އޭޝިއާ ކަޕް ކޮލިފައިންގެ ފިރިހެން ޑިވިޝަންގެ ލޯ މެޑަލް ބަނގުލަދޭޝްއިން ހޯދައިފި

ފީބާ 16 އަހަރުން ދަށުގެ އޭޝިއާ ކަޕް ސާބާ ކޮލިފައިންގެ ފިރިހެން ޑިވިޝަންގެ ތިންވަނަ ހޮވާ މެޗުގައި ދިވެހިރާއްޖެ ބަލިކޮށް ބަނގުލަދޭޝްއިން ލޯ މެޑަލް ހޯދައިފިއެވެ.

ރާއްޖޭގެ ކުޅިވަރު އެކުވެނީގައި މިއަދު މެންދުރުފަހު ކުޅުނު މި މެޗު ބަނގުލަދޭޝްއިން ކާމިޔާބުކުރީ 75-42 ޕޮއިންޓުންނެވެ.

ލީގު ބުރުގެ ފަހު މެޗުގައި މި ދެ ޓީމު ރޭ ބައްދަލުކޮށްފައިވާއިރު، އެ މެޗު ވެސް ކާމިޔާބުކުރީ ބަނގުލަދޭޝްއެވެ. ނަމަވެސް އެއީ 9 ޕޮއިންޓުގެ ފަރަގަކުން، 64-55 ޕޮއިންޓުންނެވެ. މިއަދުގެ މެޗު ރާއްޖެއަށް ގެއްލުނީ 33 ޕޮއިންޓުގެ ބޮޑު ތަފާތަކުންނެވެ. 

ރޭގެ މެޗެކޭ އެއްގޮތަށް، މި އަދުގެ މެޗުގެ ފުރަތަމަ ކުއާޓާގައި ވެސް ރާއްޖޭގެ ޓީމުން ލީޑު ނެގިއެވެ. ނަމަވެސް ބަނގުލަދޭޝްގެ ވަރުގަދަ ކުޅުމާއެކު އެ ކުއާޓާ ނިންމާލީ 20-11 އިން އެ ޓީމު ކުރީގައި އޮވެގެނެވެ. 

މެޗުގެ ދެވަނަ ކުއާޓާ ބަނގުލަދޭޝްއިން ކާމިޔާބުކުރީ 11 ޕޮއިންޓުގެ ފަރަގަކާއެކު 38-27 ޕޮއިންޓުންނެވެ. 

ދެވަނަ ހާފުގައި ބަނގުލަދޭޝްއިން ބަދަލުތަކެއް ގެނައި ނަމަވެސް، ތިންވަނަ ކުއާޓާގައި ރާއްޖެއިން ވަނީ ފަރަގު ކުޑަކޮށްފައެވެ. އެ ކުއާޓާ ނިމުނީ7 ޕޮއިންޓުގެ ފަރަގަކުން، 44-37 ޕޮއިންޓުންނެވެ. 

ފަހު ކުއާޓާގައި ރާއްޖޭގެ ޓީމުން ފެނުނު ވަރުބަލިކަމާއެކު، ބަނގުލަދޭޝްއިން ވަނީ ގިނަ ޕޮއިންޓުތަކެއް ހޯދާ، މެޗު ޔަގީންކޮށްފައެވެ. އެގޮތުން އެ ކުއާޓާގައި އެ ޓީމުން ވަނީ 31 ޕޮއިންޓު ހޯދާފައެވެ. އަދި ރާއްޖެއަށް ހޯދުނު 5 ޕޮއިންޓާއެކު މެޗު ނިމުނީ 75-42 ޕޮއިންޓުން، ބަނގުލަދޭޝް ލޯ މެޑަލް ކާމިޔާބުކޮށްގެންނެވެ.

މި މެޗުގައި ރާއްޖެއަށް އެންމެ ގިނަ ޕޮއިންޓް ހޯދައިދިން އިޔަލް އަބްދުލް ނަޝީދު ވަނީ 4 ރީބައުންސް ނަގާ 2 އެސިސްޓްކޮށް 05 ޕޮއިންޓް ހޯދައިދީފައެވެ. ބަންގަލަދޭޝްއަށް އެންމެ ގިނަ ޕޮއިންޓް ހޯދައިދިނީ މެޗުގެ މޮޅު ކުޅުންތެރިޔަކަށް ހޮވުނު އެމްޑީ އަފްރީދީއެވެ. އޭނާ ވަނީ 11 ރީބައުންސް ނަގާ 4 އެސިސްޓް ކޮށްދިނުމަށްފަހު 24 ޕޮއިންޓު ކާމިޔާބު ކޮށްދީފައެވެ.