"އެސުއާރ" މަޝްރޫޢުގެ ދަށުން، ފްލޯޓިންގ ސޯލާ ޕީވީ ސިސްޓަމްތައް ބެހެއްޓުމަށް މައުލޫމާތު އެއްކުރުމުގެ މަސައްކަތް ފަށައިފި

ދިވެހިރާއްޖޭގައި އިޔާދަކުރަނިވި ހަކަތަ އުފެއްދުން އިތުރުކުރުމަށް، "އެސުއާރ" މަޝްރޫޢުގެ ދަށުން، ފްލޯޓިންގ ސޯލާ ޕީވީ ސިސްޓަމްތައް ބެހެއްޓުމަށް ބޭނުންވާ ސައިޓްތަކުގެ މައުލޫމާތު އެއްކުރުމަށް ޚާއްޞަ ސާމާނު، ރާއްޖޭގެ ތިން ތަނެއްގައި ބަހައްޓައިފިއެވެ. މި މަސައްކަތަކީ ދިވެހިރާއްޖޭގެ ހަކަތަ އުފެއްދުމުގެ %33 އާ ބާރުން ހޯދުމަށް ސަރުކާރުން ކަނޑައަޅާފައިވާ ލަނޑުދަނޑި ހާސިލުކުރުމަށްޓަކައި އަޅާ މުހިންމު ފިޔަވަޅެކެވެ.

 މި ސިސްޓަމްތައް ބަހައްޓާފައިވަނީ މ. މުލި، މ. މުލައް އަދި ފ. ނިލަންދޫގައެވެ.  ފަތުރުވެރިކަމާއި ތިމާވެއްޓާ ބެހޭ ވުޒާރާއިން ވިދާޅުވީ، މި މަސައްކަތުގެ ދަށުން، ސޯލާ ޕެނަލްތައް ފެނުމަތީގައި ބެހެއްޓުމަށް އެންމެ އެކަށޭނަ ތަންތަން ދެނެގަތުމަށް ބޭނުންވާ ތަފާތު މައުލޫމާތުތައް މި ސާމާނު މެދުވެރިކޮށް އެއްކުރެވޭނެ ކަމުގައެވެ. މީގެ ތެރޭގައި އެ ސަރަހައްދުގެ މޫސުމާއި، ކަނޑުގެ ރާޅުގެ ހާލަތާއި، އަދި އެހެނިހެން ތިމާވެށީގެ ކަންކަމާ ގުޅޭ މައުލޫމާތުތައް ހިމެނޭ ކަމަށާއި،  މި މައުލޫމާތުތައް ނެގުމަކީ، ފެނުމަތީގައި ސޯލާ ޕެނަލްތައް ބެހެއްޓުމުގެ މަޝްރޫޢުތައް ރާވައި ހިންގުމުގައި އެންމެ ރަނގަޅު ގޮތްތައް ކަނޑައެޅުމަށް އަސާސީ ކަމެއް ކަމުގައިވެސް އެ ވުޒާރާއިން ވިދާޅުވެއެވެ.

މީގެ އިތުރުން ދިވެހިރާއްޖެއަކީ ބިން ކުޑަ ޤައުމަކަށް ވާއިރު، ފެނުމަތީގައި ސޯލާ ޕީވީ ސިސްޓަމްތައް ބެހެއްޓުމަކީ، ބިމުގެ ބޭނުން ނުކޮށް ހަކަތަ އުފެއްދުން އިތުރުކުރުމަށް އޮތް ވަރަށް ރަނގަޅު ފުރުސަތެއް ކަމަށްވެސް ފަތުރުވެރިކަމާއި ތިމާވެއްޓާ ބެހޭ ވުޒާރާއިން ވިދާޅުވެއެވެ. އެވުޒާރާއިން ވިދާޅުވީ، އާ ބާރުގެ ހަކަތައަށް ބަރޯސާވުން އިތުރުކުރުމަކީ، މޫސުމަށް އަންނަ ބަދަލުތަކާ ކުރިމަތިލާ، ދެމެހެއްޓެނިވި ތަރައްޤީއެއް ހާސިލުކުރުމަށްޓަކައި ދިވެހި ސަރުކާރުން ދޭ މުހިންމު ސަމާލުކަމެއް ކަމުގައެވެ.

 ފަތުރުވެރިކަމާއި ތިމާވެއްޓާ ބެހޭ ވުޒާރާއިން އިތުރަށް ވިދާޅުވީ މި މަސައްކަތް ކުރިއަށް ދަނީ، ދިވެހިރާއްޖޭގެ ހަކަތަ ސެކްޓަރ ދެމެހެއްޓެނިވި ގޮތަކަށް ބައްޓަންކުރުމަށް އެހީތެރިވުމަށް އަމާޒުކޮށްފައިވާ "އެސުއާރ" މަޝްރޫޢުގެ ދަށުން ކަމުގައެވެ. މި މަޝްރޫޢަކީ އިޔާދަކުރަނިވި ހަކަތައިގެ ބޭނުންކުރުން އިތުރުކޮށް، ގައުމީ ހަކަތަ ރައްކާތެރިކަން ކަށަވަރުކުރުމަށްޓަކައި ކުރެވޭ ހަރަކާތްތަކުގެ މުހިންމު ބައެއްކަމަށްވެސް ތިމާވެއްޓާބެހޭ ވުޒާރާއިން ވިދާޅުވެއެވެ.