އޮސްޓްރޭލިއާއިން ކަސްޓަމްސްއަށް ޑްރޯންތަކެއް ހަދިޔާކޮށްފި

އޮސްޓްރޭލިޔަން ބޯޑަރ ފޯސްއިން މޯލްޑިވްސް ކަސްޓަމްސް ސާރވިސަސްއަށް ސާރވައިލެމްސް ޑްރޯންތަކެއް ހަދިޔާކޮށްފިއެވެ.

މި ޑްރޯންތައް ކަސްޓަމްސްއަށް ހަވާލުކޮށްފައި ވަނީ، ކަސްޓަމްސްގައި މިއަދު ބޭއްވި ޚާއްޞަ ރަސްމިއްޔާތެއްގައެވެ.

މި ޑްރޯންތައް ކަސްޓަމްސްއާ ހަވާލުކޮށްދެއްވާފައި ވަނީ އޮސްޓްރޭލިޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ޑޭވިޑް ޖެސަޕްއެވެ. އަދި ކަސްޓަމްސްގެ ފަރާތުން މިތަކެއްޗާއި ހަވާލުވެވަޑައިގަތީ ކޮމިޝަނަރ ޖެނެރަލް އޮފް ކަސްޓަމްސް، ފާތިމަތު ދިޔާނާއެވެ.

ޑްރޯންތައް ހަދިޔާކުރެއްވުމާ ގުޅިގެން ސީޖީ ދިޔާނާ ވަނީ އޮސްޓްރޭލިޔާގެ ސަރުކާރާއި އެ ޤައުމުގެ ބޯޑަރ ފޯސްއަށް ޝުކުރު އަދާކުރައްވާފައެވެ.

އަދި މި އެހީއާއެކު ބޯޑަރ އެންފޯސްމަންޓްގެ މަސައްކަތާއި، ޕޯޓްތައް ބެލެހެއްޓުމުގެ މަސައްކަތް އިތުރަށް ވަރުގަދަވެގެންދާނެކަން ކޮމިޝަނަރ ޖެނެރަލް އޮފް ކަސްޓަމްސް ފާހަގަކުރެއްވިއެވެ.