ހުޅުމާލެއިން 84 ފުޅި ބަނގުރަލާއެކު މީހަކު ހައްޔަރުކޮށްފި

ރޭ ދަންވަރު ހުޅުމާލޭގައި ހިންގި ޚާއްޞަ އޮޕަރޭޝަނެއްގައި 84 ފުޅި ބަނގުރަލާއެކު މީހަކު ހައްޔަރުކޮށްފިއެވެ. ދިވެހި ފުލުހުންގެ ޚިދުމަތުން މަޢުލޫމާތު ދެއްވާފައިވާ ގޮތުގައި، ހުޅުމާލޭ ރީތިގަސްމަގުން ކާރަކަށް ބަނގުރާ އަރުވާކަމަށް ލިބުނު މަޢުލޫމާތަކާ ގުޅިގެން މި އޮޕަރޭޝަން ހިންގާފައިވެއެވެ.

އަތުލައިގަތް 84 ފުޅި ބަނގުރާ

މި އޮޕަރޭޝަނުގައި ހައްޔަރުކޮށްފައިވަނީ ގ. ލާމިގެ، އުމުރުން 46 އަހަރުގެ މުޙައްމަދު އުޝާނެވެ. ފުލުހުން ވިދާޅުވި ގޮތުގައި، އަމީން އެވެނިއު މެޕަލް ކުރިމަތިން ކާރު ހުއްޓުވައި ބަލައި ފާސްކުރިއިރު، ކާރުގެ ޑިކީ ތެރެއިން ކަޅުކުލައިގެ ކޮތަޅުތަކެއްގައި ހުރި ފޮށިގަނޑުތަކެއް ފެނުނެވެ. މި ފޮށިގަނޑުތައް ބަލައި ފާސްކުރުމުން 84 ފުޅި ބަނގުރާ ފެނިފައިވެއެވެ.

މި މައްސަލައާ ގުޅިގެން، ކާރު ދުއްވި މީހާ ހައްޔަރުކޮށް، އެ ކާރު ވަނީ ޓޯވކޮށްފައެވެ. ފުލުހުން މި މައްސަލަ ދަނީ ތަޙުޤީޤުކުރަމުންނެވެ.