އައިޑީކާޑުގެ ޚިދުމަތް ވިލުފުށީގައި އިފްތިތާޙުކޮށްފި

ދިވެހި ރައްޔިތެއްކަން އަންގައިދޭ ކާޑު ޕްރިންޓުކޮށް ދޫކުރުމުގެ ޚިދުމަތް ތ. ވިލުފުށީގައި އިފްތިތާޙުކޮށްފިއެވެ.

ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު)އިން ހާމަކޮށްފައިވާ ގޮތުގައި، އައިޑީ ކާޑުގެ ޚިދުމަތް މިހާރު ތ. ވިލުފުށީގައި ތިބެގެން ރައްޔިތުންނަށް ހޯދޭނެއެވެ. 

އައިޑީ ކާޑު ޗާޕުކުރުމުގެ ޚިދުމަތް ވިލުފުށީގައި ފަށާފައިވާއިރު، މިއީ އެ އަތޮޅުން އައިޑީ ކާޑު ޕްރިންޓުކޮށް ދޫކުރުމުގެ ޚިދުމަތް ދޭން ފެށި ދެވަނަ ރަށެވެ.

ID card printing services have commenced in Vilifushi, making it the second island in Thaa Atoll after Veymandoo last week.

Residents can now receive their ID cards directly on the island, without waiting for weekly dispatches from Malé. pic.twitter.com/zOeYHpJEyl

— Department of National Registration (@dnrmaldives) July 25, 2025

ސޯޝަލް މިޑިއާގައި ކުރި ޕޯސްޓެއްގައި ޑީއެންއާރުން ހާމަކޮށްފައިވާ ގޮތުގައި މިހާރު 27 ރަށެއްގައި މި ޚިދުމަތް ދަނީ ފޯރުކޮށްދެމުންނެވެ. އަދި އަމާޒަކީ މި އަހަރު ނިމުމުގެ ކުރިން ހުރިހާ އަތޮޅެއްގައި އައިޑީ ކާޑު ޕްރިންޓުކޮށް ދޫކުރުމުގެ ޚިދުމަތް ފެށުން ކަމަށް ވެސް އެ އިދާރާއިން ހާމަކުރެއެވެ.

ޑީއެންއާރުން އެހެން ހާމަކޮށްފައިވާއިރު، ރާއްޖޭގެ މީހުން ދިރިއުޅޭ ކޮންމެ އަތޮޅަކުން ނުވަތަ އަތޮޅުވެރިކަން ކުރާ ރަށަކުން އައިޑީ ކާޑުގެ ޚިދުމަތް ފޯރުކޮށްދިނުމަކީ ސަރުކާރުގެ މުހިންމު ސިޔާސަތެކެވެ. އަދި މިދިޔަ އަހަރުގެ ނޮވެންބަރު މަހުން ފެށިގެން މި ވަޢުދު ފުއްދެވުމުގެ މަސައްކަތް ވަނީ ސަރުކާރުން ފަށާފައެވެ. 

މީގެ އިތުރުން ދިވެހީން އާންމުކޮށް ގޮސް އުޅޭ ޤައުމުތަކުގައިވެސް މި ޚިދުމަތް ފެށުމަށްދަނީ މަސައްކަތްކުރަމުންނެވެ. އެގޮތުން ސްރީލަންކާ، އިންޑިއާގެ އިތުރުން އިނގިރޭސިވިލާތުގައި މި ޚިދުމަތް ފެށުމަށް ތައްޔާރުވަމުންދާކަމަށް ޑީއެންއާރުން ހާމަކުރެއެވެ. މި ޚިދުމަތް ރާއްޖެއިން ބޭރުން އަދި ހަމައެކަނި ދެމުން އަންނަނީ މެލޭޝިއަގައެވެ.