ބޮޑެތި މަޤާމުތަކުގައި ތިއްބެވި ބޭފުޅުން ދޮގު މަޢުލޫމާތު ނުފެތުރުމަށް ވަޒީރު އެދިވަޑައިގެންފި

ބޮޑެތި މަޤާމުތަކުގައި ތިއްބެވި ބޭފުޅުން ދޮގު މަޢުލޫމާތު ފެތުރުމުން ދުރުހެލިވުމަށް، ދާޚިލީ ސަލާމަތާއި ފަންނިއްޔަތާ ބެހޭ ވަޒީރު، ޢަލީ އިޙްސާން އެދިވަޑައިގެންފިއެވެ.

ވަޒީރު މިހެން ވިދާޅުވީ، ރައީސް މުޙައްމަދު ނަޝީދު "އެކްސް"ގައި ކުރެއްވި ޕޯސްޓަކަށް ރައްދުދެއްވައި، ލިޔުއްވި މެސެޖުގައެވެ.

މިއަދު ހެނދުނު "އެކްސް"ގައި ރައީސް ނަޝީދު ކުރެއްވި ޕޯސްޓުގައި ވިދާޅުވީ، ލިޔުންތެރިއެއް އަދި ފާޅުކުރި ޚިޔާލުތަކަކާ ގުޅިގެން ޖަލަށްލާފައިވާ މީހެއްގެ ހައިސިއްޔަތުން، މީޑިއާ ބިލް ތަސްދީޤުނުކުރުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއަށް ގޮވާލައްވާކަމަށެވެ. އަދި ޚިޔާލު ފާޅުކުރުމުގެ މިނިވަންކަން ހަނިކުރުމަކީ، ޤައުމުގެ މިނިވަންކަން ހަނިވެ، ތަނަވަސްކަމަށް އޭގެ ނުރަނގަޅު އަސަރުކުރާނެ ކަމެއްކަމަށް ވިދާޅުވިއެވެ. އަދި އިއްޔެގެ އިޙުތިޖާޖާ ގުޅިގެން ހައްޔަރުކުރި ނޫސްވެރިން މިނިވަންކުރުމަށް އެ މަނިކުފާނު ގޮވާލެއްވިއެވެ.

As a writer and former prisoner of conscience my plea to President Dr. Muiz is not to ratify the Media Bill. Whenever a government suppresses people’s right to freedom of expression it inevitably makes the country less free and less prosperous. I also call on the journalists…

— Mohamed Nasheed (@MohamedNasheed) August 28, 2025

ރައީސް ނަޝީދުގެ މި މެސެޖަށް ރައްދުދެއްވަމުން ވަޒީރު އިޙްސާން ވިދާޅުވީ، އިއްޔެގެ އިޙުތިޖާޖުތަކުގައި އެއްވެސް ނޫސްވެރިއަކު ހައްޔަރުނުކުރާ ކަމަށެވެ. ކަންހިނގާދިޔަ ގޮތް އޮޅުންފިލުވާ ދެއްވަމުން ވަޒީރު އިތުރަށް ވިދާޅުވީ، ނޫސްވެރިން އެއްވެގެން ތިބީ "ގްރީން ޒޯން"ގެ ގޮތުގައި ކަނޑައަޅާފައިވާ ސަރަޙައްދުގައިކަމަށްވެފައި، އެ ސަރަޙައްދަކީ އެއްވެ އުޅުން ޤާނޫނުން މަނާކޮށްފައިވާ ސަރަޙައްދެއްކަމުން، އެ ސަރަޙައްދު ދޫކޮށް ދިއުމަށް ފުލުހުން ނަސޭހަތްތެރިވި ކަމަށެވެ. ނަމަވެސް، ފުލުހުންގެ އެ އެންގުންތަކަށް ބޯނުލެނބުމުން، ބައެއް ނޫސްވެރިން ފުލުހުންގެ ބެލުމުގެ ދަށުން އެ ސަރަޙައްދުން ދުރަށް ގެންދެވުނުކަމަށް ވަޒީރު ވިދާޅުވިއެވެ.

އެހެންކަމުން، ކަންކަމުގެ ހަޤީޤަތާ ޚިލާފަށް ބޮޑެތި މަޤާމުތަކުގައި ތިއްބެވި ބޭފުޅުން ދޮގު މަޢުލޫމާތު ފެތުރުމުން ދުރުހެލިވުމަށް ވަޒީރު ވަނީ އެންމެހާ ބޭފުޅުންނަށް އިލްތިމާސްކުރައްވާފައެވެ. 

Excellency President @MohamedNasheed, with due respect, I can confirm that NO journalist was arrested during or regarding yesterday’s protest. While the Journalists were protesting at a security / green zone (in front of the President’s Office and the Official Residence of the… https://t.co/vHhdMnXuMg

— Minister of Homeland Security & Technology (@min_mohst) August 28, 2025

ނޫސްވެރިން ކުރިޔަށް ގެންދިޔަ އިޙުތިޖާޖަކީ، ނޫސްވެރިކަން ރެގިއުލޭޓުކުރުމާ ގުޅޭ ބިލެއް ރައްޔިތުންގެ މަޖިލީހަށް ހުށަހަޅާފައިވުމާ ގުޅިގެން، އެ ބިލުގެ ސަބަބުން ނޫސްވެރިކަން ނުވަތަ ޚިޔާލުފާޅުކުރުން ހަނިވެގެންދާނެކަމަށް ބުނެ ކުރިޔަށް ގެންދިޔަ އިޙުތިޖާޖެކެވެ.

ނޫސްވެރިކަން ރެގިއުލޭޓުކުރުމާ ގުޅޭ ބިލަކީ 19 އޯގަސްޓުގައި ތުޅާދޫ ދާއިރާގެ ޕީއެންސީގެ މެމްބަރު ޢަބްދުލްޙަންނާން އަބޫބަކުރު މަޖިލީހަށް ހުށަހެޅުއްވި ބިލެކެވެ. މި ބިލުގެ ފުރަތަމަ ކިއުން އިއްވައި، އިބްތިދާއީ ބަހުސް ވެސް އެ ދުވަހު ވަނީ ފަށާފައެވެ. ނަމަވެސް އެ ބިލަށް ބަހުސްކުރުމަށް ގިނަ މެންބަރުންނަށް ފުރުޞަތު ދިނުމުގެ ގޮތުން، މަޖިލީހުގެ ދައުރުން ބޭރުން އިއްޔެ ބޭއްވި ޖަލްސާގައި އެ ބިލަށް ބަހުސްކުރުމަށްފަހު، މަޖިލީހުން ބަލައިގަތުމަށް ވަނީ ނިންމާފައެވެ.