އާޓިފިޝަލް ބީޗްގައި މާރާމާރީ ހިންގި ބިދޭސީންގެ މައްސަލަ ބަލަނީ

އާޓިފިޝަލް ބީޗްގައި މާރާމާރީ ހިންގި ބިދޭސީންގެ މައްސަލަ ތަޙުޤީޤު ކުރުމުގެ މަސައްކަތް ކުރިޔަށްގެންދާނެކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ.

ފުލުހުން މިކަން ހާމަކޮށްފައި ވަނީ އާޓިފިޝަލް ބީޗު ސަރަޙައްދުގައި ބިދޭސީންތަކެއް މެދުގައި މާރާމާރީއެއް ހިންގާ މަންޒަރު ފެންނަ ވީޑިއޯއެއް މީސްމީޑިއާގައި ދައުރުވަމުން ދަނިކޮށެވެ.

ފުލުހުން ހާމަކޮށްފައިވާ ގޮތުގައި، މި މާރާމާރީގެ މައްސަލަ، އެ އިދާރާގެ ސަމާލުކަމަށް އައީ އެއްވެސް ފަރާތަކުން އެކަން ރިޕޯޓުކޮށްގެނެއް ނޫނެވެ. ނަމަވެސް މާރާމާރީއަކީ ޖިނާއީ ކުށަކަށް ވާތީ އެ މައްސަލަ ބެލުމަށް ނިންމީކަމަށް ފުލުހުން ވަނީ ހާމަކޮށްފައެވެ.

އެ ވީޑިއޯއިން ފެންނަ ގޮތުން، އެ ބިދޭސީން ދިޔައީ އެކަކު އަނެއްކަކަށް ޖިސްމާނީ އަނިޔާ ދެމުންނެވެ. އަދި އެއްބަޔަކު އެކަން ހުއްޓުވަން މަސައްކަތް ކުރާތަން ފެނެއެވެ.