އޯޓީޕީ ހޯދައިގެން އީ-ސިމް ބަދަލުކޮށް ސްކޭމް ހިންގާތީ ސަމާލުވާން އެދިއްޖެ

އޮޅުވާލައިގެން ވަން-ޓައިމް ޕާސްވޯޑް (އޯޓީޕީ) ހޯދައި، މޮބައިލް ނަންބަރުތައް އީ-ސިމްއަށް ބަދަލުކޮށްގެން ބޭންކު އެކައުންޓުތަކާއި ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، ހުއްދަނެތި ޑިޖިޓަލް ވޮލެޓް ހަދައިގެން ހިންގާ ސްކޭމްތައް އިތުރުވަމުންދާތީ އެކަމަށް ހާއްސަ ސަމާލުކަމެއް ދިނުމަށް ދިވެހި ފުލުހުންގެ ޚިދުމަތުން އިލްތިމާސްކޮށްފިއެވެ.

ފުލުހުން ހާމަކުރި ގޮތުގައި ފާއިތުވި މަސްދުވަހުގެ ތެރޭގައި މަކަރާއި ހީލަތް ހަދާ ފަރާތްތަކުން ދަނީ އޮޅުވާލައިގެން ކުރާ ފޯނު ކޯލްތަކާއި ފޮނުވާ އެސްއެމްއެސް މެދުވެރިކޮށް އޯޓީޕީ އަދި ވެރިފިކޭޝަން ލިންކުތައް ހޯދުމަށް ގިނަ މަސައްކަތްތަކެއް ކުރަމުންނެވެ. މިގޮތުން އެންމެ އާންމުކޮށް ބޭނުންކުރާ އެއް އުކުޅަކީ، މިހާރު އެ މީހަކު ބޭނުންކުރާ ނަންބަރަކީ މީގެ ކުރިން ގުޅި ފަރާތުން ބޭނުންކުރި ނަންބަރެއް ކަމަށް ބުނެ އޮޅުވާލުމެވެ. އަދި ދާދި ފަހުން ރާއްޖެއިން ބޭރުން އައިސް އުޅޭ ކަމަށާއި، ކުރީގެ އީމެއިލް ނުވަތަ ސޯޝަލް މީޑިއާ އެކައުންޓްތައް ރިކަވަރ ކުރަން ކޯޑެއް ބޭނުންވާ ކަމަށް ބުނެ ފޯނަށް އަންނަ ވެރިފިކޭޝަން ކޯޑު ހޯދައިގެން ބޭންކިންގ ޗެނަލްތަކާއި އެކައުންޓުތައް ކޮންޓްރޯލް ކުރަމުންދާ ކަމަށް ފުލުހުން ވިދާޅުވިއެވެ.

މިފަދަ އޯޓީޕީ ނުވަތަ ވެރިފިކޭޝަން ލިންކުތައް ހިއްސާކުރުމަކީ ހަމައެކަނި ސޯޝަލް މީޑިއާ އެކައުންޓެއް ގެއްލުމަށްވުރެ މާ ނުރައްކާތެރި ކަމެއްކަން ފާހަގަކޮށް ފުލުހުން ބުނީ، އެ ލިންކުތައް ބޭނުންކޮށްގެން ސްކޭމަރުން އެ މީހުންގެ އަމިއްލަ ފޯނަށް އެ ނަންބަރު އީ-ސިމް މެދުވެރިކޮށް ބަދަލުކުރާ ކަމަށެވެ. މީގެ ސަބަބުން ފޯނު ލައިން އެއްކޮށް ކުށްކުރާ މީހުންގެ ކޮންޓްރޯލްގެ ދަށަށް ގޮސް، ފަހުން އަންނަ ހުރިހާ ފޯނު ކޯލްތަކާއި ބޭންކިންގ އެސްއެމްއެސް އެލާޓްތައް ލިބެނީ އެ މީހުންނަށެވެ. އަދި ވަގަށް ނަގާ މައުލޫމާތާއި ފޯނު ނަންބަރު ބޭނުންކޮށްގެން، ޝިކާރައަކަށްވާ މީހާގެ ނަމުގައި ހުއްދަނެތި ޑިޖިޓަލް ވޮލެޓްތައް ހަދައި، ބޭންކު އެކައުންޓުތަކުން ފައިސާ ޓްރާންސްފަރކޮށް ބޮޑެތި މާލީ ގެއްލުންތައް ދަނީ ދެމުންނެވެ.

