ލިތުއޭނިއާ އާއި ބެލަރުސް ގުޅޭ ބޯޑަރު ބަންދުކުރި މުއްދަތު ލިތުއޭނިއާއިން އިތުރުކޮށްފި

ލިތުއޭނިއާ އާއި ބެލަރުސް ގުޅޭ ބޯޑަރު ބަންދުކޮށްފައި އޮތް މުއްދަތު ލިތުއޭނިއާއިން އިތުރުކޮށްފިއެވެ.

އެ ބޯޑަރު ބަންދުކޮށްފައިވަނީ ސިނގިރޭޓް އެޅި ފުއްޕާހަންތަކެއް ލިތުއޭނިއާގެ ވައިގެ ސަރަހައްދަށް ވަނުމާ ގުޅިގެނެވެ. އެހެންކަމުން ލިތުއެނިއާއިން ބޯޑަރު ބަންދުކޮށްފައި އޮތް މުއްދަތު އެއްމަސް ދުވަހަށް ވަނީ އިތުުރުކޮށްފައެވެ.

ލިތުއޭނިއާގެ ކެބިނެޓުން ބުދަ ދުވަހު ނިންމާފައިވަނީ، ސަލްޗިނިންކައި ކްރޮސިންގް ނޮވެމްބަރު މަހުގެ ނިޔަލަށް ބަންދުކޮށްފައި ބެހެއްޓުމަށާއި، ވިލްނިއަސް ކައިރީގައިވާ އެ ޤައުމުގެ ހަމައެކަނި އަނެއް ކްރޮސިންގް ކަމަށްވާ މެޑިނިންކައިގައި ދަތުރުފަތުރު ކުރުން ވަރަށް ބޮޑަށް ހަނިކުރުމަށެވެ. މިކަމާ ގުޅޭގޮތުން ވާހަކަ ދައްކަވަމުން ދާޚިލީ ކަންކަމާ ބެހޭ ވަޒީރު ވްލަޑިސްލާވް ކޮންޑްރަޓޮވިޗް ވިދާޅުވީ، މި ފިޔަވަޅުތަކަކީ ވައިގެ ސަރަހައްދަށް ފުއްޕާހަންތައް ވަނުމާ ގުޅިގެން، ލިތުއޭނިއާއާ ޚާއްސަ ގުޅުމެއް ނެތް  އަވަށްޓެރި ޤައުމަކަށް ވަރަށް ސާފު މެސެޖެއް ފޮނުވުމަށް އެޅުނު ފިޔަވަޅެއް ކަމަށެވެ. މިކަމުގެ ސަބަބުން ވިލްނިއަސް އެއާޕޯޓުގެ ވައިގެ ދަތުރުފަތުރަށް ހުރަސް އެޅި، ދެ ޤައުމު ގުޅުވައިދޭ ފުރަތަމަ ދެ ސަރަޙައްދު ބަންދުކުރަން ޖެހުނެވެ.

ބީއެންއެސް ނިއުސް އެޖެންސީން ރިޕޯޓްކުރާ ގޮތުގައި، ޑިޕްލޮމެޓުންނާއި، ލިތުއޭނިއާގެ ރައްޔިތުންނާއި، ޔޫރަޕިއަން ޔޫނިއަން އަދި ނޭޓޯގެ މެމްބަރު ޤައުމުތަކުގެ ރައްޔިތުންނާއި އެމީހުންގެ އާއިލާގެ މެމްބަރުންނާއި، ލިތުއޭނިއާގައި ޤަވާއިދާ އެއްގޮތަށް އެޅޭ ބިދޭސީންނަށް، މެޑިނިންކައި މެދުވެރިކޮށް ދެ ޤައުމުގެ ބޯޑަރު ގުޅުވާލާފައިވާ ޕޮއިންޓުން ލިތުއޭނިއާއަށް ވަނުމުގެ ހުއްދަ ލިބޭނެއެވެ.

 އިންސާނީ އެހީގެ ވިސާ ލިބިފައިވާ ފަރާތްތަކަށް ވެސް މި އިސްތިސްނާ ލިބޭނެއެވެ. ނަމަވެސް، ބެލަރޫސް އާއި ކަލިނިންގްރާޑް (ޕޮލެންޑާއި ލިތުއޭނިއާގެ މެދުގައިވާ ރަޝިޔާގެ ސަރަހައްދެއް) އާ ދެމެދު ދަތުރުކުރާ ޕެސެންޖަރު ރޭލުތަކަށް މިކަމުގެ އަސަރެއް ނުކުރާނެއެވެ. ލިތުއޭނިއާގެ އޮފިޝަލުން ވިދާޅުވާ ގޮތުގައި، ކަލިނިންގްރާޑަށް ދަތުރުކުރުމުގެ ހުއްދަ ދޭ ޓްރާންސިޓް ޑޮކިއުމެންޓެއް ލިބިފައިވާ ރަޝިޔާގެ ރައްޔިތުންނަށް ވެސް މެޑިނިންކައި ކްރޮސިންގް މެދުވެރިކޮށް އަދިވެސް ދަތުރުކުރެވޭނެއެވެ.

