ބަނގުލަދޭޝްގެ އަސްކަރިއްޔާގެ މަތިންދާބޯޓު ވެއްޓުނު ހާދިސާއާ ގުޅިގެން ރައީސުލްޖުމްހޫރިއްޔާ ތަޢުޒިޔާ ވިދާޅުވެއްޖެ

ބަނގުލަދޭޝްގެ އަސްކަރިއްޔާގެ މަތިންދާބޯޓެއް ދަނާލެއްގެ މައްޗަށް ވެއްޓި ހިނގި ހާދިސާއާ ގުޅިގެން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އެ ޤައުމުގެ ޗީފް އެޑްވައިޒަރަށާއި، ސަރުކާރު އަދި ރައްޔިތުންނަށް ތަޢުޒިޔާ ވިދާޅުވެއްޖެއެވެ.

ސޯޝަލް މީޑިއާގައި ރައީސުލްޖުމްހޫރިއްޔާ ކުރެއްވެވި ޕޯސްޓެއްގައި ވިދާޅުވީ، މި ހިތާމަވެރި ހާދިސާއާ ގުޅިގެން ކުރިމަތިވެފައިވާ ހިތާމައިގައި އެ މަނިކުފާނު ބައިވެރިވެ ވަޑައިގަންނަވާކަމަށެވެ. 

I extend my deepest condolences to @ChiefAdviserGoB, the government, and the people of Bangladesh following the tragic plane crash in Dhaka, which has claimed many lives and caused injuries to numerous others. Our heartfelt thoughts and prayers are with the victims, their…

— Dr Mohamed Muizzu (@MMuizzu) July 21, 2025

ބަންގްލަދޭޝްގެ އުއްތަރާ ސަރަޙައްދުގައި ހުންނަ މައިލްސްޓޯން ސްކޫލް އެންޑް ކޮލެޖުގެ ދަނާލަށް މި މަތިންދާބޯޓު ވެއްޓުނުއިރު، އެ ތަނުގައި އިމްތިހާނެއް ހަދަމުން ދިޔަ ކުދިންތަކަކާއި ކްލާސްތަކުގައި ކިޔަވަމުން ދިޔަ ކުދިން ތިއްބެވެ.

މީޑިއާތަކުން ރިޕޯޓުކޮށްފައިވާ ގޮތުގައި، މި ހާދިސާގައި މަރުވި މީހުންގެ އަދަދު 19 އަށް އަރައެވެ. މީގެ އިތުރުން 164 މީހުންނަށް އެކިވަރުގެ އަނިޔާތައް ވަނީ ލިބިފައެވެ. މީގެ ތެރޭގައި، ކުޑަކުދިން ހިމެނޭހެން 50 މީހަކު ވަރަށް ބޮޑަށް ފިހިފައިވާކަމަށް ވެސް ރިޕޯޓުތައް ބުނެއެވެ.

ދެ ބުރިއަށް ހަދާފައި ހުރި މި އިމާރާތުގެ މައްޗަށް ވެއްޓިފައިވަނީ އެފް-7ގެ ޖެޓެކެވެ. އަދި މިއީ ޓެކްނިކަލް މައްސަލައަކާ ގުޅިގެން ހިނގި ހާދިސާއެއްކަމަށް ބަނގުލަދޭޝްފެ އަސްކަރިއްޔާއިން ވަނީ ހާމަކޮށްފައެވެ. 

މި ސްކޫލަށް ހާޒިރުވަނީ 4 އަހަރާއި 18 އަހަރާއި ދެމެދުގެ ކުދިންނެވެ.