އިސްލާމިކް ސޮލިޑާރިޓީ ގޭމްސްގައި ރާއްޖޭގެ ޓީޓީ ދެ ޓީމަށް ވެސް އުނދަގޫ ފެށުމެއް

ސަޢުދީ ޢަރަބިއްޔާގެ ރިޔާޛުގައި ކުރިއަށްދާ ހަވަނަ އިސްލާމިކް ސޮލިޑާރިޓީ ގޭމްސް 2025ގައި އަންހެން ޓޭބަލް ޓެނިސް ޓީމް އިވެންޓުގެ ފުރަތަމަ މެޗުގައި ތުރުކީއިން ދިވެހިރާއްޖޭގެ މައްޗަށް ކުރިހޯދިއިރު، ފިރިހެން ޓީމުގެ ފުރަތަމަ މެޗުގައި އިރާނުން ދިވެހިރާއްޖޭގެ މައްޗަށް ކުރި ހޯދައިފިއެވެ.

އަންހެން ޓީމުން ތުރުކީއާ ދެކޮޅަށް ނިކުތްއިރު، އެ ޓީމުގައި ހިމެނުނީ ފާތިމަތު ދީމާ އަލީ، އައިޝަތު ރަފާ ނާޒިމް އަދި އައިޝަތު އަލްސާ ނާފިޒްއެވެ. ޓީމު އިވެންޓުގައި ފުރަތަމަ ކުޅުނު ޑަބަލްސް މެޗުގައި ދީމާ އާއި ރަފާގެ ޕެއާރ ނިކުތީ ތުރުކީގެ އޮޒްގޭ ޔިލްމާޒް އާއި ހެރަޗްއާ ދެކޮޅަށެވެ. މި މެޗުގެ ސެޓުތައް ތުރުކީއިން ކާމިޔާބުކުރީ 11-7، 11-5 އަދި 11-2އިންނެވެ. 

އަންހެން ބައިގެ ޓީމު އިވެންޓުގެ ސިންގަލްސް ފުރަތަމަ މެޗުގައި ބައްދަލުކުރީ ސިބެލް އަލްޓިންކާޔާ އާއި އަލްސާއެވެ. އެ މެޗު 11-3، 11-4 އަދި 11-4އިން ސިބެލް ކާމިޔާބުކުރިއިރު، ދެވަނަ މެޗުގައި ބައްދަލުކުރީ ހެރަޗް އާއި ދީމާއެވެ. މި މެޗު ހެރަޗް ކާމިޔާބު ކުރީ 11-3 އަދި 11-4 އިންނެވެ.

އިރާންއާ ދެކޮޅަށް ނިކުތް ފިރިހެން ޓީމުގައި ހިމެނުނީ  މޫސާ މުންސިފް އަޙުމަދު، މުޙައްމަދު ޝައްފާން އިސްމާއިލް އަދި އަހްޔަރް އަޙުމަދު ހާލިދެވެ. 

ޓީމު އިވެންޓުގެ ޑަބަލް މެޗުގައި ޝައްފާން އާއި މުންސިފް ނިކުތްއިރު، އެ މެޗު އިރާނުން ކާމިޔާބުކުރީ 11-4، 14-12 އަދި 13-11 އިންނެވެ.

އަދި ފިރިހެން ބައިގެ ޓީމު އިވެންޓުގެ ސިންގަލްސް ފުރަތަމަ މެޗުގައި ބައްދަލުކުރީ ސެޔެދުއާމިރުހުސެއިން އާއި އަޚްޔާރުއެވެ. އެ މެޗުގެ ސެޓުތައް އިރާނުގެ ކުޅުންތެރިޔާ ކާމިޔާބުކުރީ 11-4، 11-5 އަދި 11-5 އިންނެވެ. ދެވަނަ މެޗުގައި ޝައްފާން ނިކުތީ ސައެދުމުޙައްމަދުއާ ދެކޮޅަށެވެ. އެ މެޗު ޝައްފާންއަށް ގެއްލުނީ 11-4 އަދި 11-1އިންނެވެ.