ބޮޑު ވަޒީރު އިންގާ ރުގިނިއެނޭ ވިދާޅުވީ، މި ދަތިކުރުންތައް އިތުރަށް ދިގުދެމިގެން ހިނގައިދާނެ ކަމަށެވެ. "ލިތުއޭނިއާއާ ދެކޮޅަށް ހިންގާ މިފަދަ ހައިބްރިޑް ހަމަލާއަކަށް އަޅުގަނޑުމެން އިޖާބަ ނުދީ ތިބެގެން ނުވާނެ"، އޭނާ ނޫސްވެރިންނަށް ވިދާޅުވިއެވެ.

 މި ފިޔަވަޅުގެ ސަބަބުން އެންމެ ބޮޑަށް އަސަރު ކުރާނީ ދެ ޤައުމު ދެމެދު ޤަވާއިދުން ދަތުރުކުރާ ހާހުން ގުނާލެވޭ ބެލަރޫސްގެ މަސައްކަތްތެރިންނަށް ކަމަށް ރުގިނިއެނޭ ވިދާޅުވިއެވެ. ނަމަވެސް، މިސްކްއާ އެކު މަސައްކަތް ކުރަމުންދާ ލިތުއޭނިއާގެ ވިޔަފާރިތަކަށް ވެސް އަސަރު ކުރާނެއެވެ.

ފުއްޕާހަންތައް ވައިގެ ސަރަހައްދަށް ވަނުމުގެ ހާދިސާއަށް ފަހު ލިތުއޭނިއާއިން ފުރަތަމަ ބޯޑަރު ބަންދުކުރުމުން ބެލަރޫސްއިން ވަނީ އެކަން ކުށްވެރިކޮށްފައެވެ. 

ބެލަރޫސްގެ ޚާރިޖީ ވަޒީރުގެ އޮފީހުން ނެރުނު ބަޔާނެއްގައި ބުނެފައިވަނީ، "ލިތުއޭނިއާގެ ސިޔާސީ ބޭފުޅުން ނިންމާފައިވަނީ މި ހާލަތުގެ ބޭނުން ހިފައި، ހުރިހާ ކުށެއް ބެލަރޫސްގެ ބޮލުގައި އެޅުވުމަށް، އެގޮތުން ލިތުއޭނިއާގެ ތެރޭގައި ތިބި ސްމަގްލަރުންގެ ކޮންޓްރެކްޓަރުން ހޯދުމަށް އެމީހުންގެ ނުކުޅެދުންތެރިކަން (ނުވަތަ ނުރުހުން؟) ވަންހަނާކުރުމަށް"، ކަމަށެވެ. 

ބެލަރޫސްގެ ރައީސް އެލެގްޒެންޑަރ ލުކަޝެންކޯ ވިދާޅުވީ، "ސިނގިރޭޓް އެޅި ފުއްޕާހަންތައް އެ ސަރަހައްދަށް އުދުހެމުންދާ ނަމަ، އެމީހުން އެކަމުގެ މައްސަލަ އެމީހުންގެ ފަރާތުން ހައްލުކުރަން ޖެހޭނެ"، ކަމަށެވެ. އަދި އޭނާ ވިދާޅުވީ، އެކަމުގައި އެމީހުންގެ ބައިވެރިވުން ސާބިތުވެއްޖެ ނަމަ، ބެލަރޫސްއިން މާފަށް އެދޭނެ ކަމަށެވެ.

ނޭޓޯ އަދި ޔޫރަޕިއަން ޔޫނިއަންގެ މެމްބަރެއްގެ ހައިސިއްޔަތުން، ލިތުއޭނިއާއިން މި ފުއްޕާހަންތަކުގެ ހާދިސާއަށް ބަލަނީ ރަޝިޔާއާ ގުޅުން ހުރި ބެލަރޫސްއިން ގަސްތުގައި ހިންގި ސަބަޓާޖްގެ އަމަލެއްގެ ގޮތުގައެވެ. މިކަމުގެ ކަންބޮޑުވުން އިތުރުވެފައިވަނީ، ނޭޓޯގެ ވައިގެ ސަރަހައްދަށް ޤަވާއިދުން ޑްރޯންތައް ވަދެފައިވާތީއެވެ.

 މިފަދަ ހާދިސާތައް މިދިޔަ މަހު ވަނީ މިހާތަނަށް ދިމާނުވާ މިންވަރަކަށް އިތުރުވެފައެވެ. ބައެއް ޔޫރަޕިއަން އޮފިޝަލުން މި ހާދިސާތަކަށް ސިފަކޮށްފައިވަނީ، މޮސްކޯއިން ނޭޓޯގެ ރައްދު ބަލާލުމަށް ކުރާ ޓެސްޓެއްގެ ގޮތުގައެވެ. މިކަމުގެ ސަބަބުން ރަޝިޔާއާ ދެކޮޅަށް ނޭޓޯ ތައްޔާރުވެފައިވާ މިންވަރާމެދު ސުވާލު އުފެދިފައިވެއެވެ. ބެލްޖިއަމްގައި، ދިފާއީ ވަޒީރު ތިއޯ ފްރެންކެން ވިދާޅުވީ، ބުދަ ދުވަހުގެ ރޭ އިރުމަތީގައިވާ މާޗެ-އެން-ފަމެންގައި ހުންނަ އަސްކަރީ ބޭސްއެއްގެ މަތިން "ގިނަ އަދަދެއްގެ ޑްރޯންތައް އަނެއްކާވެސް ފެނުމާ" ގުޅިގެން ތަޙުޤީޤެއް ކުރިއަށްދާ ކަމަށެވެ.