މާމިގިލީގައި ފީނަން ގޮސް އުޅުނިކޮށް ގެއްލުނު 15 އަހަރުގެ ކުއްޖާ ނިޔާވެފައި އޮއްވާ ފެނިއްޖެ

އދ. މާމިގިލީގައި ފީނަން ގޮސް އުޅުނު 15 އަހަރުގެ ކުއްޖަކު ގެއްލިގެން ހޯދަމުން ދަނިކޮށް އެ ރަށުގެ ބޭރު މޫދުން އެ ކުއްޖާ ނިޔާވެފައި އޮއްވާ ފެނިއްޖެއެވެ.

ދިވެހި ފުލުހުންގެ ޚިދުމަތުން ހާމަކޮށްފައިވާ ގޮތުގައި މި ކުއްޖާ ފީނަން ދިޔައީ އިތުރު ތިން ކުއްޖަކާއެކު މިއަދުގެ މެންދުރުގެ ވަގުތެއްގައެވެ.

އަދި އެކުއްޖާ ގެއްލިގެން ހޯދަމުންދާކަމަށް ފުލުހުންނަށް ރިޕޯޓުކޮށްފައި ވަނީ މިރޭގެ 7:00 ހާއިރެވެ.

ރެސްކިއު އޮޕަރޭޝަނާ ގުޅިގެން އެމްއެންޑީއެފްއިން ބުނީ، އެ ކުއްޖާ ނަގައިގެން އެ ރަށުގެ ހެލްތު ސެންޓަރަށް ގެންގޮސްފައިވާ ކަމަށެވެ. 

ހެލްތު ސެންޓަރުން ޑޮކްޓަރު ބެލުމަށްފަހު، އެ ކުއްޖާ ހެލްތު ސެންޓަރަށް ގެންދިޔައިރު ވެސް މަރުވެފައިވާކަމަށް ހާމަކޮށްފައިވާކަމަށް ފުލުހުން ވަނީ ހާމަކޮށްފައެވެ.