މިފަދަ ކަންކަމުން ރައްކާތެރިވުމަށްޓަކައި އެއްވެސް ހާލެއްގައި އެއްވެސް ފަރާތަކާ އޯޓީޕީ، ޕިން ނުވަތަ ވެރިފިކޭޝަން ލިންކު ހިއްސާނުކުރުމަށް ފުލުހުން ވަނީ އިރުޝާދު ދީފައެވެ. ގުޅި ފަރާތަކީ ކުރިން އެ ނަންބަރު ބޭނުންކުރި މީހާ ކަމަށް ބުންޏަސް، ރައްޓެއްސެއް ނުވަތަ ބޭންކަކުން ނުވަތަ ޓެލެކޮމް ކުންފުންޏަކުން ކަމަށް ބުންޏަސް އެފަދަ މައުލޫމާތު ހިއްސާނުކުރުމަށާއި، އެކައުންޓް އަލުން ހޯދުމުގެ ރަސްމީ މަރުހަލާތަކުގައި ކުރީގެ ނަންބަރު މިހާރު ގެންގުޅޭ ފަރާތަކަށް ގުޅަން ނުޖެހޭނެކަން ފުލުހުން ހަނދާންކޮށްދިނެވެ. އަދި ސަބަބަކާ ނުލައި ފޯނުން ނެޓްވޯކް ސިގްނަލް ގެއްލިއްޖެނަމަ، އެއީ ހުއްދައަކާ ނުލައި އީ-ސިމް ބަދަލުކުރުމުގެ ނިޝާނަކަށް ވެދާނެތީ، ވަގުތުން ޓެލެކޮމް ޕްރޮވައިޑަރަށް ގުޅުމަށްވެސް ވަނީ އެދިފައެވެ.

ޝައްކުކުރެވޭ ފަދަ ކޯލެއް ނުވަތަ މެސެޖެއް ލިބިއްޖެނަމަ ނުވަތަ އެކައުންޓަކަށް ވަދެފައިވާ ކަމަށް ޝައްކުވާނަމަ، ލަސްނުކޮށް ނޭޝަނަލް އިމަޖެންސީ ސެންޓަރުގެ ނަންބަރު 911 އަށް ރިޕޯޓުކުރުމަށާއި، ބޭންކަށް ގުޅައި އެކައުންޓު ފްރީޒްކުރުމަށް ފުލުހުން ވަނީ އިލްތިމާސްކޮށްފައެވެ. އަދި ސޯޝަލް މީޑިއާ އެކައުންޓްތައް އަނބުރާ ހޯދުމަށް އެ ޕްލެޓްފޯމެއްގެ ސަޕޯޓުގެ ނުވަތަ ފުލުހުންގެ ސައިބަރ ކްރައިމް ސެންޓަރުގެ އެހީތެރިކަން ހޯދުމަށްވެސް އިރުޝާދު ދީފައިވެއެވެ.

ފުލުހުންގެ ތަފާސްހިސާބުތައް ދައްކާ ގޮތުން މިދިޔަ ހަފުތާގައި އެކަނިވެސް ސްކޭމުގެ 38 މައްސަލަ ވަނީ ހުށަހަޅާފައެވެ. މި މައްސަލަތަކުގައި އާންމުންގެ އަތުން ޖުމްލަ 356,163.40 ރުފިޔާ ގެއްލިފައިވާއިރު، ކަމާ ގުޅޭ އިދާރާތަކާއި ބޭންކުތަކާ ގުޅިގެން ކުރެވުނު މަސައްކަތުން އޭގެ ތެރެއިން 245,389.64 ރުފިޔާ ވަނީ އަނބުރާ ހޯދިފައެވެ.