ކުއްލި ޙާލަތްތަކަކީ ނަފްސާނީ އެހީ އެންމެ ފަރުވާތެރިކަމާއެކު ފޯރުކޮށްދޭންޖެހޭ ވަގުތު: މެޑަމް ސާޖިދާ

ކުއްލި ޙާލަތްތަކަކީ ނަފްސާނީ އެހީ އެންމެ ފަރުވާތެރިކަމާއެކު ފޯރުކޮށްދޭންޖެހޭ ވަގުތު ކަމުގައި ރައީސުލްޖުމްހޫރިއްޔާގެ އަނބިކަނބަލުން، މެޑަމް ސާޖިދާ މުޙައްމަދު ވިދާޅުވެއްޖެއެވެ.

މެޑަމް ސާޖިދާ މިފަދަން ވިދާޅުވީ، ދުނިޔޭގެ ނަފްސާނީ ދުޅަހެޔޮކަމުގެ ދުވަހާއި ގުޅިގެން މީސްމީޑއާގައި ކުރެއްވި ޕޯސްޓެއްގައެވެ.

އެ ކަމަނާ ވިދާޅުވީ، ކުއްލި ޙާލަތްތަކަކީ ނަފްސާނީ އެހީ އެންމެ ފަރުވާތެރިކަމާއެކު ފޯރުކޮށްދޭންޖެހޭ ވަގުތު ކަމަށާއި، ނަމަވެސް އެއީ ގިނަ ފަހަރަށް މި ކަމުގައި އެންމެ ފަރުވާކުޑަކޮށްލެވޭ ވަގުތުކަމަށެވެ. 

އަދި ނަފްސާނީ އެހީއަކީ ހަމައެކަނި ވަކި ގިންތިއެއްގެ ބަޔަކަށް ބޭނުންވާނެ އެއްޗެއް ނޫންކަން މިއަދު އަޅުގަނޑުމެން ހަނދާންކުރަންޖެހޭ ކަމުގައި ވެސް މެޑަމް ސާޖިދާ ވަނީ ހާމަކުރައްވާފައެވެ.

މީގެއިތުރުން، މިފަދަ ދުވަހެއް ފާހަގަކުރަމުންދާއިރު، ދުނިޔޭގެ ކަންކޮޅުތަކުގައި އެކި ކާރިސާތަކާއި ހަނގުރާމަތަކުގެ ސަބަބުން ހާލުގައި ޖެހިފައިވާ ފަރާތްތަކުގެ މަތިން ހަނދާން ކުރަންޖެހޭކަމަށް އެ ކަމަނާ ވަނީ ވިދާޅުވެފައެވެ. މިފަދަ ނާޒުކު ހާލަތްތަކުގައި އަބަދުވެސް އެންމެ ބޮޑަށް އެހީތެރިކަން ބޭނުންވަނީ ކުޑަކުދިންނާއި އަންހެނުންނަށްކަން ވެސް އެކަމަނާ ފާހަގަކުރެއްވިއެވެ.

On this #WorldMentalHealthDay, we stand with all those affected by conflict, crisis, and displacement across the globe, especially women and children who are often the most vulnerable in these situations.

Too often, mental health is overlooked in emergencies, when it is needed… pic.twitter.com/n4L1QZGtAT

— First Lady Sajidha Mohamed (@sajidhaamohamed) October 10, 2025

އެކަމަނާގެ ޕޯސްޓް ނިންމަވާލެއްވީ، ކުއްލި ހާލަތްތަކަށް އިޖާބަ ދިނުމުގައި ފަރުވާ ދިނުމަށާއި، ކުލުނުވެރިކަން އިސްކުރުމުގެ އިތުރަށް ނަފްސާނީ އެހީތެރިކަން ފޯރުކޮށްދިނުމަށްވެސް އިސްކަން ދިނުމަށް ގޮވާލައްވަމުންނެވެ.

ދުނިޔޭގެ ނަފްސާނީ ދުޅަހެޔޮކަމުގެ ދުވަހަކީ ކޮންމެ އަހަރެއްވެސް އޮކްޓޯބަރ މަހުގެ 10 ވަނަ ދުވަހެއެވެ. މި ދުވަސް ފާހަގަކުރަނީ ނަފްސާނީ ދުޅަހެޔޮކަމަށް، ހޭލުންތެރި އަދި އަހުލުވެރި މުޖްތަމަޢުއެއް ބިނާކޮށް ނަފްސާނީ އެހީތެރިކަން ފޯރުކޮށްދިނުމަށް ވަކާލާތު ކުރުމަށެވެ. މިއަހަރުގެ ނަފްސާނީ ދުޅަހެޔޮކަމުގެ ދުވަހުގެ ޝިޢާރު ބިނާވެފައިވަނީ ކުއްލި ހާލަތްތަކުގައި ނަފްސާނީ އެހީތެރިކަން ފޯރުކޮށްދިނުމަށެވެ.