މާލޭގައި ފެން ބޮޑުވާތީ ފެން ހިންދުމުގެ މަސައްކަތް އެމްއެންޑީއެފްއިން ފަށައިފި

ވިއްސާރަވެހުމުގެ ސަބަބުން މާލޭގައި ފެން ބޮޑުވާތީ، ފެން ހިންދުމުގެ މަސައްކަތް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް)އިން ފަށައިފިއެވެ.

އެގޮތުން އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ދަނީ މާލޭގެ ދެ ސަރަހައްދެއްގައި ޕަންޕު ބަހައްޓައިގެން ފެން ހިންދުމުގެ މަސައްކަތް ކުރަމުންނެވެ.

މި ހަފްތާ ބަންދުގައި އުތުރާއި މެދުރާއްޖެ ތެރެއަށް ބޮޑަށް މޫސުން ގޯސްވާނެކަމަށް ވެސް މޫސުމާ ބެހޭ ޤައުމީ އިދާރާއިން ވަނީ ލަފާކޮށްފައެވެ. އެގޮތުން މި ހަފްތާ ބަންދުގައި ރާއްޖޭގެ ބޮޑުބަޔަކަށް ވިއްސާރަކޮށް، ރާއްޖޭގެ އެކި ހިސާބުތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާކަމަށް މެޓު އޮފީހުން ވަނީ ލަފާކޮށްފައެވެ.

މި ދުވަސްވަރު ރައްޔިތުންގެ ސަލާމަތާއި ރައްކާތެރިކަމަށްޓަކައި މޫސުމާބެހޭ މައުލޫމާތު ދޭ އިދާރާތަކުން ދޭ އިރުޝާދުތަކާ އެއްގޮތަށް އަމަލުކުރުމަށް ސިޓީތަކާއި އިދާރީ ދާއިރާތައް ހިންގުމާއި, ޢާންމު މަސައްކަތްތަކާބެހޭ ވުޒާރާއިން ވެސް އިލްތިމާސްކޮށްފައިވެއެވެ. 

އެވުޒާރާއިން ނެރުނު ނޫސްބަޔާނެއްގައި ބުނެފައިވަނީ، ކަނޑުމަތީގައި ހިނގާ ހިތާމަވެރި ހާދިސާތައް މަދުކުރުމަށްޓަކައި ރައްޔިތުން ސަރުކާރުގެ އިދާރާތަކުން ދޭ އިރުޝާދުތަކާ އެއްގޮތަށް އަމަލުކުރަމުންދާކަން ކަށަވަރުކުރުމަކީ ކޮންމެހެން ކުރަންޖެހޭ ކަމެއްކަމަށެވެ.

 އަދި ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް ނުކުރުމަށް ސިޓީތަކާއި ބެހޭ ވުޒާރާއިން ހިތްވަރުދީފައިވެއެވެ. އަދި ކޮންމެހެން ކުރަންޖެހޭ ދަތުރުތައް ކުރާއިރުވެސް، ދަތުރުކުރާ ފަރާތްތަކާއި އުޅަނދުތަކުން ސަލާމަތީ ފިޔަވަޅުތައް އަޅާކަން ކަށަވަރުކުރުމަށް އިރުޝާދު ދީފައިވެއެވެ.