ގަލްފުގެ ޤައުމުތަކުން ތެޔޮ ބޭރުކުރުމަށް އެމެރިކާގެ އަސްކަރިއްޔާއިން އެހީތެރިވެދީފި

މިދިޔަ ޖޫން މަހުން ފެށިގެން ގަލްފުގެ ޤައުމުތަކުން 1.5 ބިލިއަނަށް ވުރެ ގިނަ ފީފާގެ ތެޔޮ ބޭރުކުރުމުގައި އެމެރިކާގެ އަސްކަރިއްޔާއިން އެހީތެރިކަން ފޯރުކޮށްދީފައިވާ ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހާމަކޮށްފިއެވެ.

ސެންޓްކޮމް އިން ބުނި ގޮތުގައި މިއީ މުހިންމު ކަނޑުއޮޅި ކަމަށްވާ ހޮރްމުޒް ކަނޑުއޮޅީގެ ކޮންޓްރޯލް ހޯދުމަށް އީރާނުން ކުރަމުންދާ މަސައްކަތްތަކާ ދެކޮޅަށް ފޯރުކޮށްދިން އެހީތެރިކަމެކެވެ.

އާދީއްތަ ދުވަހު ސެންޓްކޮމް އިން ނެރުނު ބަޔާނެއްގައި ބުނެފައިވަނީ ފާއިތުވި ހަ މަސްދުވަހުގެ ތެރޭގައި 3،000 އަށް ވުރެ ގިނަ ވިޔަފާރި އުޅަނދު އެމެރިކާގެ އެހީތެރިކަމާއެކު ހޮރްމުޒް ކަނޑުއޮޅި ހުރަސްކޮށްފައިވާ ކަމަށެވެ. އަދި އީރާނުގެ އިންޒާރުތަކާ އެކުވެސް ފަހަކަށް އައިސް އެ ސަރަޙައްދުން ދަތުރުކުރި އުޅަނދުފަހަރުގެ 95 އިންސައްތައަށް ވުރެ ގިނަ އުޅަނދު ސަލާމަތްތެރިކަމާއެކު ދަތުރުކޮށްފައިވާ ކަމަށާއި، މިއީ އެ ބައިނަލްއަޤްވާމީ ކަނޑުގެ ސަރަޙައްދުގެ ކޮންޓްރޯލް އެމެރިކާއާއި ސަރަޙައްދީ ބައިވެރިންގެ އަތުގައި އޮތްކަން ހާމަވާ ކަމެއް ކަމަށްވެސް ބުނެފައިވެއެވެ.

މި ތަފާސްހިސާބުތައް ހާމަކޮށްފައިވަނީ ސެންޓްކޮމްގެ ކޮމާންޑަރު އެޑްމިރަލް ބްރެޑް ކޫޕަރ އެ ސަރަޙައްދަށް ކުރެއްވި ޒިޔާރަތަކާ ގުޅިގެންނެވެ. އެ ޒިޔާރަތުގައި އޭނާ ވަނީ އެމެރިކާ އަސްކަރިއްޔާގެ ހެލިކޮޕްޓަރެއްގައި ހޮރްމުޒް ކަނޑުއޮޅީގެ މިހާރުގެ އޮޕަރޭޝަނަލް ހާލަތު ބައްލަވާލައްވާފައެވެ. ކޫޕަރ ވިދާޅުވި ގޮތުގައި އެމެރިކާއިން ދެމިއޮންނާނީ ގަލްފުގެ ބައިވެރިންނާއި ބޯޓުދަތުރުފަތުރުގެ ދާއިރާއާ އެކުގައެވެ. އަދި އުޅަނދުފަހަރު ދަތުރުކުރާ މައިގަނޑު މަގުތަކުގައި އީރާނުން އަޅާފައިވާ މައިންތައް ނައްތާލުމަށް ކުރެވުނު މަސައްކަތްތަކުގެ ސަބަބުން މިހާރު އެ މަގުތައް ރައްކާތެރިކުރެވިފައިވާ ކަމަށްވެސް އޭނާ ވިދާޅުވިއެވެ.

ފެބްރުއަރީ މަހުގެ ފަހުކޮޅު އެމެރިކާއާއި އިސްރާއީލުން އީރާނާ ދެކޮޅަށް ފެށި ހަނގުރާމައާ ގުޅިގެންނާއި އީރާނުގެ ހަމަލާތަކުގެ ބިރު އޮތް ނަމަވެސް، އެ ސަރަޙައްދުން ސާފުނުކުރާ ތެޔޮ ބޭރުކުރާ މިންވަރު މިހާރު ވަނީ ހަނގުރާމައިގެ ކުރިން ހުރި މިންވަރަށް ގާތްގަނޑަކަށް އިއާދަވެފައެވެ. މާކެޓް އިންޓެލިޖެންސް ކުންފުންޏެއް ކަމަށްވާ ކްޕްލަރ (Kpler) ގެ ހިސާބުތައް ދައްކާ ގޮތުގައި، އީރާން ނުހިމަނައި ސެޕްޓެމްބަރު މަހު ދުވާލަކު މަދުވެގެން 16.5 މިލިއަން ފީފާގެ ތެޔޮ ވަނީ އެ ސަރަޙައްދުން ބޭރުކޮށްފައެވެ. މި ކުރިއެރުން އައިސްފައިވަނީ ކަނޑުމަތީގައި ބޯޓުން ބޯޓަށް ތެޔޮ ބަދަލުކުރުމާއި، އެމެރިކާ އަސްކަރިއްޔާގެ އެހީތެރިކަމާއެކު ދަތުރުކުރުމާއި، އަދި ތެޔޮ ހޮޅިތަކުގެ ބޭނުން އިތުރުކުރުމުގެ ސަބަބުން ކަމަށް މާހިރުން ފާހަގަކުރެއެވެ.

ނަމަވެސް، ތެލުގެ އަގު އަދިވެސް ހުރީ ހަނގުރާމައިގެ ކުރިއަށް ވުރެ މާ މަތީގައެވެ. ބްރެންޓް ކްރޫޑް ތެޔޮ ފީފާއެއްގެ އަގު އާދީއްތަ ދުވަހު ހުރީ ގާތްގަނޑަކަށް 114.50 ޑޮލަރުގައެވެ. މިއީ ފާއިތުވި ހަ މަސްދުވަހުގެ އެންމެ މަތީ އަގުން 2 އިންސައްތަ ދަށްވުމަކަށް ފަހު ހުރި މިންވަރެވެ. އެމެރިކާއާއި އިސްރާއީލުން އީރާނަށް ހަމަލާދޭން ފެށުމުގެ އެއް ދުވަސް ކުރިން، ފެބްރުއަރީ 27 ގައި ބްރެންޓް ތެޔޮ ފީފާއެއްގެ އަގު ހުރީ 72.48 ޑޮލަރުގައެވެ.