ލޯންގްކޯސް 100 މީޓަރު ފްރީސްޓައިލް އިވެންޓުގެ ޤައުމީ ރެކޯޑު ތަޒްކިޔާ އާކޮށްފި

ސިންގަޕޫރުގައި މިހާރު ކުރިއަށްދާ 22 ވަނަ ވޯލްޑް އެކުއަޓިކްސް ޗެމްޕިއަންޝިޕްސްގައި ލޯންގްކޯސް 100 މީޓަރު ފްރީސްޓައިލް އިވެންޓުގެ ޤައުމީ ރެކޯޑު އަމްނާ ތަޒްކިޔާ މިރުޞާދު އާކޮށްފިއެވެ.

މި އިވެންޓުގެ ރެކޯޑު ތަޒްކިޔާ އާކޮށްފައި ވަނީ 01:04.04 އިން ރޭސް ނިންމައިގެންނެވެ. 

މި އިވެންޓުގެ ޤައުމީ ރެކޯޑު ކުރިން އޮތީ ޢާއިޝަތު ޢުލްޔާ ޝާއިޤްގެ އަތުގައެވެ. އޭނާ އެ ރެކޯޑު ހެދީ ޔޫ.ޑަބްލިއު.އެސް.ސީ (ދަ ޔުނިވަރސިޓީ އޮފް ވެސްޓަރން އޮސްޓްރޭލިއާ ވެސްޓްކޯސްޓް ސްވިމިންގ ކްލަބް) ކްލަބް ނައިޓް ނަންބަރު 5 ގައި 01:04.32 އިން ރޭސް ފުރިހަމަކޮށްގެންނެވެ. 

މިހާރު ސިންގަޕޫރުގައި ކުރިޔަށްދާ މުބާރާތުގައި ތަޒްކިޔާ ވަނީ ލޯންގްކޯސް 100 މީޓަރު ބެކްސްޓްރޯކް އިވެންޓުގެ ރެކޯޑު ވެސް މުގުރާލާފައެވެ. އޭނާ މި ރެކޯޑު މުގުރާލީ 01:13.49 އިން ރޭސް ނިންމައިގެންނެވެ. 

މީގެ އިތުރުން ހަތަރެއް ގުނަ ސަތޭކަ މީޓަރު މިކްސްޑް މެޑްލޭ ރިލޭ އިވެންޓުގެ ޤައުމީ ރެކޯޑު މުގުރާލި ޓީމުގައި ވެސް ތަޒްކިޔާ ހިމެނެއެވެ.