އައްޔަންކުރައްވާފައިވާކަން، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ހާމަކޮށްފިއެވެ. 

ޕީސީބީން އެކްސްގައި ކުރެއްވި ޓުވީޓެއްގައި މިކަން ހާމަކުރައްވާ ވިދާޅުވީ 24 ޖޫން 2026 އިން ފެށިގެން ސަޢާދާ ވަނީ އެމަޤާމަށް އައްޔަނުކުރެވިފައި ކަމަށެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ޕަބްލިކް ލިމިޓެޑްގެ ޗެއަރޕާރސަން ކަމުގެ މަޤާމަށާއި، ޑިރެކްޓަރުންގެ ބޯޑުގެ މެންބަރުކަމުގެ މަޤާމަށް، ދަޕްތަރު ނަންބަރ ރސ 14819، އަލްފާޞިލާ ސަޢާދާ އިބްރާހިމް 24 ޖޫން 2026 އިން ފެށިގެން ވަނީ އައްޔަނުކޮށްފައި. pic.twitter.com/7NSkL3X4NY

— Privatization & Corporatization Board (@pcb_gov) June 24, 2026

ސަޢަދާ އިބްރާހީމަކީ ދައުލަތުގެ މާލީ ނިޒާމު ބެލެހެއްޓުމާއި، ކޯޕަރޭޓް ފައިނޭންސް، ބަޖެޓް ތައްޔާރުކުރުން، މާލީ ދިރާސާކުރުން އަދި ރެގިއުލޭޓަރީ ކޮމްޕްލަޔަންސްގެ ދާއިރާއިން 20 އަހަރަށްވުރެ ގިނަ ދުވަހުގެ ތަޖުރިބާ ލިބިވަޑައިގެންފައިވާ ބޭފުޅެކެވެ. އޭނާ މިހާރު އަދާކުރައްވަމުން ގެންދަވަނީ  މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ ފައިނޭންޝަލް ސްޕެޝަލިސްޓްގެ މަގާމެވެ.  

މީގެ ކުރިން ސަޢާދާ ވަނީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގައި ވެސް ހަމަ މި މަގާމު އަދާކުރައްވާފައެވެ.  އަދި އޭގެ އިތުރުން އެސް.އެމް.އީ ޑިވެލޮޕްމަންޓް ފައިނޭންސް ކޯޕަރޭޝަން (އެސް.ޑީ.އެފް.ސީ) ގެ ސީނިއަރ ކްރެޑިޓް އެނަލިސްޓެއްގެ ގޮތުގައި މަސައްކަތް ކުރައްވައި، ވިޔަފާރިތަކަށް ދޫކުރާ ލޯނުތަކުގެ މާލީ ދިރާސާ ހަދައި، އެކަމާ ގުޅޭ ރިޕޯޓުތައް ބޯޑު އޮފް ޑިރެކްޓަރުންނަށް ހުށަހެޅުމުގެ ޒިންމާ ވެސް އޭނާ ވަނީ އުފުއްލަވާފައެވެ.

ތަޢުލީމީ ދާއިރާއަށް ބަލާއިރު، ވިލާ ކޮލެޖް މެދުވެރިކޮށް ޔުނިވަރސިޓީ އޮފް ދަ ވެސްޓް އޮފް އިންގްލަންޑުން އެކައުންޓިންގ އެންޑް ފައިނޭންސްގެ ދާއިރާއިން މާސްޓަރސް ޑިގްރީ އަދި ބެޗްލަރސް ޑިގްރީ (އޮނާސް) ސަޢާދާ  ހާސިލްކުރެއްވިއެވެ. އަދި އޭނާ މިހާރުދަނީ  އޭ.ސީ.ސީ.އޭ ޕްރޮފެޝަނަލް ކޮލިފިކޭޝަން ފުރިހަމަކުރައްވަމުންނެވެ.

އެންމެ ފަހުން އެމްޓީސީސީގެ ޗެއަރޕާރސަން ކަމުގެ މަޤާމުގައި ހުންނެވީ  މުޙައްމަދު އަފީފް ހުސައިންނެވެ.