ޤައުމީ ވޮލީ ލީގު: ފްލެކްސަރއިން ޗެމްޕިއަން ވެމްކޯ ބަލިކޮށްފި

ޤައުމީ ވޮލީ ލީގު 2025 ގައި، ފްލެކްސަރ ސްޕޯޓްސް ކްލަބުން ލީގު އެންމެ ފަހުން ކާމިޔާބުކުރި ވެމްކޯ ބަލިކޮށްފިއެވެ.

ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މި މެޗު ފްލެކްސަރ ކާމިޔާބުކުރީ 3-1 ސެޓުންނެވެ. 

މި މެޗުގެ ފުރަތަމަ ދެ ސެޓު ކާމިޔާބުކުރީ ފްލެކްސަރއެވެ. މި ދެ ސެޓު ވެސް އެ ޓީމުން ގެންދިޔައީ 18-25 ޕޮއިންޓުންނެވެ.

އަދި ތިން ވަނަ ސެޓު 27-25 ޕޮއިންޓުން ވެމްކޯ ކާމިޔާބުކުރި ނަމަވެސް، ފަހު ސެޓު 25-22 ޕޮއިންޓުން ކާމިޔާބުކޮށް ފްލެކްސަރއިން މެޗު ކާމިޔާބުކުރިއެވެ.

މިއީ ފްލެކްސަރ ލީގުގައި ހޯދި ފުރަތަމަ މޮޅެވެ. ފުރަތަމަ މެޗުގައި 3-1 ސެޓުން އެ ޓީމު ވަނީ ޕޮލިސް ކްލަބް އަތުން ބަލިވެފައެވެ. 

ލީގުގެ ފުރަތަމަ މެޗު ވެމްކޯއިން ވަނީ ކާމިޔާބުކޮށްފައެވެ. ހުރާ ކޮމިއުނިޓީ ކްލަބާ ދެކޮޅަށް ކުޅުނު މެޗު އެ ކްލަބުން ކާމިޔާބުކުރީ 3-1 ސެޓުންނެވެ. 

ގައުމީ ވޮލީބޯޅަ ލީގު 2025 ގެ އަންހެން ޑިވިޝަންގައި ގަދަ ހަޓީމު ވާދަކުރާއިރު ކޮންމެ ޓީމެއް ކޮންމެ ޓީމަކާ ވާދަކޮށް އެންމެ ގިނަ ޕޮއިންޓް ހޯދާ ޓީމަށް ލީގުގެ ޗެމްޕިއަންކަން ލިބިގެންދާނެއެވެ.