އޭޝިއަން ސާރފިން ޗެމްޕިއަންޝިޕްގައި ލޯ މެޑަލް ހޯދި ޓީމަށް މަރުޙަބާ ކިޔައިފި

އޭޝިއަން ސާފިން ޗެމްޕިއަންޝިޕްގައި ވާދަކުރި ރާއްޖޭގެ އެތުލީޓުން ހޯދި ކާމިޔާބަށް ކުޅިވަރު ވުޒާރާއިން މަރުޙަބާ ކިޔައިފިއެވެ.

ވެލާނާ އިންޓަނޭޝަނަލް އެއާޕޯޓުން ޓީމަށް މަރުޚަބާ ދެންނެވީ ކުޅިވަރާއި ހަށިހެޔޮ ކަމާއި ބެހޭ ވުޒާރާގެ ސްޓޭޓް މިނިސްޓަރ އަބްދުއްރައްޒާޤް އިބްރާޙިމް އާއި ސްޓޭޓް މިނިސްޓަރ އިބްރާޙިމް އާމިރެވެ. މީގެއިތުރުން މޯލްޑިވްސް އޮލިމްޕިކް ކޮމިޓީގެ ސެކްރެޓަރީ ޖެނެރަލް ތަމޫޙް އަހުމަދު ވެސް ބައިވެރިވެވަޑައިގެންނެވިއެވެ.

State Ministers Abdul Razak Ibrahim and Ibrahim Amir welcomed the Maldives Surfing Association team after their remarkable performance at the Asian Surfing Championship in Tamil Nadu, India. The team earned a bronze medal in the Junior Under-18 Boys category and secured two… pic.twitter.com/MUG5w4d6VD

— Ministry of Sports, Fitness and Recreation (@MoSFR_mv) August 13, 2025

އިންޑިއާގެ ޓެމިލްނާޑޫގައި ކުރިޔަށް ގެންދިޔަ އޭޝިއަން ސާރފިން ޗެމްޕިއަންޝިޕް 2025ގައި ވާދަކުރި ރާއްޖޭގެ އެތުލީޓުންގެ ތެރެއިން މެޑަލް ހޯދީ 18 އަހަރުން ދަށުގެ ފިރިހެން ކެޓަގަރީގައި ވާދަކުރި ޔާސިން އަހުމަދު ނާޝިދު، ކަޔާން އަބުދުالله އަރީފް އަދި ޔޫސުފް ކަޔާން ހަމްދާން ޒަކީއެވެ. މި އެތުލީޓުން ވަނީ ލޯ މެޑަލް ހޯދާފައެވެ. 

މި ނަތީޖާއާއެކު، ޖަޕާނުގައި އަންނަ އަހަރު ބާއްވާ އޭޝިއަން ގޭމްސްއަށް ކޮލިފައިވުމަށް ރާއްޖެއަށް ވަނީ އިތުރު ދެ ވެސް ލިބިފައެވެ.

އެހެންކަމުން އޭޝިއަން ގޭމްސް ކޮލިފިކޭޝަނުގައި ރާއްޖެއިން ޖުމްލަ 2 އަންހެން އެތުލީޓުންނާއި 2 ފިރިހެން އެތުލީޓުންނަށް ވާދަކުރުމުގެ ފުރުސަތު މިހާރުވަނީ ލިބިފައެވެ.

އޭޝިއަން ސާފިން ޗެމްޕިއަންޝިޕުގެ މެންސް އޯޕަން ކެޓަގަރީގައި ރާއްޖެއިން ވާދަކުރީ އަޙްމަދު އާގިލް (އަންމަޑޭ) އާއި އިސްމާޢީލް ރަޝީދު (ސްމައިލީ) އަދި ހޫދު އަޙްމަދު (ހޫބްސް)އެވެ.

މި މުބާރާތުގެ ވުމަންސް އޯޕަން ކެޓަގަރީގައި ރާއްޖެއިން ވާދަކުރީ މަރިޔަމް ރާހިލް ނަސީމް (އަޔާ)، ރިޝްތާ ސުޖާއު އަދި ޝާޒިޔާ ސައީދު (ޝާޒް)އެވެ.