ލުބުނާނުގެ ދެކުނަށް އިޒްރޭލުން ދިން ހަމަލާތަކެއްގައި ހަތް މީހުން ޝަހީދުވެއްޖެ

އިޒްރޭލުން ލުބުނާނުގެ ދެކުނުގެ ރަށްތަކަށް ދެމުންގެންދާ ހަމަލާތައް ވަރުގަދަކޮށް، ރޭ ދިން ވައިގެ ހަމަލާއެއްގައި ހަތް މީހުން ޝަހީދުވެ ތިން މީހަކު ޒަޚަމްވެއްޖެ ކަމަށް އެ ގައުމުގެ ދައުލަތުގެ މީޑިއާއިން ރިޕޯޓްކޮށްފިއެވެ.

ލުބުނާނުގެ ނޭޝަނަލް ނިއުސް އެޖެންސީ (އެން.އެން.އޭ) އިން ބުނި ގޮތުގައި، ހޮނިހިރު ދުވަހުގެ ފަތިހުގެ ވަގުތެއްގައި އިޒްރޭލުން ހަމަލާ ދީފައިވަނީ ނަބާތިއާ ޑިސްޓްރިކްޓްގެ އަންސާރު އަވަށުގެ ބޭރުގައި ހުރި ގެއަކަށެވެ. މި ހަމަލާގައި އެ އިމާރާތް އެއްކޮށް ސުންނާފަތިވެފައިވާއިރު، އިސްލާމިކް މެސެޖް ސްކައުޓް އެސޯސިއޭޝަނާއި، އިސްލާމިކް ހެލްތު އޮތޯރިޓީ އަދި ލުބުނާނުގެ ސިވިލް ޑިފެންސްގެ ޓީމުތަކުން ދަނީ ކުނިތަކުގެ ދަށުން މީހުން ނެރުމާއި ޒަޚަމްވި މީހުން ހޮސްޕިޓަލަށް ގެންދިއުމުގެ މަސައްކަތް ކުރަމުންނެވެ.

މިއީ ޖޫން މަހު ވެވުނު އެއްބަސްވުންތަކަށްފަހު އިޒްރޭލާއި ހިޒްބުالله އާ ދެމެދު ހިނގަމުންދާ ކުރިމަތިލުންތަކުގައި ލުބުނާނުން އެންމެ ގިނަ މީހުން މަރުވި ހަމަލާއެވެ. އެން.އެން.އޭ އިން ރިޕޯޓްކުރި ގޮތުގައި ހޮނިހިރު ދުވަހުގެ ހެނދުނު އިޒްރޭލުން ވަނީ ނަބާތިއާ އަލް-ފައުގާ ކައިރީގައިވާ އަލީ އަލް-ތާހިރު ރިޖަށް ސިލްސިލާ ވައިގެ ހަމަލާތަކެއް ދީފައެވެ.

މީގެ އިތުރުން، ބޯޑަރު ކައިރީގައިވާ ބިންތު ޖުބައިލްގެ ބައެއް ގެތައް އިޒްރޭލު ސިފައިން ހަލާކުކޮށްލާފައިވާއިރު، ކޫނީން-ސަފް އަލް-ހަވާ މަގުގައި ހުރި ގެތަކަށް ބަޑީގެ ހަމަލާތައް ވެސް ވަނީ އަމާޒުކޮށްފައެވެ. މި ހަމަލާތަކަކީ ފާއިތުވި ދެ މަސް ދުވަހުގެ ތެރޭގައި ލުބުނާނުގެ ދެކުނުގެ އެންމެ އެތެރެއަށް އަމާޒުވި ހަމަލާތައް ކަމަށް ރިޕޯޓްތައް ބުނެއެވެ.

އެމެރިކާގެ މެދުވެރިވުމާއެކު ވެވުނު ފްރޭމްވޯކް އެއްބަސްވުމުގެ ދަށުން ހަމަލާތައް މަދުވެފައިވީ ނަމަވެސް، އިޒްރޭލުގެ ހަމަލާތައް އަދިވެސް ދަނީ ކުރިއަށެވެ. މި އެއްބަސްވުމުގެ ދަށުން ހިޒްބުالله ހަތިޔާރު އެޅުން ހުއްޓާލުމަށާއި، އިޒްރޭލު ސިފައިން ފޭބުމަށާއި، ލުބުނާނުގެ އަސްކަރިއްޔާ ދެކުނުގައި ގާއިމުވުމަށް ވަނީ ކަނޑައަޅާފައެވެ.

ހިޒްބުاللهގެ ލީޑަރު ނައީމް ގާސިމް ވަނީ ލުބުނާނުގެ ސަރުކާރަށް ފާޑުވިދާޅުވެފައެވެ.  "އިޒްރޭލުގެ ހަމަލާތައް ކުރިއަށްދާއިރު، ލުބުނާނުގެ އަސްކަރިއްޔާ ހިމާޔަތްކުރުމުގެ ބަދަލުގައި، އެ ސިފައިންނަށް އިޒްރޭލުގެ ޕްރެޝަރާއި ބޮން އެޅުމުގެ ނުރައްކަލަށް ހުށަހެޅިގެންދާ ދިއުން ތިޔަ ބޭފުޅުން ގަބޫލުކުރައްވަނީ ކިހިނެއްތޯ؟"  ނައީމް ގާސިމް ވިދާޅުވިއެވެ.