ވީއޭއެމް ކަޕް: އަލަށް ބައިވެރިވި ދަނޑިމަގު ސްޕޯޓްސްއިން ޕޮލިސް ކްލަބް ބަލިކޮށްފި

ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ކަޕްގައި މި އަހަރު އަލަށް ވާދަކުރާ ފުވައްމުލަކަށް ނިސްބަތްވާ ދަނޑިމަގު ސްޕޯޓްސް އެންޑް ރެކްރިއޭޝަން ކްލަބުން ޕޮލިސް ކްލަބް ބަލިކޮށްފިއެވެ. 

ދަނޑިމަގު ސްޕޯޓްސްއިން މި މެޗު ކާމިޔާބުކުރީ 3-1 ސެޓުންނެވެ. 

އެގޮތުން ފުރަތަމަ ދެ ސެޓު އެ ޓީމުން 25-18 އަދި 26-24 ޕޮއިންޓުން ކާމިޔާބުކުރިއިރު، ތިންވަނަ ސެޓު 21-25 ޕޮއިންޓުން ގެންދިޔައީ ޕޮލިސް ކްލަބެވެ. އަދި ފަހު ސެޓު 25-21 ޕޮއިންޓުން ކާމިޔާބުކުރީ ދަނޑިމަގު ސްޕޯޓްސްއިންނެވެ.

މުބާރާތުގައި ދަނޑިމަގު ސްޕޯޓްސްއިން ކުޅުނު ފުރަތަމަ މެޗުގައި ދިވެހި ސިފައިންގެ ކްލަބާ ބައްދަލުކުރިއިރު، އެ މެޗުން އެ މެޗު ވަނީ 3-0 ސެޓުން ގެއްލިފައެވެ.

މި މުބާރާތުގައި އިއްޔެ ހަވީރު ސްޕޯޓްސް ސިޓީ ކްލަބާއި ބްލޫޒް ފޯރ ވޮލީ ބޯލް ބައްދަލުކުރި މެޗު ސީދާ 3 ސެޓުން ކާމިޔާބުކުރީ ސްޕޯޓްސް ކުލަބު ސިޓީއެވެ. މި މެޗުގެ ފުރަތަމަ ދެ ސެޓު ވާދަވެރިކޮށް ފެނިގެންދިޔައިރު، މި ދެ ސެޓު ސިޓީން ގެންގޮސްފައިވަނީ 32-30 އަދި 25-23 ޕޮއިންޓުންނެވެ. އަދި މެޗުގެ ތިންވަނަ ސެޓުގައި ބްލޫސް ފޯރ ވޮލީބޯލްގެ ފަރާތުން އާދައިގެ ކުޅުމެއް ފެނިގެންދިޔައިރު، މި ސެޓު ސިޓީން ގެންގޮސްފައިވަނީ 25-18 ޕޮއިންޓުންނެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ސިޓީގެ ބިދޭސީ ކުޅުންތެރިޔާ އަރްޔާން ބަލްޔާންއެވެ.

އިއްޔެގެ ފަހު މެޗުގައި ދިވެހި ސިފައިންގެ ކްލަބުން ވަނީ ދަ ސަދާރން ސްޕޯޓްސް ކްލަބް 3-0 ސެޓުން ބަލިކޮށްފައެވެ. މި މެޗުގެ ސެޓުތައް ދިވެހި ސިފައިންގެ ކްލަބުން ގެންދިޔައީ 25-19، 25-14 އަދި 25-19 ޕޮއިންޓުންނެވެ. ސިފައިންގެ ކްލަބުން އެ ޓީމުގެ ފުރަތަމަ މެޗު ވެސް ކާމިޔާބުކުރީ ސީދާ 3 ސެޓުންނެވެ.