މިއަދު އަޅުގަނޑުމެން މި ފާހަގަކުރަނީ ސައިންސްގެ ދާއިރާގައި ހުރި ހުރަސްތައް ގިރާކުރި އަންހެނުންގެ އަގުވަޒަންކުރުން: ރައީސް މުޢިއްޒު

ސައިންސްގެ ދާއިރާގައި ހުރި ހުރަސްތައް ގިރާކުރި އަންހެނުންގެ އަގުވަޒަންކުރުމަށާއި، އެ ދާއިރާއިން ކުރިއަށްދާ އަންހެން ކުދިންނަށް ފުރުޞަތުތައް ފަހިކޮށްދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.

ރައީސް މިކަމަށް ގޮވާލެއްވީ ބައިނަލްއަޤްވާމީ ގޮތުން ފާހަގަކުރާ ސައިންސްގެ ދާއިރާގައި ހަރަކާތްތެރިވާ އަންހެނުންނާއި އަންހެން ކުދިންގެ ދުވަހުގެ މުނާސަބަތުގައި މިއަދު ކުރެއްވި އެކްސް ޕޯސްޓެއްގައެވެ.

ރައީސް މުޢިއްޒު ވިދާޅުވީ، ސައިންސްގެ ދާއިރާގައި ހަރަކާތްތެރިވާ އަންހެނުންނާއި އަންހެން ކުދިންގެ ބައިނަލްއަޤްވާމީ ދުވަހަކީ، ޞިއްޙީ ދާއިރާއާއި، މޫސުމަށް އަންނަ ބަދަލުތަކާ ދެކޮޅަށް ކުރެވޭ މަސައްކަތްތަކާއި، ޓެކްނޮލޮޖީ އަދި އީޖާދީ ކަންކަމުގައި އަންހެނުން އަދާކުރާ މުހިންމު ދައުރު ހަނދާންކޮށްދޭ ދުވަހެއް ކަމަށެވެ. އަދި އަންހެނުންގެ އެ ޚިދުމަތްތަކަކީ ބަދަލު ނުކުރެވޭނެ ފަދަ އަގުހުރި ޚިދުމަތްތަކެއްކަން އެމަނިކުފާނު ފާހަގަކުރެއްވިއެވެ.

ރާއްޖޭގެ ހާލަތަށް އަލިއަޅުއްވާލައްވަމުން ރައީސް ވިދާޅުވީ، ރާއްޖޭގައި ގިނަ އަދަދެއްގެ އަންހެން ކުދިން ސްޓެމް (STEM) ނުވަތަ ސައިންސް، ޓެކްނޮލޮޖީ، އިންޖިނިއަރިންގ އަދި މެތަމެޓިކްސްގެ ދާއިރާއިން ތަޢުލީމާއި ތަމްރީނު ހޯދައި، އައު ފުރުޞަތުތަކުގެ ބޭނުން ހިފަމުންދާތީ އެކަމާ ފަޚުރުވެރިވާ ކަމަށެވެ. މިއީ ސައިންސާއި އީޖާދީ ދާއިރާއިން އުޖާލާ އަދި ހުރިހާ އެންމެންގެ ބައިވެރިވުން ހިމެނޭ މުސްތަޤްބަލަކަށް މަގުފަހިވެގެންދާނެ ކަމެއް ކަމަށްވެސް އެމަނިކުފާނު ވިދާޅުވިއެވެ.

International Day of Women and Girls in Science reminds us of the vital role women play in advancing knowledge, from health and climate action to technology and innovation. Their contributions are truly irreplaceable. We are proud to see more girls in the Maldives pursuing STEM… pic.twitter.com/5QA74EOT2d

— Dr Mohamed Muizzu (@MMuizzu) February 11, 2026

"މިއަދު އަޅުގަނޑުމެން މި ފާހަގަކުރަނީ ސައިންސްގެ ދާއިރާގައި ހުރި ހުރަސްތައް ގިރާކުރި އަންހެނުންގެ އަގުވަޒަންކުރުން،" ރައީސް ވިދާޅުވިއެވެ. މީގެ އިތުރުން ކޮންމެ އަންހެން ކުއްޖަކަށްވެސް އުނގެނުމާއި، ޤައުމަށް ޚިދުމަތްކުރުމާއި، އިސްދައުރު އަދާކުރުމުގެ ފުރުޞަތު ކަށަވަރުކޮށްދިނުމަށް ސަރުކާރުން އިސްކަންދޭނެ ކަމުގެ ޔަޤީންކަން އެމަނިކުފާނު ދެއްވިއެވެ.

ރައީސްގެ މެސެޖު ނިންމަވާލައްވަމުން ވިދާޅުވީ، ސައިންސްގެ ދާއިރާއަށް ޝައުޤުވެރިކަން ހުންނަ ކޮންމެ ދިވެހި އަންހެން ކުއްޖަކަށްވެސް ޤައުމީ ތަރައްޤީގައި ބައިވެރިވެވޭނެ ގޮތަށް ހުރި ހުރަސްތައް ނައްތާލުމަށް ސަރުކާރުން ދެމިއޮންނާނެ ކަމަށެވެ.