ހަމަލާތަކުގެ ސަބަބުން ރާއްޖޭގެ ވައިގެ ދަތުރުފަތުރަށް ކުރާ އަސަރުތައް ބަލަމުންދާކަމަށް ވަޒީރު ވިދާޅުވެއްޖެ

މެދުއިރުމަތީގެ ހާލަތު އިތުރަށް ގޯސްވަމުންގޮސް، ރާއްޖެއާ ގުޅިފައިވާ ބައެއް މުހިންމު ވައިގެ ސަރަހައްދުތައް ވަގުތީގޮތުން ބަންދުކޮށްފައިވާއިރު، އެ ކަންކަމުގެ ސަބަބުން ޔޫރަޕުން ރާއްޖެއަށް ކުރަމުންދާ ވައިގެ ދަތުރުފަތުރުތަކަށް އަންނަމުންދާ ބަދަލުތައް ގާތުން ބަލަމުންދާކަމަށް، ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ވައިގެ ސަރަހައްދުތައް ބަންދުކޮށްފައި ވަނީ އިޒްރޭލާއި އީރާނާއި ދެމެދު ބަދަލުކުރަމުންދިޔަ ހަމަލާތަކުގެ ތެރެއަށް އެމެރިކާއިން ވަދެ، އީރާނަށް ހަމަލާދިނުމާ ގުޅިގެންނެވެ. އެމެރިކާއިން ހޮނިހިރު ދުވަހު އީރާނުގެ ނިއުކްލިއަރ ތިން މަރުކަޒަކަށް ހަމަލާދިނުމާ ގުޅިގެން، އީރާނުން ވަނީ ގަތަރުގައި ހުންނަ އެމެރިކާގެ މިލިޓަރީ ބޭސްއަކަށް ރޭ ހަމަލާތަކެއް އަމާޒުކޮށްފައެވެ. ނަމަވެސް ގަތަރުގެ ސަރުކާރުން ބުނީ، އީރާނުގެ ހުރިހާ ހަމަލާތަކެއް ވެއްޓުމުގެ ކުރިން ގޮއްވާލެވުނުކަމަށެވެ.

These days, we are closely monitoring the potential impact on air travelers from the West to the Maldives, including tourist arrivals.
Tonight’s temporary airspace closures in parts of the Middle East are now easing.
Some Middle Eastern carriers at Malé Airport experienced…

— Mohamed Ameen (@ameen3d) June 23, 2025

މި ހަމަލާއާ ގުޅިގެން ރޭ ބަންދުކުރި ބައެއް ވައިގެ ބަނދަރުތައް މިހާރު ހުޅުވާލާލާފައިވާކަމަށް ވެސް މައުލޫމާތު ލިބެއެވެ. އެގޮތުން ދުބާއީއިން ފްލައި ދުބާއީ ފްލައިޓަކާއި އެމިރޭޓްސްގެ ފްލައިޓެއް މިއަދު ވަނީ ރާއްޖެ އައިސްފައިވެއެވެ.

މިޙާލަތާއި ގުޅިގެން ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވީ، ހުޅަނގުގެ ޤައުމުތަކުން ރާއްޖެއަށް އަންނަ ފަތުރުވެރިން ގެނައުމަށް ހަރަކާތްތެރިވާ ފްލައިޓުތަކުގެ ދަތުރުފަތުރަށް އަންނަ ބަދަލުތައް ދެނެގަތުމަށް ގާތުން މަސައްކަތް ކުރަމުންދާކަމަށެވެ. އަދި މެދުއިރުމަތީގެ ބައެއް ޤައުމުތަކުގެ ވައިގެ ސަރަޙައްދުތައް ރޭގައި ވަގުތީގޮތުން ބަންދުކުރުމާއި ގުޅިގެން ރާއްޖެއަށް އަންނަ ފްލައިޓުތައް ޑިލޭވެފައިވާކަންވެސް ވަޒީރު ފާހަގަކުރެއްވިއެވެ. ވަގުތީގޮތުން ބަންދުކުރި ވައިގެ ސަރަހައްދުތައް މިހާރުވަނީ ހުޅުވާލާފައެވެ. ވަޒީރު ވިދާޅުވީ މިހާރު ދުނިޔޭގައި ހިނގަމުންދާ ހަމަނުޖެހުންތަކާ ގުޅިގެން ވައިގެ ދަތުރުތަކަށް އަންނަ ބަދަލުގެ ސަބަބުން ރާއްޖެއަށް ކުރާ އަސަރު ކުޑަވާނެކަމަށް އުއްމީދުކުރައްވާކަމަށް ވަޒީރު ވިދާޅުވިއެވެ.